Nitie lamo moko ma Nyasaye ok winjga. Ne ane gik moko ariyo ma nyalo miyo Nyasaye kik winj lamo.

1. Ka lamono ok winjre gi dwach Nyasaye

Nyasaye ok winj lamo kata kwayo ma ok winjre gi chikene ma yudore e Muma. (1 Johana 5:14) Kuom ranyisi, Muma kwerowa ni kik wabed joma igi lach. Tugo tuke mag loyo mich miyo wabedo gi ich-lach. (1 Jo-Korintho 6:9, 10) Omiyo, Nyasaye ok bi winjo lamoni ka ikwaye ni okonyi loyo mich e tuke ma kamago. Nyasaye ok en kaka misumbawa ma wanyalo nyiso gimoro amora to otimo. Mano en wach maber nikech ka da bed ni en kamano dikoro waluoro ahinya gik ma jomoko nyalo nyiso Nyasaye mondo otimnwa.​—Jakobo 4:3.

2. Ka ng’at ma lemo ok tim timbe ma moro Nyasaye

Nyasaye ok winj lamo mar joma oramo ni ok giluw chikene. Kuom ranyisi, Nyasaye ne onyiso joma ne wuondore ni lame to kare gitimo timbe maricho niya: “Kata ka ulemo ding’eny, to ok anawinju; lweteu omienore gi remo.” (Isaya 1:15) Kata kamano, ka dine bed ni giloko timbegi kendo ‘giloso weche’ gi Nyasaye, ne odhi winjo lamogi.​—Isaya 1:18.