Dʼa paa nu kjɇɇ yo testigo e Jehová ñe na punkjꞹ ntee kja texe ne xoñijomꞹ jmurꞹji ngekʼua ra mbeñeji ma o nrru̱u̱ e Jesús kʼꞹ ja nzi ba mama angeze (Lucas 22:19). Nujyo pjøxkꞹji ra nuji na mubi kʼo o tsjaa e Jesús ma o unꞹ o vida por yo ntee. Xo ñetsʼe pje nee ra mama pa nutsʼkøji kʼo o tsjaa angeze, ndeze nudya ñe a ma xojñi (Juan 3:16).

 Zø bi mage ne kjɇdya kja ne conmemoración o iyo, ¿ja rga mbøxkʼꞹ ke o nrru̱u̱ e Jesús? Angeze o jizhi ke bʼꞹbʼꞹ yeje kʼo søø ra kjaji kʼꞹ me na mubi:

1.  1. Pjechige ja ga kjaa e Yose ñe e Jesús. Ma e Jesús o dyøtꞹ nu Tata o xipji: “Nge kʼo rgi yøsʼꞹji texe yo paa: ma ra mba̱kʼa̱ji, ngextrjotsʼꞹge nu Mizhokjimi kʼꞹ na kjuana, ñe kʼꞹ gui pejñege, e Jesucristo” (Juan17:3).

2.  2. Tsjage kʼo gi pjechi. E Jesús o mama ke ni jyodʼꞹ ra bʼꞹbʼꞹji kʼꞹ ja ga jizhi. Nzakja, ma o nguarꞹ o nⱥdʼⱥ kʼe jñaa kja kʼe Trʼeje, o mama ke ra mⱥjⱥ kʼe ntee “ma ra [dyⱥrⱥ] in jñaa ñe ma ra [tsjaa]” nujyo (Lucas 6:46-48). Nʼaño paa xo go mamayo: “[Nudya ke] in pa̱ra̱jiyo, me ri mⱥjⱥji ma ri tsjaji” (Juan 13:17).

 ¿Xe gi nee ri pjechi de e Diosi ñe e Jesús? ¿Gi nee ri pa̱rge ja rgi tsjaa yo na pjechi? Bʼꞹnkʼua ja nzi jñaa kʼꞹ søø ra mbøxkʼꞹ.

 Na punkjꞹ ntee kʼꞹ a pjechiji kʼo mama ne Biblia, o pjechiji ja rgua tsjajiyo pama pa.

•   Ñuge ne página nu ja mama kʼo ri pjechi ma kjo ra jitsʼi kʼo mama ne Biblia, akjanu ri pa̱ra̱ge ja rga kjagøjmeyo.

•   Ñuge ne video Me na joo ke ri xørꞹ ne Biblia akjanu ri pa̱ra̱ ja rga jichigøjme yo ntee o jñaa Mizhokjimi.

 Yo testigo e Jehová jmurꞹji yeje paa nu ngoʼo, nu ja xiji Ngumꞹ nu ja Jmurꞹji yo Testigo e Jehová. Ma ri jmurgøjme ri xørꞹjme ne Biblia ñe ri pjechijme ja rga kjagøjmeyo.

 Nu ja ri jmurgøjme søø ra moji texe yo ntee, dya peskʼꞹ ri tsjage Testigo ngekʼua ri maa. Zø ja nge nu ja gi menzumꞹge, søø ri maa nu ja jmurꞹji, o ri jñanrra kja videoconferencia.

•   Søø ri jñanrra ne video ¿Pje ri kjagøjme kja yo ngumꞹ nu ja ri jmurgøjme? akjanu ri pa̱ra̱ pje ri ñuu ma ri mage nu ja ri jmurgøjme.

•   Jyodʼꞹ ja jmurꞹji yo testigo bʼɇxtrjo ja i menzumꞹ, søø ri chøtrʼꞹge yo kja in sitiogøjme kja Internet.

 Na punkjꞹ artículo ñe video kja in sitiogøjme xenrra ra mbøxkʼꞹ ri pjechi yo go jizhi e Jesús ñe kʼꞹ me na mubi ke go nrru̱u̱ angeze.

 Søø ri pjechige pjenga kʼꞹ go nrru̱u̱ dʼa bʼɇzo søø ra mbøsʼꞹ na punkjꞹ ntee, søø ri xorꞹge “¿De qué manera nos salva Jesús?” ñe “¿Por qué sufrió y murió Jesús?” Xo søø ri jñanrra ne video ¿Pjenga go nrru̱u̱ e Jesús?