KUKADI bidimu bitue ku dikumi, Gregorio ne mukajende Marilou bavua ne bidimu 30 ne pamutu, bavua benza mudimu bu bampanda-njila mu tshimenga tsha Manila eku benza mudimu uvua ubangata mêba a bungi. Tshivua lutatu kadi bakapatula bipeta bimpe. Pashishe bakabandisha Marilou muanzu bua kuikalaye utangila bantu bavua benza mudimu ku banke kuvuaye. Udi wamba ne: “Mudimu wetu muimpe eu wakatuambuluisha bua kuikala ne nsombelu wa kantu ku bianza.” Bushuwa malu a mpetu a bena dibaka abu avua enda bimpe, bobu kuangata dipangadika dia kuibakisha nzubu uvuabu bajinga muaba muimpe mu ntanta wa kilometre mitue ku 19 ku Est kua Manila. Bakumvuangana ne tshiapu tshia luibaku ne kulongololabu bua kuikalabu bafuta ku ngondo yonso makuta ku ndambu ku ndambu munkatshi mua bidimu dikumi.

Marilou udi wamba ne: “Mudimu wanyi mupiamupia uvua undomba dîba ne makanda a bungi, bienza bua tshisumi tshimvua natshi bua midimu ya buena Kristo tshikepele. Ngakamona ne: mvua ngiba Yehowa.” Udi umvuija ne: “Tshitshivua mpesha Yehowa bungi bua mêba bumvua muditshipe bua kuenza mu mudimu wende to.” Bu muvua bualu ebu bubungamije Gregorio ne  Marilou, bakayukila dimue dituku bua mushindu uvuabu benza malu mu nsombelu wabu. Gregorio udi wamba ne: “Tuvua basue kushintulula malu kadi katuvua bamanye menemene tshia kuenza to. Tuakayukila bua mushindu utuvua mua kudifila ne muoyo mujima mu mudimu wa Yehowa nangananga mutuvua katuyi ne bana. Tuakalomba buludiki kudi Yehowa.”

Tshikondo atshi, bakumvua miyuki ya bungi ivua yakula bua kuya kuenza mudimu muaba uvua dijinga dikole dia bamanyishi ba Bukalenge. Gregorio udi wamba ne: “Tuakumvua ne: miyuki eyi ivua mushindu uvua Yehowa muandamune masambila etu.” Bena dibaka aba bakalomba Yehowa ditabuja dikole bua bapete dikima dia kuangata mapangadika mimpe. Lutatu lunene luvuabu nalu luvua lutangila nzubu utshivuabu bibakisha. Bakavua bafute munkatshi mua bidimu bisatu. Bavua ne bua kuenza tshinyi? Marilou udi wamba ne: “Tuetu bashipe diumvuangana dituvua benze, tuvua ne bua kujimija makuta a bungi atukavua bafute. Kadi tuakamona bualu ebu bu disungula dia kuenza pankatshi pa kuteka disua dia Yehowa pa muaba wa kumpala anyi kuteka majinga etu.” Bu muvuabu bamanye mêyi a mupostolo Paulo a ‘kuitaba dijimija,’ bakimanyika dibakisha dia nzubu, kulekelabu midimu yabu ivuabu benza, kupanyishabu bintu biabu bia bungi ne kuyabu mu kamusoko ka kule mu tshidiila tshia Palawan tshidi ntanta wa kilometre mitue ku 480 ku Sud kua Manila.​—Filip. 3:8.

Kumpala kua Gregorio ne Marilou kuyabu, bakateta kudilongolola bua kuikala ne nsombelu mupepele, kadi kabavua bamanye muvua nsombelu wabu mupiamupia mua kuikala too ne muakafikabu kuvuabu baya. Marilou udi wamba ne: “Bivua bikemesha bikole bualu kakuvua nzembu, nansha bintu bivua mua kutuambuluisha to. Pamutu pa kulambila pa ditshiuwa dia nzembu, tuvua ne bua kupanda nkunyi bua kulambilapu. Tshivua kabidi mua kuya mu makazen manene, kudia mu restoran anyi kuenza malu makuabu atu mu tshimenga to.” Nansha nanku, bena dibaka abu bakatungunuka ne kuvuluijangana tshivuabu bayile muaba au ne bakakaja malu ne lukasa. Marilou udi wamba ne: “Mpindieu, ndi ne diakalenga dia kumona buimpe bua bifukibua, ne bukenke bua mitoto butuku. Kupita apu, ndi ne disanka bua kumona mudi bantu ne disanka patudi tubayisha. Patudi tuenza mudimu muaba eu, tudi ‘balonge tshia kuenza’ bua kuikala ne disanka.”​—Filip. 4:12.

