Malu makese avua menzeke mu Grande-Bretagne neakuambuluishe bua kumona bua tshinyi udi ne bua kuikala anu mutekemene. Neumone kabidi tshiudi ne bua kuenza bua ‘kuele bidia biebe pa mutu pa mâyi,’ mmumue ne: kuambuluisha bantu badi kabayi banji kuitaba bulelela.​—Muam. 11:1.

Bualu bua mushinga buudi ne bua kuenza nkunanukila. Udi ne bua kutungunuka ne kutendelela Yehowa. (Dut. 10:20) Ke tshivua Georgina muenze. Pavuaye mutuadije kulonga Bible ne Bantemu ba Yehowa mu 1970, bayende Kyriacos wakafiika munda bikole. Wakenza muende muonso bua kuimanyika dilonga edi, ubenga bua Bantemu kubuela mu nzubu muende ne wimansha mukanda wa Bantemu ba Yehowa wonso uvuaye usangana mu nzubu.

Pakatuadija Georgina kubuela mu bisangilu, tshiji tshia Kyriacos tshivua tshienda tshivula. Dimue dituku, wakaya ku Nzubu wa Bukalenge bua kujula bilumbu. Pavua muanetu wa bakaji kampanda mumone ne: Kyriacos uvua wakula tshiena Greke bimpe kupita Anglais, wakabikila muanetu wa balume kansanga uvua wakula tshiena Greke wa mu tshisumbu tshikuabu bua kulua kumuambuluisha. Kyriacos wakitaba bualu muanetu au uvua ne malu malenga, bakalonga nende Bible munkatshi mua ngondo mikese. Pashishe Kyriacos wakalekela kulonga.

Georgina wakatungunuka ne kutantamena buluishi munkatshi mua bidimu bisatu bikuabu. Kyriacos wakamba ne: uvua ne bua kumuipata yeye mutambule. Dituku divua Georgina ne bua kutambula, wakasambila Yehowa bikole bua Kyriacos kamuipatshi to. Pakalua Bantemu kuangata Georgina bua kuya nende mu mpuilu, Kyriacos wakabambila ne: “Dianjilayi. Netunulonde ku mashinyi atudi nawu.” Wakabuela mu tshitupa tshia mu dinda ne kumonaye muvuabu batambuisha mukajende.

Pashishe buluishi bua Kyriacos buakakepela, ku kakese ku kakese kushintulukaye bikole. Georgina wakamona bayende utambula panyima pa bidimu bitue ku 40 katshia wamonangana ne Bantemu bua musangu wa kumpala. Tshivua tshiambuluishe Kyriacos ntshinyi? Udi wamba ne: “Mvua ne disanka bualu Georgina kavua mulekele bualu nansha bumue bumupangisha bua kutendelela Yehowa.” Georgina udi wamba ne: “Nansha muvua bayanyi unkengesha, tshivua mua kulekela kutendelela Nzambi wanyi to. Misangu yonso, mvua anu nsambila Yehowa, ne mvua anu mutekemene.”

Bualu bukuabu budi mua kuambuluisha muena dibaka nebe ndikala diebe ne bumuntu bua bena Kristo. Mupostolo Petelo wakabela bakaji bena Kristo ne: “Nukokele babayenu, bua bikala bakuabu kabayi batumikila dîyi dia Nzambi, bakokibue kakuyi dîyi, bua bikadilu bia bakaji babu.” (1 Pet. 3:1) Christine wakatumikila mubelu eu nansha muvuaye mua kuindila bidimu bia bungi bua bayende kushintuluka. Pavuaye mulue Ntemu kukadi bidimu bipite pa 20, bayende John kavua witabuja Nzambi to. John kavua musue kutendelela to, kadi wakamona ne: tshitendelelu tshipiatshipia tshia Christine tshivua tshimuambuluishe. Udi wamba ne: “Ngakamona ne: tshivua tshimupeteshe disanka. Uvua mulue muntu mukole ne bualu ebu buakangambuluisha bikole patuvua mu ntatu.”

Christine kavua wenzeja bayende bua kubuela mu tshitendelelu tshiende to. Bayende udi wamba ne: “Christine uvua mumanye katshia watuadija kulonga ne: kabivua bimpe bua angambile bua tshitendelelu tshiabu to, wakandekela ne lutulu luonso bua ndonga mu wanyi mushindu.” Pavua Christine upeta biena-bualu kampanda mu Tshibumba tshia Nsentedi anyi mu Réveillez-vous! bivuaye umona ne: bivua mua kukoka ntema yanyi bu mudi bidi biakula bua malu a sianse anyi adi atangila bufuki, uvua ubindeja wamba ne: “Ndi ngela meji ne: nebikusankishe bua kubala.”

Pakapita matuku, John wakapeta pansion ku mudimu ne kutuadijaye kuenza mudimu wa budimi. Bu muvuaye ne dîba dia bungi dia kuela meji bikole bua nkonko ya mu nsombelu, wakatuadija kudiebeja ne: ‘Bantu mbalue ku mpukapuka anyi? Peshi tudi bafukibue ne tshipatshila kampanda?’ Dimue dituku, muanetu wa balume kampanda uvua utamba kuyukila ne John wakamuebeja ne: “Kadi katuenaku mua kulonga anyi?” John udi wamba ne: “Bu munkavua mutuadije kuitabuja Nzambi, ngakitaba dilomba diende.”

