Mu 1991, Bantemu ba Yehowa ba mu Russie bakasanka bikole pavua mbulamatadi mubanyishile bua kuenzabu midimu yabu ivuabu bakandike munkatshi mua bidimu bia bungi ne bakabela ku mikanda ya mbulamatadi. Tshikondo atshi, bantu ba bungi kabavua bela meji ne: bungi bua Bantemu buvua mua kuvula misangu dikumi bufika ku 170 000 mudibu lelu eu to. Munkatshi mua bamanyishi ba Bukalenge ba tshisumi aba muvua Bantemu ba mu matunga makuabu bavua baye mu Russie bua kuambuluisha mu mudimu wa dinowa wa mu nyuma. (Mat. 9:37, 38) Tuakulayi bua bamue ba kudibu.

Tshidimu tshivuabu bumbushe dikandika mu Russie, Matthew udi mufumine mu Grande Bretagne uvua ne bidimu 28. Mu mpungilu uvuabu benze mu tshidimu atshi, bakaleja mu muyuki kampanda ne: bisumbu bia mu Mputu wa ku Est bivua dijinga ne diambuluisha. Tshilejilu, ngamba-malu wakatela tshisumbu kampanda tshia mu Saint-Pétersbourg, mu Russie tshivua anu ne musadidi wa mudimu umue ne kamuyi mukulu nansha umue. Nansha nanku, bamanyishi bavua balombola malonga a Bible nkama ya bungi! Matthew udi wamba ne: “Panyima pa muyuki au, mvua anu ngela meji bua Russie, nunku ngakasambila Yehowa anu bua dijinga dianyi dia kuya mu ditunga adi.” Wakalama ndambu wa makuta, kupanaye bintu bia bungi bivuaye nabi ne kuya mu Russie mu 1992. Tshiakamufikila ntshinyi?

Matthew udi wamba ne: “Muakulu uvua lutatu, bivua binkolela bua kuyukila bimpe ne bantu malu a Nzambi.” Lutatu lukuabu luvua lua kupeta muaba wa kusomba. Udi wamba ne: “Tshiena mvuluka bungi bua misangu imvua mushintulule nzubu mu matuku makese ne muye ku mukuabu to.” Nansha muvua Matthew mupete ntatu eyi ku ntuadijilu, udi wamba ne: “Kuya mu Russie kuvua dipangadika ditambe buimpe dimvua muangate. Ndi mulonge mua kueyemena Yehowa bikole pandi muenze mudimu muaba eu ne ndi mumone mudiye undombola mu mishindu ya bungi.” Matthew wakalua mukulu pashishe ne mpanda-njila wa pa buende, udi mpindieu wenza mudimu ku Betele pabuipi ne Saint-Pétersbourg.

Mu 1999, Hiroo uvua ne bidimu 25 pakabuelaye mu Kalasa ka dilongesha mudimu mu Japon, umue wa ku balongeshi babu wakamukankamija bua kuya kuyisha mu ditunga dikuabu. Hiroo ukavua mumvue ne: mu Russie  muvua dijinga dikole ne wakatuadija kulonga tshiena Russie. Wakenza kabidi bualu bukuabu. Udi wamba ne: “Ngakaya mu Russie bua ngondo isambombo. Bu mudi mashika a mu ditunga edi makole, ngakaya mu ngondo wa 11 bua kumona ni mvua mua kukumbana.” Yeye mumane kupitshisha tshikondo tshia mashika, wakapingana mu Japon, kupepejaye nsombelu wende bua kupeta makuta makumbane bua kupingana mu Russie, musangu eu uya bua kashidi.

