Muma wacho ni ne oneg Yesu “e ringruok, to ne ochiere e del mar polo.”​—1 Petro 3:18; Tich Joote 13:34; 1 Jo-Korintho 15:45; 2 Jo-Korintho 5:16.

Weche ma ne Yesu owacho nonyiso maler ni ne ok dhi chiere gi del mar ringruok kod remo. Nowacho ni ne odhi ‘chiwo ringrene mondo piny obed gi ngima’ kendo owar dhano. (Johana 6:51; Mathayo 20:28) Ka dine ochiere gi ringrene, mano nyiso ni misango ma ne ochiwocha dine ok ochopo gimoro amora. Kata kamano, mano ne en gima ok nyal timore nikech Muma wacho ni Yesu nochiwo ringrene kod rembe “dichiel ma ok bi nwo kendo.”​—Jo-Hibrania 9:11, 12.

Ka ne ochier Yesu gi del mar roho, ere kaka jopuonjrene ne nyalo nene?

• Chuech mag roho nyalo rwako ringruok mar dhano. Kuom ranyisi, nitie malaike ma ne otimo kamano kendo ne gichiemo ma gimetho gi dhano. (Chakruok 18:1-8; 19:1-3) Kata kamano, pod ne gin chuech mag roho kendo ne ginyalo lonyo del mar dhano.​—Jobura13:15-21.

• Bang’ chierne, Yesu bende ne orwako del mar dhano kuom kinde machuok mana kaka malaike moko bende notimo e kinde mokalo. Nikech ne en chuech mar roho, ne onyalo nenore kamoro kae to olal apoya nono. (Luka 24:31; Johana 20:19, 26) Del mar ringruok ma ne orwako, ne opogore opogore. Mano e momiyo kata mana osiepe Yesu machiegni ahinya ne nyalo mana fwenye e kindeno, kaluwore gi gik ma nowacho gi ma notimo.​—Luka 24:30, 31, 35; Johana 20:14-16; 21:6, 7.

• Ka ne Yesu ofwenyore ne Thoma, ne orwako del mar ringruok ma nigi alama. Ne otimo kamano mondo okony Thoma bedo gi yie motegno nikech ne en gi kiawa ka be nosechier Yesu.​—Johana 20:24-29.