Gregorio udi wamba ne: “Patuakafika muaba eu, kuvua Bantemu anu banayi. Bakasanka bikole pangakatuadija kuenza muyuki wa patoke lumingu luonso ne pamvua ngimba nabu misambu ya Bukalenge ne kidare wanyi.” Mu tshidimu tshimue, bena dibaka aba bakamona muvua kasumbu kakese aku kalue tshisumbu tshia bamanyishi 24. Gregorio udi wamba ne: “Mushindu uvuabu batuakidile ne dinanga mu tshisumbu etshi wakatulenga bikole.” Lelu padibu bavuluka bidimu bisambombo bidibu benze mu tshimenga tshia kule etshi, badi bamba ne: “Kakuena tshintu tshitudi mua kufuanyikija ne disanka ditudi bapete dia kumona mudi bantu ba bungi batuadija kubuela mu bisangilu to. Tudi tumvua ne: muoyo wetu udi ne tshipatshila kupita kumpala.”

Mu Philippines, bana betu ba balume ne ba bakaji batue ku 3 000 mbaye mu bimenga mudibu dijinga dikole ne bamanyishi ba Bukalenge. Munkatshi muabu mudi bana betu ba bakaji bajike 500. Tshilejilu, tuakule bua Karen.

Karen udi mpindieu ne bidimu 20 ne pamutu, uvua mukolele mu tshimenga tshia Baggao mu Cagayan. Patshivuaye ne bidimu dikumi ne pamutu uvua misangu ya bungi wela meji bua kuvudija mudimu wende. Udi wamba ne: “Bu mumvua mumanye ne: dîba didi dishale ndikese, ne kabidi ne: bantu ba mishindu yonso badi ne bua kumvua lumu luimpe, ngakajinga bua kuya kuenza mudimu muaba uvuabu dijinga ne bamanyishi ba bungi.” Nansha muvua bamue ba mu dîku dia ba Karen bamusaka bua kulonga tulasa tutumbuke pamutu pa kuya mu muaba wa kule bua kuyisha, wakasambila Yehowa bua amulombole. Wakayukila kabidi ne bana betu badi bayisha mu miaba ya kule. Pakakumbajaye bidimu 18, wakaya mu tshimenga tshivua mu ntanta wa kilometre 64 kule ne tshimenga tshiabu.

Tshisumbu tshikese tshivua Karen muye kuambuluisha tshivua mu teritware uvua munyunguluka kudi mikuna ku muelelu wa Mbuu wa Pacifike. Karen udi uvuluka wamba ne: “Bua kumbuka mu Baggao kufika muaba uvua tshisumbu tshipiatshipia atshi, tuvua tuenda matuku asatu, tubanda ne tupueka mikuna ne tusabuka misulu misangu mipite pa 30.” Udi wamba kabidi ne: “Bua kufika muaba udi bamue balongi ba Bible, ntu ngenda munkatshi mua mêba 6, nshala butuku bujima ku nzubu kua mulongi wa Bible, ne dituku didi dilonda ngenda mêba makuabu 6 bua kufika kumbelu.” Mbipeta kayi bivua bipatuke? Karen udi uleja ne disanka dionso ne: “Imue misangu mikolo ivua insama, kadi mvua mulombole malonga a Bible 18 dijima. Ndi ‘mutete, mulabule, mumvue ne: Yehowa udi muakane.’​—Mus. 34:8.

Ntshinyi tshivua tshisake Sukhi, muanetu wa bakaji mujike udi ne bidimu 40 ne pamutu uvua musombele mu États-Unis bua kuya mu Philippines? Mu 2011 wakabuela mu mpuilu wa tshijengu muvuabu bele bena dibaka kampanda nkonko. Bakaleja muvuabu bapane bintu biabu bia bungi bua kuya mu Mexique bua kutua mudimu wa buambi nyama ku mikolo. Sukhi udi wamba ne: “Nkonko ivuabu babele eyi yakatuadija kungelesha meji bua bipatshila bimvua tshiyi nabi mu meji kumpala.” Pavua Sukhi udi wa mu ndelanganyi ya bena Inde mumvue ne: kuvua dijinga dikole dia kuya kuambuluisha bantu bavua bakula muakulu wa Punjabi bavua basombele mu Philippines, wakangata dipangadika dia kuya bua kuambuluishamu. Uvuaku mupete ntatu anyi?

