Kasumbu kaludiki nkasumbu kakese ka bena Kristo bashindame badi bapesha Bantemu ba Yehowa ba buloba bujima buludiki. Bena mu Kasumbu kaludiki badi ne midimu minene ibidi:

•   Badi batangila mudimu wa kulongolola malongesha a mu Bible adi apatuka mu mikanda, mu bisangilu, ne mu tulasa tua Bantemu ba Yehowa.​—Luka 12:42.

•   Badi batangila mudimu wa Bantemu ba Yehowa wa buloba bujima pa kulongola mudimu wetu wa kuyisha ne kutangila ditula dia mapa bimpe.

 Kasumbu kaludiki kadi kalonda tshilejilu tshia ‘bapostolo ne bakulu ba ku Yelushalema’ ba mu bidimu lukama bia kumpala, bavua bangate mapangadika manene bua tshisumbu tshijima tshia bena Kristo. (Bienzedi 15:2) Anu bu balume ba lulamatu abu, bena mu Kasumbu kaludiki ki mbamfumu ba bulongolodi buetu to. Badi bakeba buludiki mu Bible, bamanye ne: Yehowa Nzambi mmuteke Yezu Kristo ku mutu kua tshisumbu.​—1 Kolinto 11:3; Efeso 5:23.

 Mu Kasumbu kaludiki mudi Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, ne Jeffrey Winder. Badi benza mudimu ku biro bietu binene bia buloba bujima ku Warwick mu New York (mu États-Unis).

 Kasumbu kaludiki nkateke komite isambombo bua kutangila malu mashilashilangane a mudimu wa Bantemu ba Yehowa. Muena mu Kasumbu kaludiki yonso udi wenza mudimu mu komite umue anyi ya bungi.

•   Komite wa balombodi: Utu utangila bilumbu bia ku tubadi ne wambuluisha padiku bikumina, padibu bakengesha Bantemu ba Yehowa bua ditabuja diabu, ne padi nsombelu mikole ibatulukila.

•   Komite wa bena malu a ku Betele: Utu utangila dilongolola dia malu bua bena mu dîku dia Betele.

•   Komite wa dipatula bintu bietu: Utu utangila mudimu wa kupatula mikanda ya malu a mu Bible ne kuyituma miaba mishilashilangane. Utu utangila kabidi mudimu wa kuibaka miaba ya kudisangishila, biro bia dikudimuna mikanda, ne nzubu ya Betele.

•   Komite wa mudimu: Utu utangila mudimu wetu wa kuyisha ‘lumu luimpe lua Bukalenge.’​—Matayi 24:14.

•   Komite wa dilongesha: Utu utangila mudimu wa dilongolola malu a mu nyuma atubu balongesha mu bisangilu, mu tulasa, ne mu ndongamu ya mêyi makuata ne mu filme.

•   Komite wa difunda: Utu utangila mudimu wa dilongolola malu a mu nyuma atu apatuka mu mikanda ne mu site wetu wa Enternete. Utu utangila kabidi mudimu wa dikudimuna.

 Pa kumbusha mudimu udibu benza mu komite ayi, bena mu Kasumbu kaludiki batu badisangisha lumingu luonso bua kukonkonona majinga a bulongolodi bua Bantemu ba Yehowa. Mu tshisangilu atshi, batu bakonkonona tshidi Bible wamba, balekela nyuma muimpe wa Nzambi ubalombola padibu badienzeja bua kuangata mapangadika mu buobumue.​—Bienzedi 15:25.

 Bena Kristo ba kueyemena ke badi bambuluisha komite ya Kasumbu kaludiki. (1 Kolinto 4:2) Badi ne mamanya ne mbapiluke mu midimu idi komite udibu babateke utangila; batu babuela mu tshisangilu tshia komite au lumingu luonso. Nansha mudibu kabayi bangata mapangadika, badi bafila ngenyi ne baleja bualu buonso budi ne mushinga. Badi benza muabu muonso bua mapangadika adi komite wangata akumbane bimpe, pashishe badi batangila bipeta biawu ne mudiwu aya kumpala. Badi kabidi mua kubasungula kudi Kasumbu kaludiki bua kukumbula bana betu ba miaba mishilashilangane anyi bua kuenza midimu mu bisangilu bia ku tshidimu ne mu difila dia mapoloma a Kalasa ka Gilada.