Hiroo ukadi mpindieu ne bidimu 12 mu Russie ne mmuenze mudimu mu bisumbu ndambu. Misangu mikuabu, uvua nkayende mukulu mu tshisumbu tshivua ne bamanyishi bapite pa 100. Mu tshisumbu tshimue, uvua lumingu luonso wenza bitupa bia bungi bia mu Tshisangilu tshia Mudimu, ulombola Kalasa ka Mudimu wa Nzambi, dilonga dia Tshibumba tshia Nsentedi, ne ulombola Dilonga dia Mukanda mu bisumbu bitanu bishilangane. Uvua kabidi wenza makumbula a bulami a bungi. Padi Hiroo wela meji bua bidimu bionso ebi, udi wamba ne: “Mvua ne disanka dia bungi bua mundi muambuluishe bana betu ba balume ne ba bakaji bua kukolabu mu nyuma.” Mmunyi mudi kuenza mudimu muaba udi dijinga dinene kumuambuluishe? Udi wamba ne: “Kumpala kua meme kuya mu Russie, mvua mukulu ne mpanda-njila, kadi ndi ngumvua ne: ndi mukoleshe malanda anyi ne Yehowa bikole pandi mulue muaba eu. Ndi mulonge mua kueyemena Yehowa bikole mu malu onso.” Hiroo wakasela Svetlana mu 2005, ne badi batungunuka ne kuenza mudimu wa bumpanda-njila.

Matthew, udi ne bidimu 34, ne muakunyende Michael, udi ne bidimu 28, mbafumine mu Canada. Bubidi buabu bavua baye kuendakana mu Russie ne bakakema bua muvua bantu ba bungi bavua banyisha bulelela babuela mu bisangilu, kadi kuikale anu bana betu bakese bavua mua kubalongesha. Matthew udi wamba ne: “Bantu 200 bavua babuela mu bisangilu mu tshisumbu tshimvua muye, kadi bavua balombola bisangilu bionso kudi mukulu umue ukavua mukulakaje ne nsonga umue uvua musadidi wa mudimu. Pangakamona bualu ebu biakansaka bua kuya kuambuluisha bana betu aba.” Wakaya mu Russie mu 2002.

Bidimu binayi pashishe, Michael wakaya mu Russie ne kumonaye ne: kutshivua anu dijinga dinene dia bana betu ba balume. Bu muvuaye musadidi wa mudimu, bakamupesha mudimu wa kulama tshibutshilu, kutangila mikanda ne teritware. Bakamulomba kabidi bua kuenza mudimu utu sekretere wa tshisumbu wenza, kuenza miyuki ya patoke ne kuambuluisha bua kulongolola mpuilu ne kuibaka Nzubu ya Bukalenge. Bushuwa, too ne lelu bisumbu ebi bitshidi anu dijinga ne diambuluisha dia bungi. Nansha mudi kuenza midimu ya bungi eyi kuikale mudimu mukole, Michael udi mukulu mpindieu, udi wamba ne: “Kuambuluisha bana betu kudi kumpetesha disanka dia bungi. Mmushindu mutambe buimpe wa kuenza mudimu ne muoyo wanyi.”

Matthew wakasela Marina, ne Michael wakasela Olga. Bobu banayi ne bana betu bakuabu ba bungi badi badifile ne muoyo mujima, badi batungunuka ne kuambuluisha bisumbu bidi bienda bidiunda ebi.

Mu 1994 pavua Tatyana ne bidimu 16, bampanda-njila ba pa buabu basambombo bavua bufumine mu Pologne, mu République Tchèque, ne mu Slovaquie bakatuadija kuenza mudimu mu tshisumbu tshiabu mu Ukraine. Udi ubavuluka ne dinanga dionso wamba ne: “Bavua bampanda-njila ba tshisumi bavua bantu ba kukuatshila bualu, bena bulenga, ne bavua bamanye Bible bimpe.” Uvua mumone muvua Yehowa mubeneshe lungenyi luabu lua didipangisha malu, ne wakela meji ne: ‘Ndi musue kubafuana panyi.’

Bu muvua tshilejilu tshia bampanda-njila aba tshikankamije Tatyana, wakaya mu tshikondo tshia dikisha ne bana betu bakuabu mu teritware ya kule muvua Bantemu kabayi banji kuyisha ya mu Ukraine ne mu Biélorussie. Wakanyisha bikole luendu luvuabu benze bua kuyisha, ke kulongololaye bua kuya mu Russie bua kuvudija mudimu wende. Kumpala, wakanji kuya bua matuku makese bua kutangila muanetu wa bakaji uvua muye kusombela mu ditunga edi ne bua kukeba mudimu uvua mua kumuambuluisha pavuaye wenza mudimu wa bumpanda-njila. Pashishe, mu 2000 wakaya mu Russie. Kushintulula nsombelu kuvua lutatu anyi?

