In tzaj tqʼamaʼn Biblia alkye junjun tiʼchaq tuʼn kybʼaj ex tiʼ kymod xjal tuʼn tten tuʼntzun tel qnikʼ tiʼj qa in qo anqʼin kyoj bʼajsbʼil tqʼijlalil ex qa ya chʼix tul xitbʼil (Mateo 24:3). In nok tqʼoʼn Tyol Dios tbʼi ambʼil lu te «bʼajsbʼil tqʼijlalil» moqa «mankbʼil tqʼijlalil» (Daniel 8:17, 19; 2 Timoteo 3:1).

 Kyaj tqʼamaʼn Biblia qa tuʼn kybʼaj junjun tiʼchaq toj junx ambʼil ex qa che okel te jun «señ» tuʼntzun tel qnikʼ tiʼj qa atoʼ kyoj bʼajsbʼil tqʼijlalil (Lucas 21:7). Qo yolin kyiʼj junjun techel.

 Tuʼn kybʼaj qʼoj toj junxichaq lugar. Kyaj tqʼamaʼn Jesús qa «tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam» (Mateo 24:7). Ex toj Apocalipsis 6:4 in nok qʼoʼn jun chej te techel qʼoj «tuʼn miʼn kyten xjal tuj txubʼtxaj» tzalu twitz Txʼotxʼ.

 Waʼyij. Tqʼama Jesús qa tuʼn ttzaj waʼyij (Mateo 24:7). Toj uʼj te Apocalipsis, ax ikx in kubʼ qʼoʼn jun chej te techel waʼyij tuʼn ttzaj kyoj nim lugar (Apocalipsis 6:5, 6).

 Qe terremoto. Kyaj tqʼamaʼn Jesús qa noq jaxku tumel tuʼn kytzaj kyajnabʼ moqa terremoto (Mateo 24:7; Lucas 21:11). Kyuʼn terremoto lu, ktzajel nim yajbʼil kyiʼj xjal ex mas nim kybʼet che kymel.

 Yabʼil. Ax ikx tqʼama Jesús qa tuʼn kytzaj «txʼuʼj yabʼil» kyoj nimku tnam (Lucas 21:11).

 Qe nya bʼaʼn ex elqʼabʼil. Atxix toj ambʼil ojtxe, in nok bʼinchaʼn nya bʼaʼn kyiʼj xjal ex in che elqʼan, pero kyaj tqʼamaʼn Jesús qa mas kchʼiyel jlu kyoj bʼajsbʼil tqʼijlalil (Mateo 24:12).

 In bʼaj yajin twitz Txʼotxʼ. In tzaj tqʼamaʼn Apocalipsis 11:18 qa in «naj twitz txʼotxʼ kyuʼn» xjal. Nya oʼkx in yolin jlu tiʼj nya bʼaʼn ex sbʼubʼil, sino ax ikx in yolin tiʼj nya bʼaʼn in nok kybʼinchaʼn xjal tiʼj Txʼotxʼ.

 Mas nya bʼaʼn kymod xjal ktel. In tzaj tqʼamaʼn Biblia jlu kyiʼj xjal: «Mintiʼ in kyqʼoʼn chjonte tiʼj ju in kykʼmoʼn, mibʼan che niman te Dios, [...] mintiʼ in chewix kykʼuʼj, ex siʼmil yol qe, ex mintiʼ in kyjakʼun kyibʼ, ex mintiʼ chʼin kylastmi kyiʼj xjal, ex nneʼl kyikʼun aju bʼaʼn, ax in che ok meltzʼaj kyiʼj kyukʼil, txʼuʼj kywiʼ, ex in jaw kyniman kyibʼ» (2 Timoteo 3:1-4). Kyaj tqʼamaʼn Tyol Dios qa tuʼn ttzaj «nim yajbʼil» tuʼn kymod xjal lu.

 In nel kypan kyibʼ familia. In tzaj tqʼamaʼn 2 Timoteo 3:2 ex 3 qa mlay «che niman [kʼwal] tyol kyman» ex qa mlay ten «kykʼujlalil» familia kyxolx.

 Mlay tzʼok kykʼujlaʼn xjal Dios. Tej tqʼama Jesús qa «nimku xjal miʼn tentl kykʼujlalil», atztoq in yolin tiʼj qa chʼixmi kykyaqil xjal mlay ten kykʼujlabʼil tiʼj Dios (Mateo 24:12). Ex toj 2 Timoteo 3:4 in tzaj tqʼamaʼn qa «mas tok kykʼuʼj [xjal] tiʼj achbʼil ex mya tiʼj Dios».

