Batu bambila bantu ba bungi ne: mbikole bua kumanya muntu uvua mufunde Bible. Kadi pende Bible udi uleja bimpe bantu bavua bafunde malu adimu. Tshilejilu, bimue bitupa bia mu Bible bidi bituadija ne biambilu ebi: “Aa mmêyi a Nehemiya,” ‘tshikena kumona tshia Yeshaya,’ ne “dîyi dia Yehowa diakalua kudi Yoele.”​—Nehemiya 1:1; Yeshaya 1:1; Yoele 1:1.

 Bafundi ba Bible ba bungi badi bajadika ne: Yehowa Nzambi umuepele mulelela ke uvua mubalombole bua kufunda Bible. Baprofete bavua bafunde Mifundu ya mu tshiena Ebelu badi batela tshiambilu tshia ne: “Mona tshidi Yehowa wamba” misangu mipite pa 300 (Amosa 1:3; Mika 2:3; Nahuma 1:12) Bafundi bakuabu bakapeta mukenji wa kudi Nzambi ku diambuluisha dia banjelu.​—Zekâya 1:7, 9.

 Bantu batue ku 40 ke bavua bafunde Bible mu bidimu 1 600. Bamue ba kudibu bakafunda mikanda mipite pa umue. Bushuwa, Bible mmuenza ne mikanda mikese 66. Mikanda 39 ya kumpala nya mu Mifundu ya mu tshiena Ebelu idi ba bungi babikila ne: Dipungila Dikulukulu, ne mikanda 27 ya ndekelu nya mu Mifundu ya mu tshiena Greke ya buena Kristo idibu babikila ne: Dipungila Dipiadipia.