Ee. Nyasaye dewo jotichne matuore. Muma wacho niya kowuoyo kuom jatich Jehova moro: “Jehova notege e kitanda mar midekrene.” (Zaburi 41:3) Kapo ni ijatuori kata in gi midekre, yore adek maluwogi nyalo konyi nyagori:

1. Kwa Jehova teko mar nano. Ibiro yudo “kuwe mar Nyasaye ma loyo ng’eyo duto” ma biro rito chunyi kod pachi kendo miyi teko mar nano.​—Jo-Filipi 4:6, 7.

2. Bed gi paro mowinjore. Muma wacho niya: “Chuny mamor chalo gi yath maber. To chuny monyosore ochiko choke.” (Ngeche 17:22) Bed ng’at ma mor nikech mano nyalo konyi mondo kik iparri mang’eny kendo ok ibi bedo ng’at mokuyo.

3. Bed gi geno motegno kuom gueth mibiro yudo kinde mabiro. Geno nyalo konyi bedo gi mor kata bed ni in gi midekre. (Jo-Rumi 12:12) Muma koro ni nitie kinde ma “japiny ok nowachi, Atuwo.” (Isaiah 33:24) Nyasaye biro tieko tuoche gi midekre duto ma otamo ji tieko e kindegi. Kuom ranyisi, Muma wacho ni joma oti biro bedo ka rowere. Ndikono wacho niya: “Eka dende nobed mapoth moloyo dend nyathi; obedo kaka nobet ka podi ne en rawera.”​—Ayub 33:25.

Nge Wachni: Joneno mag Jehova tiyoga gi puonj ma Nyasaye chiwo sama gituo. E wi mano, gitemo manyo thieth mag tuo kata midekre machandogi. (Mariko 2:17) Kata kamano, kodok korka wach yiero yo moro mar thieth ng’ato ka ng’ato nyaka tim yierone owuon.