Ji mang’eny e ndalogi ok ohero tije lwedo, mana kaka Alex. Makanika moro miluongo ni Aaron wacho niya: “Ji mang’eny ok ohero tije mapiny ma ji ochayo. Joma kamago wachoga ni: ‘Atimo atima tijni ka aritogo tich mochomo yo.’”

Ang’o momiyo ji mang’eny paro ni tije lwedo ok owinjore kodgi? Nyalo bedo ni gik milando e televison kata e gasede e ma miyo giparo ni ngima maber en mano ma dhi nyue ma ng’ato ok ti matek. Fundi moro miluongo ni Matthew wacho kama: “Ji paro ni ka tich mitiyo chuno ni imed tiyo matek eka iyud kaka dikonyri, to mano nyiso ni ngimani ok dhi maber.” Jal moro miluongo ni Shane ma tiyo tij rito udi oyie gi weche ma Matthew nowachogo. Owacho kama: “Ji mang’eny tinde dwaro ni giti mana kuom seche manok to migi osara mar odiechieng’ mangima.”

Mopogore gi mano, ji mathoth ma ngimagi dhi maber ohero tije mag lwedo. Jagedo moro miluongo ni Daniel ma jahigni 25 wacho kama: “Aparo ni tiyo tije lwedo kelo ber ahinya, to moloyo ka in gi chenro moro malong’o migombo chopo.” Andre, ma jahigni 23, bende oyie gi wechego. Owacho niya: “An ayie ni ng’at mamor e ngimane, en ng’at ma tiyo. Ka tich ma ng’ato timo en bet abeta, ok onyal yudo mor mosiko!”

En ang’o momiyo Daniel gi Andre nigi paro makare kuom tije mag lwedo? En nikech gisetiyo gi puonj mag Muma e ngimagi. Muma ok kwed tije lwedo, to ojiwo ji mondo obed jokinda e tich. To ok mano kende. Muma bende nyisowa kaka wanyalo hero tich mwatimo.

Gin puonj mage mag Muma ma nyalo konyi hero tiji? We wanon ane moko kuomgi e sula maluwo mae.