 Tatyana udi wamba ne: “Bu mumvua tshiyi ne mushindu wa kufutshila nzubu mujima nkayanyi, mvua mfuta mushiku umue mu nzubu umue ne bantu bakuabu. Kabivua bipepele bua kusomba mushindu eu to. Kuvua bikondo bimvua ngumvua bua kupingana kuetu. Kadi Yehowa uvua anu ungambuluisha misangu yonso bua kumona ne: kutungunuka ne kuenza mudimu eu kudi kumpetesha masanka.” Lelu, Tatyana udi misionere mu Russie. Udi ujikija wamba ne: “Bidimu binso bindi muenze mu ditunga dikuabu mbingambuluishe bua kumanya malu a bungi ne kupeta balunda ba bungi. Bualu bua mushinga budi ne: ditabuja dianyi ndikole.”

Muanetu wa bakaji Masako udi mufumine mu Japon, udi mpindieu ne bidimu 50 ne pamutu, uvua ne dijinga dikole dia kuikala misionere mu nsombelu wende mujima, kadi masama avua amueneka bu adi mua kumupangisha bua kuenza mudimu eu. Kadi pavua masama mamushile muaba ndambu, wakangata dipangadika dia kuya mu Russie bua kuambuluisha mu mudimu wa dinowa. Nansha muvuabi bikole bua kupeta muaba muimpe wa kusomba ne mudimu wa matuku a bungi, wakalongolola bua kulongesha tshiena Japon ne kuenza midimu ya mu nzubu bua kukumbaja mudimu wende wa bumpanda-njila. Tshiakamuambuluisha bua kutungunuka ne mudimu wende wa buambi tshinyi?

Padi muanetu wa bakaji Masako wela meji bua bidimu 14 bidiye muenze mu Russie, udi wamba ne: “Disanka dindi mupete mu mudimu wa diyisha didi dikepesha tunyinganyinga tua ntatu indi ntuilangana nayi. Kuyisha muaba udibu dijinga ne bamanyishi ba Bukalenge ba bungi kudi kuenza bua nsombelu ikale muimpe ne wa disanka.” Udi wamba kabidi ne: “Buanyi meme, kudimuenena diakamue mudi Yehowa mungambuluishe bua kupeta biakudia, bilamba ne kaba ka kusombela ntshishima mu matuku etu aa.” Pakumbusha mu Russie muvua dijinga dinene, Masako wakaya kabidi kuenza mudimu wa dinowa mu Kirghizistan. Uvua wambuluishamu kabidi tusumbu tua muakulu wa Anglais, wa tshiena Chine ne wa ouïghour. Patudi tuakula apa, udi mpanda-njila mu Saint-Pétersbourg.

Bua lutatu lua makuta, mêku a bungi atu aya mu matunga makuabu bua kukeba bintu bia bungi bia ku mubidi. Kadi anu bu Abalahama ne Sala, amue mêku atu aya mu matunga a ku ba bende bua kukumbaja  bipatshila bia mu nyuma. (Gen. 12:1-9) Tuangate tshilejilu tshia Mikhail ne mukajende Inga badi bafumine mu Ukraine bavua baye mu Russie mu 2003. Bakapeta diakamue bantu bavua bakeba kumanya bulelela.

Mikhail udi wamba ne: “Umue musangu tuvua tuyisha muaba uvua Bantemu kabayi banji kuyisha to. Tatu kampanda mukulakaje wakunzulula tshiibi ne kutuebeja ne: ‘Nudi bantu batu bayisha anyi?’ Patuakandamuna ne: eyowa, wakamba ne: ‘Mvua mumanye ne: dimue dituku nenufike muaba eu. Bivua bikengela anu bua mêyi a Yezu akumbane.’ Pashishe, wakatela mêyi a mu Matayi 24:14. Mu tshitupa atshi, tuvua bapete kabidi tshisumbu tshia bantu bakaji batue ku dikumi ba mu tshitendelelu tshia ba Batiste bavua ne nyota ya bulelela. Bavua ne mukanda wa Muoyo wa kashidi ne bavua balonga Bible ku diambuluisha dia mukanda eu ku ndekelu kua lumingu luonso. Tuakabandamuna nkonko yabu munkatshi mua mêba a bungi, kuimba nabu misambu ya Bukalenge ne kudia nabu. Ebu mbualu bundi tshiyi mua kupua muoyo.” Mikhail ne Inga badi bitaba ne: kuenza mudimu muaba udibu dijinga ne bamanyisha ba Bukalenge ba bungi nkubasemeje pabuipi ne Yehowa, nkukoleshe dinanga diabu bua bantu ne nkubapeteshe nsombelu mutambe buimpe. Lelu, badi benza mudimu wa dikumbula bisumbu.

