Kaka Inyalo Nyiso ni Ihero Dhano Wadu
Nikech waduto wan nyikwa Adam, mano nyiso ni wan nyithi ot achiel. Kata obedo ni dwarore ni joot oherre kendo gimire luor, mano ok e gima timore e kindewagi. Mano opogore ahinya gi dwach Nyasachwa ma jahera.
GIMA NDIKO MALER WACHO E WI HERA
“Nyaka iher wadu kaka iherori iwuon.”—TIM JO-LAWI 19:18.
“Dhiuru nyime hero jowasiku.”—MATHAYO 5:44.
TIEND HERO DHANO WADU
Ne ane gima Wach Nyasaye wacho e wi hera e 1 Jo-Korintho 13:4-7:
“Hera hore mos kendo ong’won.”
Par ane: Iwinjoga nade sama jomoko hore kodi, ging’won, kendo igi ok wang’ kodi sama itimo gimoro marach?
“Hera onge gi nyiego.”
Par ane: Iwinjoga nade sama jomoko chich kodi kata ginenoni nyiego?
Hera ‘ok many mana gik ma kelone ber owuon.’
Par ane: Iwinjoga nade sama jomoko oikore winjo paro michiwo ma ok giramo ni pachgi e ma nyaka tigo?
Hera ‘ok mak tim marach motimne.’
Par ane: Nyasaye oikore weyo ketho mag joma oloko chunygi. Ndiko Maler wacho kama: “Ok osik komanyo ketho kuom ji, bende, ok okan mirimbe nyaka chieng’.” (Zaburi 103:9) Wabedoga ma mor sama ng’at ma wachwanyo oweyonwa kethowa. Omiyo, wan be onego waikre weyo ne jomamoko kethogi sama gichwanyowa.—Zaburi 86:5.
Hera ‘ok mor gi tim ma ok kare.’
Par ane: Sama gima rach otimorenwa, ok dwaher ni jomamoko onyierwa kata omor gi chandruokwa. Omiyo, wan be ok onego wabed ma mor sama jomamoko chandore kata ka po ni nitie gima rach ma gisegatimonwa.
Ka wadwaro ni Nyasaye oguedhwa, nyaka waher jomamoko kaka onyis e sulani, ma ok wadewo ni gichalo nade. Achiel kuom yore ma wanyalo timogo kamano en konyo joma chandore.
