Omu mukiko lyakukulwile lizavu lyavaka-kuhehwojola vamukaye kosena kutalisa kukwalumuka alumuka chajingonde. Nge mwafwelela ngwenu kwatwama Tengi uze azakama vatu, kaha awa mazu vahanjikile vaka-kuhehwojola anamyanukisa uhashi wakulipwila uze Kalunga ahaka muvyuma vyakutenga mangana vilitomesenga vivene.

Chipwe ngocho, hakuwana nge vatu vanenyeka chikuma ano mavu, yino pulaneti kayeshi kuhasa kulitomesa iveneko. Mwomwo ika twatela kufwelela ngwetu Kalunga mwakawahisa cheka mavu?

Talenu visoneka vili mulipwata vyakutukafwa tufwelele ngwetu ano mavu nawakelila nakufukila.

• Yino pulaneti yetu vayitengele kuli Kalunga. “Hakuputuka Kalunga atangile melu namavu.”—Kuputuka 1:1

• Kalunga ikiye mwenya yino pulaneti yamavu. “Mavu navyuma vyosena vyatwamaho a vyapwa vyaYehova.”—Samu 24:1.

• Kalunga atengele yino pulaneti yetu mangana yilile. “Wazamisa mavu havihela vyawo. Kaveshi kukawaswenyesako haya myaka namyaka.”—Samu 104:5

• Kalunga ashika ngwenyi hano hapulaneti yetu nahapwanga lika vyuma vyakuyoya. “Kalunga wamuchano, . . . Ou atengele mavu, . . . kawatengele chawanako, oloze awatengele ngwenyi hatwamenga vatu.”—Isaya 45:18

• Kalunga ashika ngwenyi vatu navatwamanga hano hapulaneti yamavu haya myaka yosena. “Vaka-kwoloka navakaheta mavu, kaha navakatwamangaho haya myaka yosena.”—Samu 37:29

Kalunga atenga ano mavu mujila yize nayilingisa vatu valivwise kuwaha kutwamaho chakuzeneka kuwenyeka. Mbimbiliya yahanjikilile chimweza ngwayo Yehova Kalunga, halwola atongolola, mwakafumisako vatu vosena vaze vali nakwenyeka yino pulaneti yetu.—Kusoloka 11:18

Mbimbiliya yatushika ngwayo Kalunga mwakalingisa yino pulaneti kupwa yaulangaji, palachise yamwaza kaha mwakakamununanga mulivoko lyenyi “nakwikuchisa vyuma vyakuyoya vyosena.”—Samu 145:16