•  Mêyi a mbangilu 2

•  Biuma bia mu Dîyi dia Nzambi 3-5

  •  Muyuki 3

  •  Bubanji bua mu Dîyi dia Nzambi 4

  •  Dibala dia Bible 5

•  Difila ku mudimu wa buambi 6-14

  •  Mua kubanga kuyukila ne muntu 7

  •  Dipinganyina muntu 8

  •  Divuija bantu bayidi 9

  •  Umvuija malu audi witabuja 10

  •  Muyuki 11

  •  Muaba wa kupetela malu 12

  •  Kadre ka mudimu 13

  •  Dienza mudimu ne video ne mikanda 14

•  Tuikalayi ne nsombelu wa buena Kristo 15-16

  •  Dilonga dia Bible dia tshisumbu 16

•  Mêyi a ndekelu 17

•  Diela balongi kalumbandi ne dibabela 18

•  Dîba dikosa 19

•  Dikumbula dia mutangidi wa tshijengu 20

•  Lumingu lua mpuilu anyi mpungilu 21

•  Lumingu lua Tshivulukilu 22

•  Mutangidi wa tshisangilu tshia Nsombelu ne mudimu wetu 23

•  Mulombodi wa tshisangilu tshia Nsombelu ne mudimu wetu 24

•  Mufidi wa mibelu muambuluishi 25

•  Tulasa tukuabo 26

•  Filme 27

1. Malu a kulonda adi mu mukanda eu neambuluishe muntu yonso udi ne mudimu wa kuenza mu tshisangilu tshia Nsombelu ne mudimu wetu. Yonso wa kudibu udi ne bua kutangilula malu a kulonda bua midimu adi mu Mabeji a tshisangilu tshia Nsombelu ne mudimu wetu wa buena Kristo ne mu mukanda eu kumpala kua kulongolola mudimu wende wa kuenza. Mbimpe kulomba bamanyishi bonso bua bikale badilongolola bua kuenza midimu ya balongi. Bantu bakuabu bakadi badifile bikole mu dibuela pa tshibidilu mu bisangilu bia tshisumbu badi mua kuyenza pabu bikalabu bitaba malongesha a mu Bible ne bikala nsombelu wabu upetangana ne mikenji ya buena Kristo. Mutangidi wa tshisangilu tshia Nsombelu ne mudimu wetu udi ne bua kuyukila ne muntu yonso udi kayi mumanyishi ne uleja dijinga dia kudifundisha (bua kuenza midimu ya balongi), pashishe amanyishe muntu eu bikalaye ukumbaja malu malombe anyi kayi muakumbaje. Udi ne bua kumuleja bualu ebu mu mêsu a mulombodi wa dilonga diende dia Bible (anyi a muledi wende udi Ntemu). Malu malomba nga momumue ne atubu bakonkonona ne muntu bua kuluaye mumanyishi udi kayi muanji kubatijibua.—od nshap. 8 tshik. 8.

2. Munite umue. Lumingu luonso, panyima pa musambu ne disambila bia ntuadijilu, mulombodi wa Tshisangilu tshia Nsombelu ne mudimu wetu neafile kadiosha ka malu adi mu programe wa dituku adi. Neatambe kuimanyina pa malu adi mua kuambuluisha tshisumbu bikole.

 3. Muyuki: Minite 10. Mbafile tshiena-bualu ne plan wa malu manene 2 anyi 3 mu Mabeji a tshisangilu tshia Nsombelu ne mudimu wetu. Muyuki eu ngua kupesha mukulu anyi musadidi wa mudimu udi mukumbane. Programe wa dibala dia Bible dia lumingu alu yeye wa kutuadija mukanda mupiamupia wa mu Bible, nebelele tshisumbu kafilme kadi kumvuija malu a mukanda au. Ngamba-malu udi mua kuleja mudi kafilme aku kapetangana ne tshiena-bualu tshia muyuki. Kadi, udi ne bua kuikala mushindike ne: neumvuija malu manene adibu baleje mu mabeji a tshisangilu au onso. Kabidi, udi ne bua kuenza mudimu bimpe ne bimfuanyi, bidi bielamu bua kukumbajija ngenyi ku malu adi ne bua kulongeshibua. Udi mua kutela malu adibu baledile miaba mikuabu owu ambuluisha bua kumvuija bimpe ngenyi idi mu plan.

