Mvua muledibue mu Tirana, tshimenga tshikulu tshia Albanie. Tuvua balanda mu dîku dietu. Tatu uvua muena bululame uvua wenza mudimu mêba a bungi bua kutukumbajila majinga etu. Nansha nanku, makuta avuaye upeta au kaavua anu akumbana bua kutukumbajila majinga etu to. Pantshivua muana, bivua binsama ku muoyo bikole bua mutuvua balanda. Pantshivua mupuele, tshivua ne bisabata, ne tshivua ndia ngukuta to.

 Ngakatuadija kuiba pantshivua mupuekele. Mvua ndiambila ne: ndi ngiba anu bua kuambuluisha dîku dietu. Ndekelu wa bionso, bampulushi bakankuata. Mu 1988, pamvua ne bidimu 14, tatu wakantuma mu kalasa ka dishintulula bikadilu. Ngakenzamu bidimu bibidi, meme kulonga mudimu wa kuosha biamu. Pangakumbukamu, mvua musue kuikala ne bululame mu nsombelu wanyi, kadi tshivua mpeta mudimu to. Mu Albanie, bantu ba bungi bavua balofu bua bimvundu bia malu a tshididi. Bu mumvua mutekete mu maboko, ngakatuadija kusomba ne balunda banyi ba kale ne kuiba kabidi. Ndekelu wa bionso, bakatukuata ne balunda banyi abu, bobu kutukosela tshibawu tshia buloko bua bidimu bisatu.

 Pangakapatuka mu buloko, ngakatungunuka ne kuenza buenzavi. Malu a mpetu mu Albanie kaatshivua enda bimpe to, muvua ndululu ya bungi. Mu tshikondo tshia ndululu atshi, ngakapeta makuta a bungi mu dienza midimu ivuabu bakandike mu ditunga. Panyima pa tuetu bamane kuiba ne bingoma ku bianza, bakakuata babidi ba ku balunda banyi, meme kunyema mu ditunga bua tshienji buloko bua bidimu bia bungi to. Tshikondo atshi, nkavua musele Julinda, tuetu kulela muana.

 Tuetu kuya kusombela mu Angleterre. Mvua ne dijinga dikole dia kutuadija nsombelu mupiamupia ne mukajanyi ne muananyi, kadi bivua bikole bua kushintulula bikadilu bianyi bia kale abi. Meme kubuelakana kabidi mu malu a buenzavi, musangu eu mvua mpana diamba. Mvua mpeta makuta a bungi menemene.

 Mmunyi muvua Julinda umvua bua mumvua mpana diamba? Tumulekelayi atulondele: “Ndi mukolele mu Albanie, mvua ngela anu meji a kuepuka bulanda. Mvua mudiakaje bua kuenza tshionso tshivua tshikengela bua kuikala ne nsombelu muimpe. Mvua ngela meji ne: makuta neatupeteshe nsombelu muimpe, ke meme kuitaba bua Artan ikale ushima, wiba, ne upana diamba bualu bivua bitupetesha makuta.”

 Pashishe mu 2002, nsombelu wetu wakashintuluka. Bionso bituvua tuelela meji ne balongolole bua kuenza kabiakakumbana to. Bakankuata muambule diamba dia bungi menemene mu mazuwa, bobu kungela kabidi mu buloko.