Sukhi udi wamba ne: “Kuangata mapangadika bua bintu bimvua mua kulama ne bimvua ne bua kupana kuvua bualu bukole bumvua tshiyi ngelela meji. Kabidi panyima pa bidimu 13 bimvua mu wanyi nzubu muimpe, tuakumbuka ne dîku dietu ne kuya kusombela mu nzubu uvua kayi muimpe to. Kabivua bipepele to, kadi tshivua mushindu muimpe wa meme kudilongolola bua kuikala ne nsombelu mupepele.” Ntatu kayi ivuaye mupete pavuaye muye mu Philippines? Udi wamba ne: “Buôwa bumvua nabu bua bishi, ne muvua kuetu  kunsamina muoyo bivua lutatu lunene kundi. Ngakalonga mua kueyemena Yehowa ne muanyi muonso kupita mumvua ngenza konso eku.” Mmasanka kayi akapetaye? Sukhi udi wamba ne mimuemue ne: “Yehowa udi utuambila ne: ‘Nuntete, numone bingikala tshiyi munulokeshile masanka.’ Ngakamona muvua mêyi aa malelela pavua mamu kampanda mungebeje ne: ‘Neulue kabidi dîba kayi? Ntshidi ne nkonko ya bungi.’ Bitu bimpetesha disanka dia bungi bua kuikala mukumbane bua kuambuluisha bantu badi basue kumanya malu a Nzambi.” (Mal. 3:10) Sukhi udi usakidila ne: “Bushuwa, bualu buvua bukole menemene buvua bua kuangata dipangadika dia kuya. Panyima pa meme mumane kudiangata, bivua binkemesha bua kumona muvua Yehowa muenze bua malu onso ende bimpe.”

Sime, muanetu wa balume ukadi musele ne udi ne bidimu bipatshila ku 40 wakumbuka mu Philippines bua kuya kuenza mudimu uvua mua kumupetesha makuta a bungi mu ditunga kampanda dia mu Asie. Pakafika Sime mu ditunga edi, dikankamija divuaye mupete kudi mutangidi wa tshijengu ne mu muyuki uvua muena mu Kasumbu kaludiki muenze biakamukankamija bua kuteka Yehowa pa muaba wa kumpala mu nsombelu wende. Sime udi wamba ne: “Pangakela meji bua kulekela mudimu umvua ngenza, biakantonda bikole.” Nansha nanku, wakalekela mudimu eu ne kupinganaye mu Philippines. Lelu, Sime ne mukajende Haidee, badi benza mudimu mu tshimenga tshia Davao del Sur ku Sud kua ditunga, muaba udibu dijinga ne bamanyishi ba bungi bua kuenzabu mudimu mu teritware munene. Sime udi wamba ne: “Pandi ntangila panyima, ndi ne dianyisha dia bungi bua mundi mutantamene buôwa bumvua nabu bua kujimija mudimu wanyi ne bua mundi muteke Yehowa pa muaba wa kumpala. Kakuena bualu budi bupetesha disanka mu nsombelu kupita kupesha Yehowa tshintu tshitambe buimpe tshitudi natshi.”

Pavua Ramilo ne mukajende Juliet bakavua ne bidimu 30 ne pamutu ne bikale bampanda-njila bumvue ne: tshisumbu tshivua mu kilometre mitue ku 30 patupu kumbukila muaba uvuabu basombele tshivua dijinga ne diambuluisha, bakitaba bua kuya. Nunku lumingu luonso Ramino ne Juliet bavua baya misangu ya bungi mu bisangilu ne mu buambi ne moto wabu nansha munya muteme peshi mvula uloka. Nansha muvua kuenzela ngendu mu njila ivua kayiyi mimpe ne kusambuka pa bilamba bia mionji kuikale ne yaku ntatu, badi ne disanka bua muvuabu bavudije mudimu wabu. Ramilo udi wamba ne: “Meme ne mukanjanyi tudi tulombola malonga a Bible 11. Kuenza mudimu muaba udibu dijinga dikole ne bamanyishi kudi kulomba kudipangisha amue malu, kadi kudi kutupetesha masanka a bungi.”​—1 Kol. 15:58.

Udiku musue kumanya malu a bungi adi atangila kuya kuenza mudimu muaba udibu dijinga ne bamanyishi ba Bukalenge ba bungi mu ditunga dienu peshi mu ditunga dikuabu anyi? Bikalabi nanku, yukila ne mutangidi wa tshijengu tshienu, ne bala tshiena-bualu tshia ne: “Kanuenaku mua ‘kuya mu Makedonia’ anyi?” tshidi mu Mudimu wetu wa Bukalenge wa ngondo wa 8 wa 2011.