KA PO ni watni kata osiepni moro osegatho, nyalo bedo ni in be isegawinjo malit kamano. Samoro seche moko iyi wang’ga matek, chunyi chandore, kendo iwinjo ka iluor. Mano nyalo miyo ipenjri ka be owinjore idhi nyime dak e pinyni.

Ng’e ni bedo mokuyo kuom kinde malach bang’ tho watni kata osiepni ok nyis ni iyomyom. Kar mano, onyiso mana kaka nihero ng’atno. Kata kamano, be pod nyalore mondo ikue chunyi e okang’ moro?

Kata obedo ni kuyo ma kamano nyalo nenore ka gima ok nyal rumo, paro ma luwogi nyalo hoyo chunyi:

MIRI THUOLO MOROMO MAR YWAK

Ji ok nyisga kuyo margi e yo machal kata kuom kinde marom. Kata kamano, ywak en yo maber mar tieko lit ma wan-go e chunywa. Vanessa mosewuo kuome motelo wacho kama: “Naywakga to mano e ma ne konya tieko lit ma ne an-go.” Sofía ma bende nyamin-gi notho apoya wacho niya: “Litnaga ka aparo gima notimore. Chalo mana ka gima ng’ato chwero adhonda malit mondo olwoke. Lit ma ng’ato winjo sama ichwerone adhola ok wachre. Kata kamano, omiyo adholano chango.”

NYIS NG’ATO KAKA IWINJO E CHUNYI

Adier, nitie kinde ma diher ni ibed abeda kendi. To ng’e ni lit kod kuyo ma tho kelo en osigo ma ok  onego iigo kendi. Jared ma jahigni 17 ma wuon-gi nosetho wacho kama: “Nanyisoga jomamoko kaka nawinjo e chunya. Ok apar ka weche ma nawacho ne winjore maler, to gima ber en ni wachogi nokonya ahinya.” Janice ma ne osewuo kuome e sula mokwongo wacho ber machielo kowacho niya: “Wuoyo gi jomoko nohoya ahinya. Naneno ni kare nitie joma nong’eyo kaka nawinjo kendo naneno ni nitie joma ne dewa.”

YIE MONDO JOMOKO OKONYI

Laktar moro nowacho niya: “Joma nigi lit moyie mondo wede kod osiepe okonygi sama ng’atgi otho nyagorega maber kata mana e kinde ma litno oduogonegi.” Nyis osiepeni gik ma ginyalo timo mondo gikonyi nikech samoro gidwaro ni gikonyi to gikia kaka gitim.​—Ngeche 17:17.

MED SUDO MACHIEGNI GI NYASAYE

Tina wacho niya: “Ka ne tuo mar kansa onego jaoda, koro ne ok anyal nyise gik ma chanda, omiyo, nanyisoga Nyasaye gik moko duto ma ne chanda. Ka nachiewoga gokinyi, nanyiso Nyasaye mondo okonya e odiechieng’no. Nokonya e yore mang’eny ma kata moko ok anyal wacho.” Tarsha ma ne en jahigni 22 ka ne min-gi otho wacho kama: “Somo Muma pile ka pile e ma ne hoya. Mano ne miyo ayudo weche ma jiwa ma ne anyalo paro bang’e.”

TEM PARO KINDE MA KORO WATNI KATA OSIEPNI OCHIER

Tina medo wacho kama: “Ka ne jaoda eka otho, geno mar chier ne ok ohoya nikech nadwaro neno jaoda to yawuota bende ne dwaro neno wuon-gi gie sechego. Kata kamano, koro higni ang’wen osekalo, to genono e ma amakorago sani. Genono e ma konya pile ka pile. Paro apara ni abiro nene kendo e piny manyien miyo abedo gi kue kod mor mogundho!”

Kuyo ma in-go ok bi rumo aruma dichiel. Kata kamano, gima Vanessa nokaloe nyalo konyi. Owacho kama: “Sama lit oyudi, inyalo paro ni lit ok bi rumo; kata kamano, bang’ kinde ochako rumo mosmos.”

Kata obedo ni bugo ma ng’atno oweyo onge ng’ama nyalo pong’o, pod inyalo dhi nyime dak ka imor. Ka iyie mondo Nyasaye okonyi, pod inyalo bedo gi osiepe mabeyo kendo inyalo bedo gi geno e ngimani. To e kinde mokayo machiegnini, Nyasaye biro chiero wedewa kod osiepewa mosetho. Odwaro ni ikwakgi gi mor kendo. Kae to lit ma in-go e chunyino biro rumo chuth!