 4. Bubanji bua mu Dîyi dia Nzambi: Minite 10. Etshi ntshitupa tshia nkonko ne mandamuna tshienzabu kakuyi mêyi a mbangilu anyi a ndekelu to. Ntshia kuenzabu anu kudi mukulu anyi musadidi wa mudimu mukumbane. Ngamba-malu udi ne bua kuela bateleji nkonko yonso ibidi idimu. Kabidi bua mvese idibu bafile, yeye udi mua kumona ni mbikumbane anyi ni ki mbikumbane bua kuyibadisha. Bantu batelaye nebandamune mu sekonde 30 anyi muinshi.

 5. Dibala dia Bible: Minite 4. Mudimu eu nebawenze kudi mulongi udi muntu mulume. Mulongi neabale tshitupa tshidibu bamupeshe kayi wamba bualu bukuabu ku ntuadijilu anyi ku ndekelu to. Mulombodi wa tshisangilu neaditatshishe nangananga bua kuambuluisha balongi bua bikale babala malu majalame, mumvuike bimpe, mabala ne mbadilu mupepele, bashindika miaku bimpe, bashintulula dîyi, bikisha miaba idibi bikumbanyine, ne babala bu mutubu bakula pa tshibidilu. Mu bitupa bia kubala abi kudi bidi bile ne bidi bîpi, nanku mbimpe mutangidi wa tshisangilu tshia Nsombelu ne mudimu wetu atabalele wa kupesha mudimu au padiye wenda wabanya midimu.

6. Minite 15. Tshitupa etshi ntshilongolola bua kupetesha bantu bonso mushindu wa kudibidija ku mudimu wa buambi ne kupiluka mu mushindu wa kubanga muyuki ne bantu ne kulengeja nyishilu ne ndongeshilu wabu. Biobi bikengedibua, badi mua kupesha bakulu midimu ya balongi. Mulongi yonso udi ne bua kuenza mudimu wende mushindamene pa dilonga dia mu broshire wa Dilongesha anyi wa Nanga bantu didibu bela mu tuboko ku luseke lua mudimu wa balongi mu Mabeji a tshisangilu tshia Nsombelu ne mudimu wetu. Imue misangu nebalongolole tshimue tshitupa bua kuenzekatshi mu diyukidilangana. Tshitupa etshi ntshiakuenzabu kudi mukulu anyi musadidi wa mudimu udi mukumbane.—Tangila  tshikoso tshia 15 tshidi tshileja mua kulombola midimu ya diyukidilangana.

 7. Mua kubanga kuyukila ne muntu: Mudimu wa balongi eu badi mua kuwenza kudi mulongi muntu mulume anyi mulongi muntu mukaji. Mumuyukidishi udi ne bua kuikala mulume nende anyi mukaji nende, peshi muena mu dîku diabu. Mulongi ne mumuyukidishi wende badi mua kuenza mudimu wabu basombe anyi bimane kuulu.—Bua kumanya malu a bungi pa bidi bitangila muaba wa kupetela malu ne kadre ka mudimu, tangila  tshikoso tshia 12 ne tshia  13.

 8. Dipinganyina muntu: Mudimu wa balongi eu badi mua kuwenza kudi mulongi muntu mulume anyi mulongi muntu mukaji. Mumuyukidishi udi ne bua kuikala mulume nende anyi mukaji nende. (km 6/97 dib. 2) Mulongi ne mumuyukidishi badi mua kuenza mudimu wabu basombe anyi bimane kuulu. Mulongi udi ne bua kuenza dinaya didi dileja tshia kuamba patudi tupinganyina muntu utuvua bayukile nende musangu mushale—Bua kumanya malu a bungi pa bidi bitangila muaba wa kupetela malu ne kadre ka muyuki, tangila  tshikoso tshia 12 ne tshia  13.