Mu 2007, Yury ne mukajende Oksana badi bafumine mu Ukraine badi mpindieu ne bidimu 30 ne pamutu, muanabu wa balume Aleksey udi mpindieu ne bidimu 13 bavua baye kumona Betele wa mu Russie. Bakamonamu karte ka Russie kavua ne teritware minene ivua kayiyi ne bisumbu bivua biyishamu. Oksana udi wamba ne: “Tuetu bamane kumona karte aka, tuakajingulula ne: kuvua dijinga dinene dia bamanyishi ba Bukalenge. Biakatuambuluisha bua kuangata dipangadika dia kuya mu Russie.” Ntshinyi tshikuabu tshiakabambuluisha? Yury udi wamba ne: “Kubala biena-bualu bia mu mikanda yetu bu mudi tshia ne: ‘Udiku mua kuya kuambuluisha mu ditunga dia ku ba bende anyi?’ kuvua kutuambuluishe. * Tuakaya kumona muaba wa mu Russie uvua Betele mutuambile bua kuya ne tuetu kukeba nzubu ne mudimu wa kuenza.” Bakaya kusombela mu Russie mu 2008.

Ku ntuadijilu, bivua bibakolele bua kupeta mudimu wa kuenza, misangu ya bungi bavua ne bua kupatuka ku nzubu kubuela ku mukuabu. Yury udi wamba ne: “Misangu ya bungi tuvua tusambila bua katuteketshi mu mikole, ne pashishe tuakatungunuka ne kuyisha batuishibue ne: Yehowa neatuambuluishe. Tuakamona mudi Yehowa ututabalela patudi tuteka malu a Bukalenge pa muaba wa kumpala. Mudimu eu wakakolesha dîku dietu.” (Mat. 6:22, 33) Mmunyi muvua kuenza mudimu muaba udi dijinga dinene kuambuluishe Aleksey? Oksana udi wamba ne: “Mudimu eu mmumufikishe ku dipatula bipeta bimpe bia bungi. Wakadilambula kudi Yehowa ne kutambulaye ne bidimu tshitema. Dijinga dinene dia bamanyishi ba Bukalenge didiku ndimusake bua kuenza mudimu wa bumpanda-njila buambuluishi mu dikisha dionso. Tudi ne disanka dia bungi patudi tumona dinanga diende ne tshisumi tshidiye natshi bua mudimu wa buambi.” Lelu, Yury ne Oksana badi bampanda-njila ba pa buabu.

Anu mudi banowi ba tshisumi aba baleje patoke, kuya miaba mikuabu bua kuvudija mudimu wetu kudi kulomba kueyemena Yehowa ne muoyo mujima. Bushuwa, bantu badi benza mudimu muaba udi dijinga dinene batu batuilangana ne ntatu mu teritware mipiamipia, kadi batu kabidi bapeta disanka dia bungi bua mudi bantu badibu bayisha lumu luimpe bitaba mukenji wa Bukalenge. Kuenaku mua kuambuluisha mu mudimu wa dinowa muaba utshidi dijinga dinene dia bamanyisha ba Bukalenge anyi? Wewe muangate dipangadika dia kuenza nunku, udi mua kudiumvua anu bu Yury uvua muambe bua dipangadika divuaye muangate dia kuenza mudimu muaba udi dijinga dinene ne: “Bualu bumue bundi nyingalala budi ne: bua tshinyi tshivua muwutuadije konso eku?”