Ataro en gima notimore adier. Nyasaye nokelo Atarono mondo okethgo joma richo, kata kamano, nonyiso Noa ni oger yie mondo oresgo joma beyo kod le. (Chakruok 6:11-20) Wanyalo bedo gadier ni Atarono en gima notimore nikech ondike e Muma ma en buk ‘mokudh gi much Nyasaye.’​—2 Timotheo 3:16.

•  Be en gima notimore adier koso en mana wach mochuogi?

•  Ang’o momiyo Ataro notimore?

•  Be ji ne ong’eyo ni Ataro ne dhi biro?

•  Yie ma Noa nogero ne chalo nade?

•  Noa nokawo kinde maromo nade mondo otiek gero yie?

•  Sigendni kod ngeche miwacho e wi Ataro

Muma nyisowa ni Noa ne en ng’at ma ne nitie adier kendo ni Ataro en gima notimore, to ok ni ne en mana wach mochuogi.

• Jondik Muma noyie ni Noa ne nitie adier. Kuom ranyisi, Ezra kod Luka ma ne gin jondik Muma molony e weche histori, nondiko nying Noa e anyuola mar Jo-Israel. (1 Weche mag Ndalo 1:4; Luka 3:36) Mathayo kod Luka ma nondiko buge Injili bende nondiko weche ma ne Yesu owacho e wi Noa kod Ataro.​—Mathayo 24:37-39; Luka 17:26, 27.

  Janabi Ezekiel kod jaote Paulo bende nowacho ni Noa ne en ng’at ma ne nigi yie kendo ma nohero timbe makare. (Ezekiel 14:14, 20; Jo-Hibrania 11:7) Be nyalore mondo jondikogo owuo e wi ng’at ma ne onge ka ginyisowa ni waluw ranyisi mare? Adier, Noa kaachiel gi chwo kod mon ma nonyiso yie ketonwa ranyisi maber monego waluw nikech ne gin joma ne nitie adier.​—Jo-Hibrania 12:1; Jakobo 5:17.

• Muma nyisowa weche ma achiel kachiel e wi Ataro. Sigana ma yudore e Muma ma wuoyo e wi Ataro ok chak gi weche kaka, “Chon chon gilala,” mana ka gima ne en sigana moro mochuogi. Muma to nyisowa higa, dwe, kod odiechienge ma weche motudore gi Ataro notimoree. (Chakruok 7:11; 8:4, 13, 14) Muma bende nyisowa kaka yie ma Noa nogero ne romo. (Chakruok 6:15) Wechegi duto nyiso maler ni Ataro ma Muma wuoyoe en gima notimore gadier to ok en mana sigana moro mochuogi.

Muma nyisowa ni ka ne pok Ataro otimore, “richo ne osepong’o piny.” (Chakruok 6:5) Owacho bende ni “Nyasaye noneno ni piny duto ne osekethore” nikech nopong’ gi timbe gero, chode, kod terruok.​—Chakruok 6:11; Juda 6, 7.

Muma wacho ni thoth gik maricho ma notimorego nokel gi malaike maricho ma nowuok e polo mobiro e piny mondo giterre gi mon. Malaikego nonyuolo nyithindo ma roboche kendo ma roteke miluongo ni Jo-Nefili. Joma rotekego nokelo chandruok ahinya ne joma nodak e kindego. (Chakruok 6:1, 2, 4) Nyasaye nong’ado mar tieko jo marichogo mondo joma beyo kende e ma odag e piny.​—Chakruok 6:6, 7, 17.

Ee. Nyasaye nonyiso Noa gik mabiro timore kendo nochike mondo oger yie ma ne dhi reso joode kod le. (Chakruok 6:13, 14; 7:1-4) Noa nomiyo ji siem e wi masira ma ne birono, kata kamano, ne ok gidewo. (2 Petro 2:5) Muma wacho niya: “Ne ok gidewo nyaka Ataro nobiro moyweyogi giduto.”​—Mathayo 24:37-39.

Yie ne en gima duong’ machalo sanduku ma borne ne en chiegni mita 133, lachne ne en mita 22, to borne kadhi malo ne en mita 13. * Nolose gi yien mar gofer kendo nomwone gi lam iye gi oko. Ne en gi gorofa adek kendo ne en gi udi moko e iye. Ne nitie dhoot e bathe kod dirisa e wiye malo, but tado. Nyalo bedo ni tado mar yieno nothulore matin mondo pi oridre.​—Chakruok 6:14-16.

Muma ok nyiswa ni Noa nokawo kinde maromo nade mondo otiek gero yie, kata kamano, nenore ni ne ogedo kuom higni mang’eny ahinya. Noa ne jahigni 500 gi wiye ka ne onyuolo wuode mokwongo, kendo ne ojahigni 600 ka ne Ataro otimore. *​—Chakruok 5:32; 7:6.

Sama ne Nyasaye nyiso Noa mondo oger yie, noyudo ka yawuote adek osebedo joma dongo mi gikendo. Nyalo bedo ni higni 50 kata 60 nosekalo. (Chakruok 6:14, 18) Kaluwore gi parono, wanyalo wacho ni tij gero yie duto ne okawo higni 40 kata 50.