 9. Divuija bantu bayidi: Mudimu wa balongi eu badi mua kuwenza kudi mulongi muntu mulume anyi mulongi muntu mukaji. Mumuyukidishi udi ne bua kuikala mulume nende anyi mukaji nende. (km 6/97 dib. 2) Mulongi ne mumuyukidishi badi mua kuenza mudimu wabu basombe anyi bimane kuulu. Tshitupa etshi ndinaya didi dileja tshitupa tshia dilonga dia Bible ditu dikadi dienzeka pa tshibidilu. Kabiena bilomba kutuadija ne mêyi a mbangilu anyi kujikija ne a nkomenu to, anu bobu balombe mulongi bua kutumikila dilonga didi dimulomba bua kuenza nanku. Kabiena bikengela anu kubadisha bikoso bionso ne dîyi dikole to, nansha mudibi mua kuenzeka nanku misangu mikuabu.

 10. Umvuija malu audi witabuja: Bobu baleje bua kuenza mudimu wa balongi eu bu muyuki, badi ne bua kuwenza kudi mulongi muntu mulume. Bobu baleje bua kuwenza bu dinaya, badi mua kuwenza kudi mulongi udi muntu mulume anyi mulongi udi muntu mukaji. Mumuyukidishi udi ne bua kuikala mulume nende anyi mukaji nende, peshi udi ne bua kuikala muena mu dîku diabu. Mulongi udi ne bua kufila diandamuna ditokesha menemene ne mbabi ku lukonko lua tshiena-bualu pa kuenza mudimu ne malu adi mu mukanda udibu baledila malu a kuamba. Mulongi udi ne budikadidi bua kuamba bua kutangila mukanda udibu bafile padiye wenda wenza mudimu wa balongi eu.

 11. Muyuki: Mudimu wa balongi eu ngua kupesha mulongi udi muntu mulume ne kuwenza bu muyuki muenzela tshisumbu. Bikale muyuki muashila pa bualu bua mu tshisakidila tshia A tshia broshire wa Nanga bantu, mulongi udi ne bua kuzangika patoke mua kutumika mu mudimu wa buambi ne mvese udimu anyi idimu. Tshilejelu, udi mua kumvuija dîba kayi dia kuenza mudimu ne mvese au, tshidi mvese eu umvuija, ne mushindu wa kuelangana meji ne muntu pa mvese eu. Bikale muyuki muashila mu tshitupa kampanda tshia ku dimue dia ku malonga a mu broshire wa Nanga bantu, mulongi udi ne bua kushindamena pa mushindu wa kutumikila malu adimu mu mudimu wa buambi. Udi mua kuzangika tshilejelu tshidi mu dilongesha dia 1 anyi kuzangika bualu kayi bonso bua mu mvese mikuabu idibu bafila mu dilongesha edi, pikalabi biambuluisha.

   12. Muaba wa kupetela malu: Malu adi mu tshikoso etshi ne tshidi tshilonda nga kutumika nawu mu mudimu wa balongi wa “Mua kubanga kuyukila ne muntu” ne wa “Dipinganyina muntu”. Anu bobu baleje tshikuabu tshia kuenza, tshipatshila tshia mulongi ntshia kufila bulelela bua mu Bible mu mushindu mupepele bilondeshele tshidi muntu udibu bayukila nende ne kuasa tshishimikidi bua diyukidilangana musangu ulualua. Mulongi udi ne bua kusungula tshiena-bualu tshidi bantu batamba kuakula matuku adi panshi aa ne tshiakanyine muaba unudi. Udi mua kusungula bikalebi biakanyine anyi kabiyi biakanyine bua kuleja mukanda kampanda anyi video kansanga wa mu Bintu bietu bia kulongesha nabi. Pamutu pa kuenza dileja dikuata muaku ku muaku mu mutu, balongi badi ne bua kudibidija mu diyukidilangana ne bantu, pa kuleja mudibu batabalela bayukidijangayi nabu peshi bateleji ne kuikala kuyukila bu pa tshibidilu.

   13. Kadre ka mudimu: Mulongi udi ne bua kuenza bua kadre idibu bafile apetangane ne nsombelu idi muaba unudi. Tshilejelu:

1.  1) Bumanyishi bua ku nzubu ne ku nzubu: Kadre aka kadi kakongoloja diyisha ku tshîbi ne tshîbi—bidi mua kuikala diyukila ne muntu mpala ne mpala, ku telefone, anyi ku difundilangana mukanda—ne dipinganyina muntu unuvua bayukile nende musangu mushale mu buambi bua ku nzubu ne ku nzubu.

