Bu mudi Diabolo tshifukibua tshia mu nyuma, katuena mua kumona muaba udiye musombele to. Kadi ki mmusombele mu inferno wa kapia mudiye ukengeshila bantu babi mudibu baleje mu tshimfuanyi tshia tshiena-bualu etshi to.

“Mvita mu diulu”

 Tshikondo kampanda, Satana uvua mua kuendakana miaba ya mu nyuma muvuaye musue, ne uvua mua kubuela pende kumpala kua Nzambi muvua banjelu bakuabu ba lulamatu benza. (Yobo 1:6) Kadi Bible wakamba ne: kuvua ne bua kuikala “mvita mu diulu,” ne mvita ayi ivua ipatshisha Satana mu diulu ne ‘imueleshisha panshi pa buloba.’ (Buakabuluibua 12:7-9) Dilondangana dia malu a mu Bible ne malu adi enzeka pa buloba bidi bijadika ne: mvita ya mu diulu ayi ikadi mimane kuenzeka. Lelu Diabolo ukadi lua pabuipi ne buloba.

 Bidi biumvuija ne: Diabolo mmusombele muaba kampanda pa buloba buetu ebu anyi? Tshilejilu, badi bamba bua tshimenga tshia kale tshia Pêgamo ne: tshivua “muaba udi nkuasa wa bukalenge wa Satana” ne tshivua “muaba udi Satana musombele.” (Buakabuluibua 2:13) Bidi bimueneka bimpe ne: biambilu ebi bidi bileja ne: mu tshimenga atshi ke muvua ntendelelu wa Satana muase miji. Bible udi wamba ne: Diabolo udi ukokesha “makalenge onso a pa buloba budi bantu basombele,” nanku ki mmusombele muaba kampanda wa pa buloba udi umueneka ne mêsu to, kadi mbamuele lua pabuipi ne buloba.​—Luka 4:5, 6.