Okslal qoʼye. Lu qe junjun yekʼbʼil lu:

•   In nok tilil quʼne tuʼn qokxix lepeʼye tiʼj Jesús ex tuʼn qanqʼine ik tzeʼn kyaj t-xnaqʼtzaʼn (1 Pedro 2:21).

•   In nok qeʼ qkʼuʼje qa a nimxix toklen Jesús tuʼn qklet, tuʼnju «mi aʼl juntl klol qe; porque tuj tkyaqil twitz txʼotxʼ mintiʼ ma tzaj tmaʼn Dios qa at juntl tuʼn qklet tuʼn» (Hechos 4:12).

•   Aj qoke te testigo de Jehová, in jaw aʼ qwiʼye toj tbʼi Jesús, moqa in qo bʼyane, toj tbʼi (Mateo 28:18, 19).

•   In qo naʼne Dios toj tbʼi Jesús (Juan 15:16).

•   Qʼuqli qkʼuʼje qa a Jesús wibʼaj kye kykyaqil xinaq, moqa ichan (1 Corintios 11:3).

 Noqtzun tuʼnj, at junjun qxnaqʼtzbʼile junxitl twitz kyxnaqʼtzbʼil txqantl okslabʼil aʼyeju in kyqʼamaʼn qa lepchiqeʼk tiʼj Jesús. Jun techel tiʼj jlu, o tzʼel qnikʼe tiʼj qa in tzaj t-xnaqʼtzaʼn Tyol Dios qa Tkʼwaʼl Dios te Jesús ex mintiʼ toklen tiʼjju xnaqʼtzbʼil aju in kyqʼamaʼn xjal qa at Oxe Kybʼet Dios (Marcos 12:29). Nya oʼkxju, ax ikx mintiʼ in nok qeʼ qkʼuʼje tiʼj xnaqʼtzbʼil qa kukx in kyaj anqʼin qanmi, ex mintiʼ in tzaj tqʼamaʼn Xjan Uʼj qa in che kux tqʼoʼn Dios xjal toj qʼaqʼ te jumajx ex mintiʼ in tzaj tqʼamaʼn Xjan Uʼj qa il tiʼj tuʼn tok qʼet bʼibʼaj nim toklen kyiʼj qeju nejenel kyxol okslal (Eclesiastés 9:5; Ezequiel 18:4; Mateo 23:8-10).