2.  2) Bumanyishi bua padi mpunga umueneka: Kadre aka kadi kumvuija kubabidila mishindu idi imueneka pa kubuelela mu muyuki wa malu a tshianana ne kutuadija muyuki ne bantu bua kubayisha. Bidi mua kukongoloja dibadila bantu baudi upetangana nabu mvese ku mudimu, mu kalasa, ku mutumba kuebe, mu bise anyi mu tudiendelandela tukuabu tua tshinsangansanga, anyi muaba kayi wonso uudi uya bua midimu yebe ya ku dituku ne dituku.

3.  3) Bumanyishi mu miaba idi bantu ba bungi: Kadre aka kadi mua kukongoloja diyisha ne kaditempu ka kulejela mikanda bua kuyisha, diyukila ne bantu mu miaba ya bungenda-mushinga, bumanyishi bua mu njila, bumanyishi bua mu park, mu miaba itubu bimanyikila tudiendelandela, anyi muaba kayi wonso utudi mua kupeta bantu ba bungi.

 14. Dienza mudimu ne video ne mikanda: Bilondeshile nsombelu ikalaku, mulongi udi mua kusungula bua kuleja video anyi kufila umue wa ku mikanda. Bikala mu mudimu wa balongi muikale video wa kuleja anyi mulongi yeye musungule bua kuakula bua video kampanda, udi ne bua kuamba bua kutangila video au ne kuyukidilanganapu, kadi kamuedi to.

15. Padi musambu ujika, minite 15 idi ilonda ya tshitupa etshi neyikale mishindamene pa mudimu umue anyi ibidi milongolola bua kuambuluisha bateleji bua kutumikila Dîyi dia Nzambi. Bobo kabayi baleje tshiakuabu tshia kuenza, nebenze midimu eyi kudi bakulu anyi kudi basadidi ba mudimu badi bakumbane, pa kumbusha majinga a tshisumbu ikalabu ne bua kuenza anu kudi mukulu. Bobo baleje bua kuenza mudimu kampanda mu diyukidilangana ne bateleji, muanetu udi uulombola udi mua kuela nkonko mikuabu kusakidila ku idibu baleje bua kuela mu tshitupa atshi. Udi ne bua kudienzeja bua mêyi ende a mbangilu ikale mîpi bua kulama dîba dia kukonkonona malu manene ne kushila bateleji dîba dia kuakulabu. Bobo balongolole bua kuela muntu nkonko, muntu au udi ne bua kuikala ku tshiakuidi, koku mushindu, pa mutu pa kuakula musombele mu bateleji bonso.

  16. Dilonga dia Bible dia tshisumbu: Minite makumi asatu. Mudimu eu nguakuenzabu anu kudi mukulu udi mukumbane. (Miaba idi bakulu bungi bushadile, badi mua kuwupesha nansha basadidi ba mudimu badi bakumbane biobi bikengedibua.) Kasumbu ka bakulu ke kadi ne bua kusungula bantu badi bakumbane bua kulombola Dilonga dia Bible dia tshisumbu. Bantu badi bakulu banyishila ngaba bikale mua kulombola dilonga mu mushindu muimpe bua kudijikija pa dîba, kushindika mushinga wa mvese minene, ne kuambuluisha bantu bonso bua kujingululabu dikuatshisha dia malu adibu balonge. Aba badibu basungule nebamanye tshia kuenza pa kutangilula buludiki budibu bapatule budi buleja mua kulombola midimu idi yenzeka mu nkonko ne mandamuna. (w23.04 dib. 24, kazubu) Panudi nujikija kulonga malu a kulonga bua lumingu alu, kabiena bikengela kulepakaja dilonga to. Koku mushindu, nudi ne bua kushintulula balombodi ba dilonga edi ne babadi lumingu lonso. Mulombodi wa tshisangilu tshia Nsombelu ne mudimu wetu yeye mulombe bua kuipidijabu dîba didi dilonga edi dikosela, apu mulombodi wadi neakebe mushindu wa kudipidija. Udi pamuapa nansha mua kusungula bua kubenga kubadisha bimue bikoso.

