Yako kaha kuvihande

Yenu kumitwe yavihande

Vatu Vosena Vasaka Kukapwa naChiyoyelo Chamwaza

Vatu Vosena Vasaka Kukapwa naChiyoyelo Chamwaza

Chiyoyelo muka chize mwafwila kukapwa nacho? Ngana mwavatu vosena, nayenu mwasaka kukapwa nachiyoyelo chamwaza hamwe kaha natanga yenu. Mwasaka kukapwa vakuwahilila, nakupwa vakulikangula, nakutwama mukuunda nakupwa vakufukila.

Chaluvinda, vatu vavavulu veji kuhuhwasananga ngwavo vyuma vyamwaza vafwila kukapwa navyo kavyeshi kukatesamoko. Vanamono omwo vyuma vyakwiza mukukasumuna vinenyeka chiyoyelo chavatu, nakuneha uhutu nakujiha vatu vavavulu. Chakutalilaho chimwe shina musongo waCOVID-19. Echi chavalingisa valizakamine ngwavo kaveshi kukapwa nachiyoyelo chamwazako.

Hakuwana nge vatu kavatachikiza omwo nachikapwa chiyoyelo chavoko, vali jino nakutondatonda chuma chize nachivakafwa vakapwe nachiyoyelo chamwaza. Vatu vamwe vashinganyeka ngwavo nge mutu atwama naluvinda, kaha keshi kuhasa kupwa nachiyoyelo chamwazako. Veka nawa vahaka mangana kukutanga mashikola nakutonda luheto mwomwo vashinganyeka ngwavo navikavakafwa vakawane vyuma vali nakusaka. Veka nawa vashinganyeka ngwavo kupwa namuchima wamwaza chikiko kaha nachivakafwa vapwenga nachiyoyelo chamwaza.

Kutala vyuma kana vinahase kumikafwa mukapwe nachiyoyelo chize mwasaka tahi? Shinganyekenu havihula vino muwane mwakukumbulwila chihula kana:

  • Uno chiyoyelo chenu chakulutwe chapendamina haka?

  • Uno shikola najimbongo vinahase kuneha chiyoyelo chamwaza tahi?

  • Uno kupwa namuchima wamwaza chinahase kumilingisa mukapwe nachiyoyelo chamwaza tahi?

  • Kulihi munahase kuwana chuma chize nachimikafwa mukapwe nachiyoyelo chamwaza?

Yino mangazini yaKaposhi Kakutalila nayimikafwa muwane mwakukumbulwila vihula kana.