 Nya ax tok che ajbʼel xjal te Dios. Kyaj tqʼamaʼn Biblia toj 2 Timoteo 3:5 qa che tel xjal «mer nimal Dios che keʼyin, pero mintiʼ kyaj tiʼj tipumal tuʼn kyklet», toj juntl yol, tuʼn kybʼinchbʼen in kubʼ kyyekʼin qa nya ax tok kʼujlaʼn Dios kyuʼn.

 Mas kʼelel nikʼbʼaj kyiʼj profecía. Kyaj tqʼamaʼn uʼj te Daniel qa «ok tjapun mankbʼil tqʼijlalil», mas kʼelel kynikʼ xjal kyiʼj axix tok xnaqʼtzbʼil. Jun techel, mas kʼelel kynikʼ kyiʼj profecía in japun kywi toj ambʼil jaʼlo (Daniel 12:4).

 Tuʼn t-xi pakbʼet tbʼanel tqanil twitz tkyaqil Txʼotxʼ. Kyaj tqʼamaʼn Jesús jlu: «Aju tqanil bʼaʼn [...] tiʼj tkawbʼil Dios kxel pakbʼet tuj tkyaqil twitz txʼotxʼ» (Mateo 24:14).

 Ikʼbʼil ex xmaybʼil. Kyaj tqʼamaʼn Jesús qa chʼixmi kykyaqil xjal mlay txi kynimen qa chʼix tul xitbʼil maske at yekʼbʼil tiʼj (Mateo 24:37-39). Nya oʼkxju, ax ikx in tzaj tqʼamaʼn 2 Pedro 3:3 ex 4 qa che xmayil xjal kyiʼj señ kyiʼj mankbʼil tqʼijlalil ex qa tzul kyqʼamaʼn qa mintiʼ jun tiʼ o chʼexpaj.

 Kjapunel kywi kykyaqil profecía. Kyaj tqʼamaʼn Jesús qa kyoj mankbʼil tqʼijlalil kjapunel kywi kykyaqil profecía toj ax ambʼil ex nya oʼkx jun moqa noq junjun (Mateo 24:33).

 In qo anqʼin. Tkyaqilju in bʼaj twitz Txʼotxʼ ex aju in tzaj tqʼamaʼn Tyol Dios, in tzaj tyekʼin qa e tzaj tzyet mankbʼil tqʼijlalil toj 1914, aju abʼqʼi tej tok Tnejel Nimaq Qʼoj twitz Tkyaqil Txʼotxʼ. Keʼyinka video tkubʼ kubʼni ex qʼonka twitza tiʼj qa tkyaqilju in bʼaj toj ambʼil jaʼlo, in tzaj tyekʼin qa in qo anqʼin kyoj mankbʼil tqʼijlalil:

 Xi tzyet tuʼn tkawin Tkawbʼil Dios toj kyaʼj toj 1914. Jun kyxol qe tiʼchaq bʼant tuʼn tnejel toj kyaʼj, etz tlajoʼn Tajaw il ex qeju demonio. Atxix toj ambʼil aju, oʼkx xi qʼoʼn ambʼil kye tuʼn kyten twitz Txʼotxʼ (Apocalipsis 12:7-12). Tuʼnju kymod ex kybʼinchbʼen xjal in nel nikʼbʼaj tiʼj qa a Satanás in kawin kyibʼaj. Tuʼntzunju, at nim yajbʼil kyoj «mankbʼil tqʼijlalil» (2 Timoteo 3:1).

 Ateʼ nim xjal in tzaj bʼaj kykʼuʼj toj ambʼil jaʼlo. In tzaj bʼaj kykʼuʼj aj tok kykeʼyin qa mas in tzaj nya bʼaʼn tuʼnju in bʼant kyuʼn xjal. Atzun junjuntl, in che tzaj xobʼ aj tkubʼ kyximen qa jaku bʼaj kybʼyon kyibʼ xjal kyxolx.

 Noqtzun tuʼnj, ateʼ junjun xjal o kanet jun qʼuqbʼil kykʼuʼj tiʼj ambʼil tzul maske ax ikx in tzaj bʼaj kykʼuʼj tiʼj tkyaqilju in bʼaj. ¿Tiquʼn? Tuʼnju qʼuqli kykʼuʼj tiʼj qa chʼix tkubʼ tnajsaʼn Tkawbʼil Dios tkyaqil nya bʼaʼn in nok qkeʼyin jaʼlo (Daniel 2:44; Apocalipsis 21:3, 4). Akux in che ayon tiʼj ambʼil tuʼn tjapun kywi yol in tzaj ttziyen Dios, in chewix kyanmi kyuʼn tyol Jesús lu: «Alkye kukx ma tzikʼx tuʼn ex mintiʼ ma kubʼ numj, atzunju ok kletel» (Mateo 24:13; Miqueas 7:7).