Nabutwidilwe mu Santo Domingo, République Dominicaine, mukala wa mu bana baná. Bambutwile bami bādi bafundijibwe biyampe kadi bādi basaka kutamija babo bana mu bukata mwa bantu bayampe. Myaka iná kumeso kwa ami kubutulwa, bambutwile bami bētene na bamishonele ba Mormon. Pa kutengwa na dyangi ne muswelo muyampe wādi na bano bansongwalume, ponka’po bambutwile bami bakwata butyibi bwa amba kisaka kyetu kibadilwe mu bisaka bibajinji bya pa kisanga byātwelele mu Kipwilo kya Yesu Kidishitu kya Basanto ba mu Mafuku a Mfulo, nansha Kipwilo kya Mormon.

Ami pa kutama nasanswa byadi bilongwa ku kipwilo, nata mutyima ku kulēmeka būmi bwa kisaka kya Bamormon ne misoñanya ya mu mwikadilo. Nādi netemba kwikala Mormon kadi netungila kitungo kya kwikala mishonele.

Ami pa kubwanya myaka 18, kisaka kyetu kyavilukila ku États-Unis na mulangwe wa amba nkafunde ku masomo mayampe a inivelesite. Kintu kya mwaka umo pa kupita’po, mwanabo na mama mwana-mukaji ne muyomba, abo bonso Batumoni ba Yehova, baiya kwitupempula ku Florida. Betwita tukatanwe nabo ku kitango. Nātengelwe pa kumona muntu yense wādi kubwipi nami utala bisonekwa ne kulemba. Kupwa nalomba bike ne papye, nami nashilula kulemba.

Kitango pa kupwa, mwanabo na mama mwana-mukaji ne muyomba baunena’mba, byonādi nsangedile kwikala bu mishonele, babwanya kunkwasha kwifunda myanda kampanda ya mu Bible. Nāmwene amba i mulangwe muyampe mwanda mu kine kitatyi’kya nādi nekwete’ko na kutanga Dibuku dya Mormon kupita’ko Bible.

Kitatyi kyotwādi twisambila pa Bible ku telefone, mwanabo na mama mwana-mukaji ne muyomba bādi bankankamika nyeke kudingakanya nkulupilo yami na bufundiji bwa Bible. Bādi basaka nsokole bubinebine ami mwine.

 Kwādi bintu bivule bitala lwitabijo lwa Mormon, ino nkyādipo ndyukile shi bikwatañene na Bisonekwa. Mwanabo na mama mwana-mukaji wauntumina nimelo ya Réveillez-vous ! ya mafuku 8 Kweji 11, 1995 yālupwilwe na Batumoni ba Yehova, mudi bishinte bimo bisambila pa nkulupilo ya Mormon. Nātulumukile pa kuyuka’mba nkyadipo ndyukile mfudijo mivule ya Mormon. Kino kyāuntonwene nkakimbe pa diteba dya Entelenete dya Mormon mwanda wa kuyuka shi byobya byādi binenwe mu Réveillez-vous ! byādi bya bine. Ino byādi bya bine, kadi nēmwenine buno bubinebine kitatyi kyonākatadile mu mobo a Mormon a bintu bya kala adi mu Utah.

Nādi nyeke nkulupile’mba Dibuku dya Mormon ne Bible kebipatanyangapo. Ino kitatyi kyonāshilwile kutanga Bible na kininga, namona kwishila kudi pa bukata bwa mfudijo ya Mormon ne byobya binena Bible. Kimfwa, Bible unena mu Ezekyele 18:4 amba muya ufwanga. Inoko Dibuku dya Mormon dinena mu Alma 42:9 amba: “Muya keubwanyapo kufwa.”

Kutentekela pa lufundijo lwishile, nādi nkambakanibwa na milangwe ya kufwila muzo yādi ifundijibwa na Bamormon. Kimfwa, Bamormon bādi bafundijibwa amba budimi bwa Edena bwādi mu Missouri, États-Unis, mu buledi bwa Jackson. Kadi bapolofeto ba kipwilo banenanga amba “Bulopwe bwa Leza bukaludika ntanda yonso kupityila ku umbikalo wa États-Unis.”

Nādi neipangula muswelo wādi wa kumona yetu ntanda—nansha ntanda mikwabo yo-yonso—luno lufundijo. Nēsambīle pa uno mwanda na nkasampe umo wa Mormon wādi ufundijibwa kwikala bu mishonele wāungityile bufuku ku telefone. Namwipangula pampikwa kafinda shi uketabija kulwa na banababo Bamormon shi yabo ntanda ilwa divita na ntanda mikwabo. Nātulumukile paānondolwele amba ubwanya kulwa! Nabandaula mu bufundiji bonadi ngitabije kupwa nakepangula bendeji ba Kipwilo kya Mormon. Baunondolola amba malondololo a bipangujo byami i kikata kifyame kikasokolwa difuku dimo pamo bwa mwinya wakamba.

Pa kutyumunwa mutyima na nshintulwilo yabo, nashilula kwibandaula ne kubandaula kine kyonādi nsakila kwikala bu mishonele wa Mormon. Najingulula amba nākokelwe na mulangwe wa kwikala bu mishonele mwanda’tu wa kwikala muntu ukwasha bantu bakwabo. Nādi nsaka kwikala bu mishonele mwanda wa kulēmekwa na bantu. Ino pa myanda itala Leza, nkyādipo ndyukile myanda mivule imutala. Nansha byonādi ntanga Bible kitatyi kivule pa kala, ino nkyādipo mumwene na mvubu. Nkyādipo ndyukile mpango ya Leza itala ino ntanda ne bantu.

Kupityila ku kwifunda Bible na Batumoni ba Yehova, nefundile’ko bintu bikwabo kimfwa dijina dya Leza, bitufikilanga potufwanga ne mwingilo wingila Yesu mu kufikidija mpango ya Leza. Pano najingulula senene dino dibuku dya kutendelwa kadi nsangedile kusapwila bakwetu bubinebine bonefundile. Nādi ndyukile nyeke amba Leza udi’ko, ino pano mbwanya kwisamba nandi mu milombelo pamo bwa mulunda nami muyampe. Nabatyijibwe ne kwikala Kamoni wa Yehova mu mafuku 12 Kweji 7, 2004, kadi myeji isamba pa kupita’po nashilula kwingila mwingilo wa bwine Kidishitu wa kitatyi kyonso.

Naingile ku kitako kya Batumoni ba Yehova kidi mu Brooklyn, New York mu myaka itano. Nasangele bininge pa kukwasha ku kulupulwa kwa Mabible ne mabuku esambila pa Bible amwena’mo midiyo ne midiyo ya bantu kujokoloka ntanda yonso, kadi nekyendelela kukwasha bakwetu befunde myanda ya Leza.