17. Minite isatu. Mulombodi wa tshisangilu tshia Nsombelu ne mudimu wetu neambulule nangananga malu adi ne dikuatshisha anudi nufuma ku dilonga mu tshisangilu. Neafile kabidi kadiosha ka malu a lumingu ludi lulonda. Bikalaku dîba, udi mua kutela mêna a balongi bikala ne midimu lumingu ludi lulonda. Koku kakuyi bualu bukuabu buleja, mulombodi udi ne bua kubadila tshisumbu mamanyisha onso a mushinga ne mikanda yonso ya mushinga mu mêyi ende a ndekelu. Mamanyisha a pa tshibidilu (bu mudi a programe wa mudimu wa buambi wa pa tshibidilu ne programe wa malu a diteka mankenda) ki nga kumanyisha kumpala kua tshisumbu to, kadi nga kulamika ku tshibasa tshia mamanyisha. Bikala dîba difuane kupangika dia kubala mamanyisha anyi mikanda mu minite idibu bashiye bua mêyi a ndekelu, mulombodi udi ne bua kulomba bana betu badi ne midimu mu tshitupa tshia Tuikalayi ne nsombelu wa buena Kristo bua bipidijaku midimu yabu bu mudibi bikengela. (Tangila  tshikoso tshia 16 ne tshia  19.) Tshisangilu etshi netshijike ne musambu ne disambila.

18. Panyima pa mudimu wa mulongi yonso, mulombodi wa Tshisangilu tshia Nsombelu ne mudimu wetu udi ne sekonde bungi buipatshila ku 60 bua kuela mulongi yonso kalumbandi ne kumupesha mibelu miangatshila mu kanungu ka dilongesha kadibu bafile. Padi mulombodi utela mudimu wa mulongi, kena ne bua kumanyisha dilonga diatumikilaye to. Kadi udi pamuapa mua kumanyisha dilonga adi padi mulongi ujikija, ne panyima pa yeye mumane kumuela kalumbandi. Udi mua kuleja kabidi malu adi ajadika ne: mulongi mmutumikile mibelu ya mu dilonga adi bimpe anyi kumvuija ne bulenga buonso bua tshinyi mulongi udi ne bua kutabalela dilonga adi ne mushindu udiye ne bua kuenza nanku. Mulombodi udi pamuapa mua kuakula kabidi bua malu makuabu adi mamueneke mu mudimu au bikalaye mumone ne: adi mua kuambuluisha mulongi anyi bateleji. Padi bisangilu bijika anyi dîba dikuabu, udi mua kupesha mulongi mibelu mikuabu pankayende ya mu broshire wa Nanga bantu, broshire wa Dilongesha anyi mu mukanda wa Kalasa ka Mudimu idi itangila dilonga divuabu bamulombe bua kutumikila.—Bua kumanya malu makuabu a mudimu wa mulombodi wa Tshisangilu tshia Nsombelu ne mudimu wetu ne wa mufidi wa mibelu muambuluishi, tangila  tshikoso tshia 19,  24, ne tshia  25.

19. Mudimu nansha umue anyi mibelu idi mulombodi wa Tshisangilu tshia Nsombelu ne mudimu wetu ufila kabipitshi pa dîba didibu babikosele to. Nansha mudibu baleje dîba didibu bakosele tshitupa tshionso mu Mabeji a tshisangilu tshia Nsombelu ne mudimu wetu, kabiena bikengela kusakidila malu makuabu bua kulepesha dîba pikala malu onso mamba bimpe mu minite mishadile ku idibu bakosele mudimu au to. Bikalabu bapitshishe dîba dikosela midimu kampanda, badi ne bua kufila mibelu ya pankaya kudi mulombodi wa tshisangilu tshia Nsombelu ne mudimu anyi kudi mufidi wa mibelu muambuluishi. (Tangila  tshikoso tshia 24 ne tshia  25.) Tshisangilu tshijima, kusangisha ne misambu ne masambila, tshidi ne bua kuenza dîba dimue ne minite 45.

