BIOBI ne: uvua mukendakane mu tshidiila tshia Sangir Besar mu Indonésie bidimu bishale ebi, pamuapa uvua mumone bana betu ba bakaji 3 badi basombele lua ku mâyi. Mbamanyike bikole mu tshidiila atshi bua mudimu wabu wa buambi; mudibu bambuluisha bantu bua kumanya malu a mu Bible. Kadi pa nkumbusha atshi, bavua benza midimu mikuabu mishilashilangane.

Kumpala, bavua benza mudimu wa kubuela mu Mbuu bambulamu mabue babanda nawu ku mukuna. Mabue makuabu avuabu bambula avua bunene bua ndundu wa kunaya. Pashishe, bavua basomba pa tutambue tua mitshi, bangata nyindu batuadija kuzaza mabue au baashiya bunene bua mayi a nzolo. Pashishe bavua bangata nsoka ayi bayele mu mbumba, bayambula baya nayi kumbelu. Bavua balua bayela mu mifuku minene ivuabu bela mu mashinyi bua kukenza nayi njila.

Hulda ngumue wa ku bana betu ba bakaji abu. Nsombelu wende uvua umulomba bua kuenza mudimu au bikole kupita bakuabu. Bivua bikengela ikale upeta makuta dituku dionso bua kukumbanjila bena mu dîku diabu bivuabu nabi dijinga. Kadi wakatuadija kuenza mudimu au ne tshipatshila tshikuabu. Uvua musue kusumba tablete bua kuikala kubuela mu JW Library^®. Uvua mumanye ne: filme ne bintu bikuabu bidi mu JW Library bidi mua kumuambuluisha mu buambi ne bua kuakaja ngumvuilu wende wa malu a mu Bible.

Hulda uvua wenza mudimu mêba 2 dituku dionso mu dinda munkatshi mua ngondo mujima ne tshitupa uzaza mabue bua kuwuja mashinyi a makese tente. Ndekelu wa bionso, wakapeta makuta makumbane a kusumba tablete.

Hulda udi wamba ne: “Nansha muvua mudimu wa kuzaza mabue au muntshiokeshe bikole tshiyi ne makanda a mubidi, ngakapua malu onso au muoyo pankavua mupete tablete wanyi uvua ungambuluisha mu buambi, ne pamvua ndongolola bisangilu.” Wakamba kabidi muvua tablete mumuambuluishe bikole kuntuadijilu kua tshipupu tshia korona, bualu malu onso a mu tshisumbu avua enzekela anu ku biamu. Tshilejilu tshia Hulda tshidi tshitusankisha bikole bualu wakakumbaja tshipatshila tshiende.