Bivua ne mushinga bua muvua Christine anu mutekemene. Yeye mumane kusambila munkatshi mua bidimu 20 bua John kuitabaye bulelela, John wakatambula. Mpindieu badi benzela Yehowa mudimu ne tshisumi. John udi wamba ne: “Kudi malu abidi avua mansake bua kuitaba: bulenga ne malu mimpe avua Bantemu bangenzela. Kabidi wewe muselangane ne muntu udi Ntemu wa Yehowa, udi ukuleja lulamatu, ukueyemena ne kena utangila anu malu ende nkayende to.” Bushuwa, Christine uvua mutumikile mêyi adi mu 1 Petelo 3:1 ne malu akenda bimpe.

Kadi netuambe tshinyi bua mulongi wa Bible udi ulekela kuleja dianyisha bua malu adiye ulonga bua bualu kampanda? Mukalenge Solomo wakafunda ne: “Kuna maminu ebe ne dinda, kuikishi dilolo; bualu bua kuena mumanye ne bidi bidiunda ngebi anyi mbiabia, anyi bubidi buabi nebidiunde.” (Muam. 11:6) Imue misangu ntete ya bulelela itu yenza bidimu bia bungi bua kukola mu muoyo wa muntu. Nansha nanku, muntu udi mua kulua kumona mudibi ne mushinga bua kusemena pabuipi ne Nzambi. (Yak. 4:8) Bulelela, udi mua kulua kuangata dipangadika dimpe didi mua kukukemesha.

Tumonayi tshilejilu tshia Alice, uvua mumbuke mu Inde muye mu Angleterre. Mu 1974, wakatuadija kulonga Bible. Uvua wakula muakulu wa Hindi, kadi uvua musue kumanya Anglais bimpe. Bakatungunuka ne kulonga munkatshi mua bidimu ndambu, Alice uvua ubuela imue misangu mu bisangilu mu tshisumbu tshia muakulu wa Anglais. Uvua mumanye ne: malu avuaye ulonga avua malelela, kadi kavua mumanye mushinga wawu to. Ku lukuabu luseke, uvua udifila bikole mu dikeba dia makuta ne musue kuya mu fete bikole. Ndekelu wa bionso, Alice wakalekela kulonga.

Bidimu bitue ku 30 pashishe, Alice wakatumina Stella uvuabu balonga nende Bible mukanda. Wakafunda ne: “Ndi mujadike ne: neusanke bikole bua kumanya ne: mulongi webe wa Bible wa katshia ku tshidimu tshia 1974 mmutambule mu mpungilu wa distrike mushale eu. Udi mungambuluishe bikole mu nsombelu wanyi. Uvua mukune lutete lua bulelela munda muanyi, nansha muvua tshiyi pabuipi bua kudilambula kudi Nzambi, ngakalama lutete lua bulelela elu mu lungenyi luanyi ne mu muoyo wanyi.”

Tshivua tshienzeke ntshinyi? Alice udi uleja ne: wakanyingalala bikole pakafua bayende mu 1997. Yeye kulomba Nzambi. Minite dikumi pashishe, Bantemu babidi bavua bakula muakulu wa Punjabi bakakokola ku tshiibi tshiende ne kumushilabu trakte wa ne: Nditekemena kayi ditudi nadi bua bananga betu bakadi bafue? Alice wakamona ne: Nzambi uvua muandamune disambila diende, wakangata dipangadika dia kudisangisha ne Bantemu ba Yehowa. Kadi uvua mua kubapetela kuepi? Wakapeta kaye kavuaye mufundile adrese wa tshisumbu tshia muakulu wa Punjabi uvua Stella mumupeshe. Alice wakaya ku Nzubu wa Bukalenge, kumuakidilabu bimpe kudi bana betu bavua bakula muakulu wa Punjabi. Udi wamba ne: “Ngakamona ne: bavua bannange bikole nansha patuakashiyangana nabu, biakangambuluisha bua kumbusha kanyinganyinga kanyi.”

Wakatuadija kubuela mu bisangilu bionso, kutuadijaye kabidi kulonga Bible ne wakalonga bua kuakula ne kubala muakulu wa Punjabi bimpe. Wakatambula mu 2003. Wakajikija mukanda uvuaye mufundile Stella ne mêyi aa: “Tuasakidila wa bungi bua muuvua mukune ntete ayi kukadi bidimu 29, ne bua muudi munshile tshilejilu tshimpe tshia meme kulonda.”

“Tuasakidila wa bungi bua muuvua mukune ntete ayi kukadi bidimu 29, ne bua muudi munshile tshilejilu tshimpe tshia meme kulonda.”​—Alice

Malu aa adi akulongesha tshinyi? Bualu kampanda buudi mutekemena budi mua kuenza bidimu bia bungi, kadi muntu yeye ne dijinga dikole dia kumanya Nzambi, musue malu mimpe ne muikale udipuekesha, Yehowa neamuambuluishe bua bulelela bukole mu muoyo wende. Vuluke mêyi avua Yezu muambe aa: ‘Maminu adi atoloka, akola, kadi kena umanya mudibi bienzeka to. Buloba nkayabu budi butoluesha maminu ku kakese ku kakese, budi buanji bupatula tshisosa, pashishe miepu, ndekelu wa bionso ntete mimane kukola mu miepu.’ (Mâko 4:27, 28) Dikola edi didi dienzeka ‘nkayadi’ ku kakese ku kakese. Mu bulelela, mumanyishi yonso wa Bukalenge ki mmumanye mudi bualu ebu buenzeka to. Nanku tungunuka ne kukuna ntete ya bungi. Neupole bia bungi.

Kupu muoyo mushinga udi nawu disambila to. Georgina ne Christine bakatunguka ne kusambila Yehowa. Wewe ‘munanukile mu disambila,’ mushale anu mutekemena, ‘papita matuku a bungi,’ neusangane kabidi “bidia” biuvua muele pamutu pa mâyi.​—Lomo 12:12; Muam. 11:1.