Jairo uvua muledibue ne disama dia mu buongo didibu babikila ne: Tétraplégie spastique. * Disama edi didi dimupangisha bua kunyungisha bitupa binene bia mubidi wende. Buongo buende kabuena ne bukole bua kusaka mubidi wende bua kuenza bualu kampanda, bidimba biende bidi bileba. Imue misangu, dinyungakanangana dia mubidi wa Jairo ditu dimufikisha ku ditapika mputa. Bitu kabidi bisama bantu ba mu nyungulukilu wetu badi kabayi bamumanye ku muoyo. Bia dibungama, maboko ne bibelu biende bitu misangu yonso anu bisuikila ku kakalu bua kuepuka njiwu ya nunku.

Bivua lutatu lua bungi pavua Jairo wenda ukola. Pavuaye ne ngondo isatu, wakatuadija kupeta disama dia mpalu divua dimufikisha ku ditalala mubidi bienze bu mufue. Misangu ya bungi maman uvua umuambula, umukongoloja unyema nende mutangile ku lupitadi, wela meji ne: mmufue.

Bu muvuaye umuambula misangu yonso nanku, mu bungi bua matuku mifuba ya Jairo yakakonyangala. Pavuaye ne bidimu 16, tshikundukundu tshiende tshiakapampalamuka ne bivua bilomba kumupanda bua kuakaja bimpe tshimono ne mufuba wa tshibelu tshiende. Ntshidi anu mvuluka muvua Jairo udila butuku buonso pavuaye mu bulalu bua disama.

Bua bubedi ebu, bivua bikengela ne: bua Jairo kudia, kuvuala bilamba ne kulala, bantu bakuabu bamuambuluishe. Tatu ne mamu ke bavua bamuambuluisha mu malu aa. Nansha mudibi bikengela misangu yonso kumuambuluisha mu malu aa, baledi betu batu bamuvuluija ne: kena ne muoyo anu bua bantu nkayabu kadi bua Nzambi kabidi.

Baledi betu m’Batemu ba Yehowa, bakatuadija kubadila Jairo miyuki ya mu Bible anu patshivuaye muana wa mu maboko. Batu bamanye ne: nsombelu wa muntu udi ne mushinga wa bungi padiye mu malanda mimpe ne Nzambi. Jairo uvua mu lutatu bua mubidi wende uvua mutekete uvua utungunuka anu ne kuleba, kadi uvua ne ditekemena dinene bua matuku atshilualua. Nunku, baledi betu bavua batamba kudiebeja bikala Jairo mua kumvua bulelela bua mu Bible.

Dimue dituku patshivua Jairo muana, papa wakamuambila ne: “Jairo, udiku mua kuakula nanyi anyi?” Kuambaye kabidi ne: “biwikale munnange, ngakuisha koku!” Bu muvua papa umusengelela bua kuambaye  nansha muaku umue, Jairo wakapuekesha binsonji. Nansha muvuaye udienzeja bua kuakula ne miaku bua kumvuija muvuaye udiumvua, kadi dîyi diende kadivua anu dipatuka bimpe to. Biakanyingalaja papa bikole bua muvuaye mudidishe Jairo. Kadi tshivua Jairo muenze atshi tshiakaleja ne: uvua mumvue malu avua papa wamba. Tshilumbu tshivua ne: kavua mua kuakula to.

Kumpala, baledi betu bavua bajingulule ne: Jairo uvua imue misangu wabakaja mêsu pavuaye usua kuamba bualu ne bua kuleja muvuaye udiumvua. Bivua bitonda Jairo bikole pavua bantu kabayi bumvua bimpe tshivuaye usua kuamba. Kadi pakatuadija baledi betu kumvua tshivua mêsu ende asua kuamba ne bamupesha tshivuaye ukeba, Jairo uvua utua mimuemue. Ke uvua wende mushindu wa kuamba ne: tuasakidila.

Munganga mukuabu wakatupesha lungenyi wamba ne: bua kuyukila nende bimpe, bidi bikengela kuela bianza bionso bibidi muulu paudi umuela lukonko lua kuandamunaye ne: eyowa anyi tòo. Tshianza tshia balume tshidi tshiumvuija eyowa ne tshia bakaji tòo. Nunku, padiye utangila tshianza tshimue udi uleja tshidiye musue.

Bantemu ba Yehowa batu benza mpuilu ne mpungilu misangu isatu ku tshidimu, mudibu benzela bantu ba bungi miyuki ya malu a mu Bible. Misangu yonso ivuabu benza miyuki ya ntambu, Jairo uvua usanka bikole. Dimue dituku pavuaye ne bidimu 16, tatu wakamuebeja ne: “Jairo, udi musue pebe kutambula anyi?” Diakamue, wakatangila tshianza tshia balume tshia tatu ne muoyo mujima bua kuleja muvuaye musue kutambula. Pashishe papa wakamuebeja kabidi ne: “Ukadiku muambile Yehowa mu disambila dijinga diebe dia kumuenzela mudimu bua kashidi anyi?” Jairo wakatangila kabidi buludiludi tshianza tshia balume tshia papa. Bivua bimueneka patoke ne: Jairo ukavua mumane kudilambula kudi Yehowa.