20. Mu lumingu lua dikumbula dia mutangidi wa tshijengu bisangilu nebienzeke anu mudibi bifunda mu Mabeji a tshisangilu tshia Nsombelu ne mudimu wetu, kadi nekuikale dishilangana edi: Mutangidi wa tshijengu neenze muyuki wa mudimu mu minite 30 pa muaba wa Dilonga dia Bible dia tshisumbu didi mu tshitupa tshia Tuikalayi ne nsombelu wa buena Kristo. Kumpala kua muyuki wa mudimu, mulombodi wa Tshisangilu tshia Nsombelu ne mudimu wetu neambulule malu adibu balonge dituku adi, neafile kadiosha ka malu a mu programe wa lumingu lualonda, neafile mamanyisha adi akengela kufila, neabale mikanda yonso idi ikengela kubala, pashishe neabikile mutangidi wa tshijengu bua muyuki wa mudimu. Panyima pa muyuki, mutangidi wa tshijengu neajikije bisangilu ne musambu wikalaye musungule. Udi mua kubikila muntu mukuabu bua kuela disambila dia ndekelu. Mu dikumbula dia mutangidi wa tshijengu, kakuakuenzeka tulasa tukuabu mu muakulu wa tshisumbu to. Kasumbu ka muakulu muenyi kadi mua kuenza koku bisangilu biaku nansha padi mutangidi wa tshijengu ukumbula tshisumbu tshidiku kadisangishila. Tshidibi, bena mu kasumbu aku badi ne bua kupingana bua kudisanga ne tshisumbu tshijima bua kulonda muyuki wa mudimu wa mutangidi wa tshijengu.

21. Mu lumingu elu kakuakuikala bisangilu to. Malu a kulonga mu bisangilu lumingu alu nga muntu yonso kulonga pa nkayende anyi mu dîku.

22. Tshivulukilu tshiotshi tshienzeka dituku dia munkatshi mua lumingu, Tshisangilu tshia Nsombelu ne mudimu wetu katshiakuikalaku to.

23. Kasumbu ka bakulu nekasungule mukulu bua kuikalaye mutangidi wa tshisangilu etshi. Neikale utangila malu bua tshisangilu etshi tshilongolodibue bimpe ne tshienzeke bilondeshile mêyi a kulonda aa. Udi ne bua kuikala uyukidilangana bimpe ne mufidi wa mibelu muambuluishi. Padi anu Mabeji a tshisangilu tshia Nsombelu ne mudimu wetu a ngondo kampanda apatuka, mutangidi wa Tshisangilu tshia Nsombelu ne mudimu wetu abanyine balongi midimu ya munkatshi mua ngondo ibidi. Mbuena kuamba ne: midimu ya balongi, idi kayiyi ya balongi, ne bana betu ba balume balombola tshisangilu mu aba badi kasumbu ka bakulu kanyishile (Tangila  tshikoso 3-16 ne tshia  24.) Padiye wabanya midimu ya balongi, udi ne bua kuikale ne nsombelu wa mulongi mu lungenyi, mmumue ne: bidimu biende bia diledibua, dimonamona diende dia malu, dipiluka bua kuakula bipepele tshiena-bualu kampanda. Neikale ne busunguluji bua momumue padiye wabanya bitupa bikuabu bia tshisangilu. Nebamanyishe bonso badi ne midimu mbingu, yoyi mikese ikale mitue nansha ku isatu kumpala kua dituku dia kuyenza. Bapeshe balongi midimu yabu ku diambuluisha dia kabeji ka Mudimu wa mu tshisangilu tshia Nsombelu ne mudimu wetu wa buena Kristo (S-89). Mutangidi wa tshisangilu tshia Nsombelu ne mudimu wetu udi ne bua kutabalela bua dibeji didi ne ndongamu wa tshisangilu dikale dilamika ku tshibasa tshia mamanyisha. Kasumbu ka bakulu kadi mua kumupesha mukulu mukuabu anyi musadidi wa mudimu kampanda bua kumuambuluishaye. Kadi, bakulu ke badibu ne bua kusungula bua kufila midimu idi kayiyi ya balongi to.

