Mushindu utudi mua kuleja muntu netu dinanga
Bu mutudi ndelanganyi ya Adama, muntu wa kumpala, tudi bonso bena mu dîku dimue. Nansha mutubi ne: bena mu dîku dimue badi ne bua kunangangana ne kunemekangana, kadi matuku etu aa mbikole bua kupeta bantu banangangane mu dîku nunku. Nzambi wa dinanga ki mmusue bua bikale nanku to.
TSHIDI MIFUNDU YA TSHIJILA YAMBA BUA DINANGA
“Udi ne bua kunanga mukuebe muudi mudinange.”—LEWITIKI 19:18.
“Tungunukayi ne kunanga bena lukuna benu.”—MATAYI 5:44.
TSHIDI KUNANGA MUNTU NETU KUMVUIJA
Mona mudi Nzambi umvuija dinanga mu Dîyi diende, mu 1 Kolinto 13:4-7:
“Dinanga didi ne lutulu ne bulenga.”
Diela lukonko elu: Utu umvua bishi patu bakuabu bakuenzela malu ne lutulu ne bulenga ne kabayi bakuenzela malu ne tshiji pautu ubenzela bilema?
“Dinanga kadiena ne mukawu.”
Diela lukonko elu: Utu umvua munyi patu bakuabu bakuelela anu meji mabi peshi bakumvuila mukawu?
Dinanga “kadiena didikebela anu masanka adi.”
Diela lukonko elu: Utu umvua munyi patu bakuabu basue kuitaba mmuenenu webe, kabayi anu basumisha bua witabe wabu buobu?
Dinanga “kadiena dibalulula malu mabi.”
Ela meji bua bualu ebu: Nzambi mmusue kufuila muntu udi muenze mpekatu ne munyingalale luse. “Kakuikala anu utulangana bilema, peshi ushala mulaminangane munda” to. (Misambu 103:9) Muntu utudi benzele bibi yeye mutufuile luse bitu bitusankisha. Nanku mbimpe tuikale pabuipi bua kufuila bakuabu luse padibu batuenzela bibi.—Misambu 86:5.
Dinanga “kadiena disanka bua malu adi kaayi makane.”
Ela meji bua bualu ebu: Malu mabi wowu matufikile, katutu basue bua bakuabu basanke bua dikenga dietu to. Nunku katuena ne bua kusanka padi bakuabu mu ntatu to, nansha bobu batuenzele malu mabi to.
Bua Nzambi kutubenesha, tudi ne bua kunanga bakuabu mushindu eu nansha bobu ba kuepi. Umue mushindu muimpe utudi mua kuenza nunku nkuambuluisha bantu badi mu lutatu.
Mona bikuabu:
TABULUKAYI!
Njila wa kupetela disanka—Dinanga
Kunanga ne kunangibua kudi ne mushinga wa bungi bua muntu ikale ne disanka.