 Bible wakatuadija kushintulula nsombelu wanyi kumpala kua meme kujingulula bualu abu. Mu 2000, Julinda wakatuilangana ne Bantemu ba Yehowa, yeye kutuadija kulonga nabu Bible. Kuyukila malu a mu Bible kakuvua kunsankisha meme to, kuvua kuntondesha nsombelu. Kadi Julinda yeye uvua munange kulonga Bible bikole. Udi wamba ne: “Ndi mukolele mu dîku divua ditendelela Nzambi, nunku mvua munange Bible ne mmunemeka bikole. Mvua anu musue kumanya tshidiye ulongesha, ke bualu kayi mvua musanke bikole bua kumulonga ne Bantemu. Malongesha a mu Bible a bungi avua umvuika bimpe be! Malu amvua mulonge akangambuluisha bua kushintulula amue malu mu nsombelu wanyi. Kadi tshivua mushintulule mushindu umvua mmona makuta to, bivua nanku too ne pakakuatabu Artan. Bualu abu buakashintulula ngelelu wanyi wa meji yonso. Diakamue, meme kushisha kumvua ne: tshivua Bible wamba bua makuta ntshilelela. Tuvua benze ne muetu muonso bua tuikale babanji, kadi kabivua bitupeteshe disanka to. Meme kumona ne: bivua bikengela ntumikile mikenji ya Nzambi ne muoyo mujima.”

 Mu 2004, pangakapatuka mu buloko, ngakatuadija kabidi kupana diamba. Kadi Julinda ukavua mushintulule ngelelu wende wa meji. Wakangambila bualu bukuabu buvua bungeleshishe meji bikole ebu: “Tshiena kabidi dijinga ne makuta ebe to. Wewe ke undi nende dijinga, ndi musue tatu wa bana banyi ikale pabuipi nabu.” Biakansama ku muoyo bikole kadi uvua muambidilamu. Mvua muenze bidimu bia bungi kule ne dîku dianyi. Ngakela kabidi meji a makenga a bungi amvua mupete bua makuta mapetela mu njila mubi. Nunku ngakangata dipangadika dia kushintulula bikadilu bianyi ne kukosa malanda ne balunda banyi bakale.

 Nsombelu wanyi wakashintuluka bikole pangakaya mu tshisangilu kampanda tshia Bantemu ba Yehowa ne mukajanyi ne bana banyi ba balume babidi. Biakankemesha bikole bualu ngakatuilanganamu ne bantu ba muoyo muimpe, bikale balunda ba bushuwa. Meme kushisha kutuadija kulonga Bible.

 Ngakalonga mu Bible ne: “Dinanga dia makuta didi muji wa malu mabi a mishindu yonso, ne bua dipatshila dinanga edi, bamue bantu . . . mbadisunsule mubidi mujima ne tunyinganyinga tua bungi.” (1 Timote 6:9, 10) Bilondeshile nsombelu umvua nende, ngakadimuenene ne anyi abidi bulelela bua mvese au. Ngakanyingalala bikole bua nsombelu mubi umvua nende ku kale au bualu uvua munkebele meme ne dîku dianyi ntatu. (Galatiya 6:7) Pangakalonga ne: Yehowa ne Muanende Yezu Kristo mbatunange, ngakatuadija kushintulula bikadilu bianyi. Meme kutuadija kuteka majinga a bakuabu pa muaba wa kumpala, mmumue ne: mpitshisha dîba dia bungi ne dîku dianyi.

 Ndi mupete mabenesha a bungi bu mumvua mutumikile mubelu wa mu Bible eu: “Nsombelu wenu kikadi wa dinanga dia makuta, kadi nusanke ne bintu binudi nabi.” (Ebelu 13:5) Mpindieu ndi ne ditalala dia mu muoyo ne kondo ka muoyo katoke. Mbipeteshe disanka dintu tshiyi muanji kupeta mu nsombelu wanyi to. Dibaka dianyi ndikole ne dîku dianyi didi mu buobumue.

 Kumpala, mvua ngela meji ne: bu tuetu bikale ne makuta a bungi, tuvua mua kuikala ne disanka. Mpindieu ndi mumone bimpe ne: dinanga dia makuta ne dienza dia malu mabi mbinkebele kanyinganyinga ka bungi. Katuena babanji to, kadi ndi mumanye ne: tudi bapete tshintu tshia mushinga wa bungi mu nsombelu wetu, mmumue ne: malanda etu ne Yehowa. Tudi tumutendelela mu dîku ne bidi bitupetesha disanka didi kadiyi kuamba.