Chieng’ moro ka ne Nyaminwa Eliso ma en achiel kuom Joneno mag Jehova odhi puonjo miyo moro Muma e dala miyono, welo moko nopore. Welogo ne gin jatend din moro gi chiege. Eliso nosewinjo motelo ni wuod jatend dinno yande notho​—wuodgi achiel kende!

 Ka ne Eliso ochako hoyo jatend dinno gi chiege e wach tho wuodgino, ne gichako ywak malit ahinya. Kae to jatend dinno nowacho ka iye owang’ niya: “Akia gimomiyo Nyasaye oyie mondo gima kama oyudwa! Ere kaka onyalo kawo wuoda achiel kende? Asetiyo ne Nyasaye kuom higni 28 te, kendo asebedo ka atimo gik mabeyo mang’eny, to mae e kaka onyalo chula! Ang’o momiyo Nyasaye nonego wuoda?”

 Eliso noleronegi ni Nyasaye ne ok okawo wuodgi. Bende, nowuoyo kodgi e wi misango mar Yesu, geno mar chier, kod gimomiyo Nyasaye oweyo mondo gik maricho otimre. Jatend dinno gi chiege nonyiso Eliso ni weche ma noleronegigo nodwoko lambgi.

 Juma ma noluwo, jatend dinno gi chiege nodok e od miyono mondo gin be gipuonjre Muma sama Eliso obiro. Chieng’no, Eliso gi miyono ne puonjore sula ma wiye wacho ni, “Geno Madier Ne Jogo Mihero Mosetho,” e buk miluongo ni Ang’o ma Muma Puonjo Kuom Adier? Jatend dinno gi chiege ne mor ahinya gi puonjruogno, kendo gin be ne gidonjo e mbakano.

 Bang’ kinde, jatend dinno gi chiege ne odhi e chokruok moyiedhi ma ne Joneno mag Jehova otimo Tbilisi e piny Georgia. Ne gimor ahinya ka ne gineno kaka Joneno mag Jehova nigi hera kod winjruok maber, ma gin kido ma ne gisegatemo matek mondo jo kanisagi obedgo, to ne ok onyalore.