24. Ku lumingu luonso, mukulu umue neikale mulombodi wa Tshisangilu tshia Nsombelu ne mudimu wetu tshionso tshijima. (Mu bisumbu bidi ne bakulu bungi bushadile, badi mua kupesha nansha basadidi ba mudimu badi bakumbane mudimu eu pikalabi bikengedibua.) Yeye ke udi ne bua kudilongoluela mêyi a mbangilu ne a ndekelu. Yeye ke udi ubikila kabidi bonso badi ne midimu mu bitupa bionso, ne pikala bakulu kabayi ba bungi mu tshisumbu, udi mua kuenza pende midimu mikuabu kabidi, nangananga midimu idi ilomba anu bua kuleja filme patupu kakuyi bualu bua kuyukidilangana. Mêyi adiye wakula pankatshi pa mudimu ne mudimu wonso mbimpe aambe mu tshikoso menemene. Kasumbu ka bakulu nekakebe mua kusungula bakulu badi bakumbane mua kuenza mudimu eu. Bakulu bakumbane badibu basungula abu nebikale balombodi ba tshisangilu etshi, muntu ne muntu tshiende tshikondo. Bilondeshile mudi tshisumbu tshienu, mutangidi wa Tshisangilu tshia Nsombelu ne mudimu wetu udi mua kulombola tshisangilu etshi misangu ya bungi kupita bakulu bakuabu badi bakumbane. Bikala mukulu kampanda mukumbane bua kulombola Dilonga dia Bible dia tshisumbu, udi mua kuikala kabidi mukumbane bua kulua mulombodi wa tshisangilu etshi. Kadi numanye ne: mukulu udi mulombodi nanku, mbamulombe bua kuela balongi badi benza midimu kalumbandi ne dinanga dionso ne bua kubapesha mibelu idi mua kubambuluisha, biobi bikengedibua. Mulombodi udi kabidi ne bua kuenza bua tshisangilu tshijike pa dîba. (Tangila  tshikoso 17 ne tshia  19.) Bikala mulombodi musue, ne muaba wowu kuoku mukumbane, badi mua kumutekela mikro mikuabu kumpala aku bua ikale uleja mudimu wonso udi ulonda, padi eku muena mudimu au wenda uya bua kuimana ku tshibasa tshidi ku tshiakuidi. Bia muomumue, mulombodi udi mua kujinga bua kusombela ku mêsa matekela ku tshiakuidi padi mulongi wenza mudimu wa Dibala dia Bible ne mu tshitupa tshia Difila ku mudimu wa buambi. Abi bidi mua kuambuluisha bua kubenga kudia dîba.

25. Kuoku mushindu, mbimpe kupesha mukulu udi ngamba-malu ukadi mumonemone malu mudimu eu. Mudimu wende ngua kupesha bakulu ne basadidi ba mudimu mibelu muntu pa nkayende padibi bikengedibua bua midimu yonso idibu benza mu bisangilu, bu mudi ya bitupa bia mu Tshisangilu tshia Nsombelu ne mudimu wetu, miyuki ya patoke, ne dibala anyi dilombola dia Dilonga dia Tshibumba tshia Nsentedi, peshi Dilonga dia Bible dia tshisumbu. (Tangila  tshikoso tshia 19.) Bikalaku bakulu ba bungi badi balongeshi ne bangamba-malu bapiluke mu tshisumbu, badi mua kuenza bua ku tshidimu tshionso mukulu kampanda mukumbane enze pende mudimu eu. Kabiena anu bikengela ikale ufila mibelu panyima pa mudimu wonso to.

26. Bilondeshile bungi bua balongi, tshisumbu tshidi mua kulongolola tulasa tukuabu bua balongi kuenzamu midimu. Nudi ne bua kuteka mufidi wa mibelu mukumbane mu kalasa konso, nangananga mukulu. Biobi bikengedibua, nudi mua kutekamu nansha musadidi wa mudimu udi mukumbane. Kasumbu ka bakulu ke kasungula muntu udi mukumbane bua kuenza mudimu eu ne kumona ni bidi bikengela ikale ushintulukangana ne bantu bakuabu. Mufidi wa mibelu eu neaye ne malu anu mudibu baumvuije mu  tshikoso tshia 18. Kuoku kuikale tulasa tukuabu, nulombe balongi badimu ne midimu bua kuyamu panudi nujikija mudimu wa Bubanji bua mu Dîyi dia Nzambi wa mu tshitupa tshia Biuma bia mu Dîyi dia Nzambi. Nebapingane mu tshibambalu tshinene panyima pa mudimu wa mulongi wa ndekelu.

27. Nekuikale filme kampanda ya malu a mu tshisangilu etshi. Nenuikale nupetela filme ya tshisangilu tshia munkatshi mua lumingu eyi mu JW Library^®, ne kuyimona ku diambuluisha dia biamu bishilashilangane.

© 2023 Watch Tower Bible and Tract Society of Pennsylvania

S-38-SH 11/23