Pakakonkononabu nende malu a mu Bible misangu ya bungi, bakamona ne: Jairo uvua mumvue bimpe tshidi ntambu ya bena Kristo yumvuija. Nunku mu 2004, wakandamuna ku lukonko lua mushinga mukole luvuabu batamba kumuela lua ne: “Ukadi mudilambule kudi Nzambi bua kuenza disua diende anyi?” Jairo wakatangija mêsu ende muulu bua kuandamuna lukonko elu. Ke mushindu uvuaye mulongolole bua kuandamuna ne: eyowa. Nunku, wakatambula ne bidimu 17, kuluaye Ntemu wa Yehowa.

Mu 2011, Jairo wakapeta mushindu mupiamupia wa kuakula ku diambuluisha dia ordinatere wa dîsu. Tshiamu etshi tshidi tshilonda mushindu udi kamonyi ka dîsu kanyunga bua kutua pa tumanyinu tudi mu ordinatere. Padiye upodia, mbienze anu bu udi utua pa mpuku (souris) wa ordinatere. Uvua ne katablo kavua  kenza ne tumanyinu tudi tuleja miaku anyi biambilu bua kumuambuluisha bua kuakula. Padiye upodia pa kamanyinu kamue, ordinatere udi ukudimuna miaku idi ipatuka bua yumvuike mu mêyi.

Bu muvua dimanya dia Jairo dia Bible dienda dikola, dijinga diende dia kuambuluisha bakuabu mu malu a Nzambi divua padi dienda dikola. Patudi tuenza ntendelelu wetu wa mu dîku, Jairo utu misangu ya bungi utapa dîsu kundi lua panyima ne utangila mu ordinatere wende. Utu wenza nunku bua kumvuluija ne: ndi ne bua kumufundila mandamuna a kufilaye patudi tuenza tshitupa tshia nkonko ne mandamuna mu bisangilu bia tshisumbu.

Mu bisangilu, utu ukeba ne lutulu luonso bua kutua pa kamanyinu kakumbanyine mu ordinatere, pashishe dîyi didi dipatuka mu ordinatere ne bantu bonso badiumvua. Utu utua mimuemue ne disanka dionso patuye ukankamija bena mu tshisumbu mu mushindu eu. Alex mulunda wa Jairo udi wamba ne: “Bitu binkemesha bikole pantu ngumvua mandamuna atuye ufila mu tshiena-bualu kampanda tshia malu a mu Bible.”

Jairo utu kabidi wenza mudimu ne mêsu ende bua kuambila bantu bakuabu malu adiye witabuja. Umue mushindu utuye wenza nanku, mpatuye upodia ba kamanyinu kadi ne tshimfuanyi tshia mpata muimpe muikale ne nyama ne bantu ba makoba onso basombe mu ditalala. Patuye utua muaba au, dîyi didi dipatuka mu ordinatere wende diamba ne: “Bible udi ufila ditekemena dia ne: buloba nebulue mparadizu, muaba wikala kauyi masama nansha lufu, Buakabuluibua 21:4.” Padi muntu wanyisha, udi utua kabidi muaba mukuabu, ordinatere wende wamba ne: “Udiku musue kulonga nanyi Bible anyi?” Biakenza disanka bua muvua kaku muledi wa maman muitabe bua kulonga nende Bible. Bitu bienza disanka patudi tumona Ntemu mukuabu uya kufila Jairo padiye ulongesha kaku Bible ne lutulu luonso. Diakalenga, kaku wakatambula mu mpungilu wetu wa rejon mu ngondo wa 8/2014 mu tshimenga tshia Madrid.

Balongeshi ba mu tshilongelu tshia ba Jairo bakamona muvuaye ne lulamatu kudi Nzambi. Rosario, umue ku ba minganga bende wakamba patoke ne: “Meme musue kubuela mu tshitendelelu kampanda, ndi mua kulua Ntemu wa Yehowa.” Ndi mumone mudi ditabuja dia Jairo dimupeteshe tshipatshila mu nsombelu, nansha mudiye mu lutatu luende elu.”

Binsonji bia disanka bitu bitengebela mu mêsu a Jairo pantu mmubadila mulayi wa mu Bible wa ne: ‘Mu dîba adi muntu mulema neatupike bu ngulungu, ludimi lua kamama neluimbe misambu.’ (Yeshaya 35:6) Nansha mutubi bimutekesha imue misangu, utu anu ne disanka. Udi ne disanka edi bualu udi udimona munkatshi mua bena Kristo nende ne bualu udi mu malanda mimpe ne Nzambi. Mmuenenu wende muimpe ne ditabuja diende dikole bidi bileja ne: kuenzela Yehowa mudimu kudi mua kupepejila muntu nsombelu nansha yeye mumukolele mushindu kayi.