SHI WAKAPEMPWILE kisanga kityetye kya Sangir Besar mu Indonezi pano kepadi myaka kampanda, ye uno wamwene bakaka betu basatu mu kyabu. Bayukene bininge pa kino kisanga pa mwanda wa mwingilo wabo wa busapudi—wa kukwasha bantu bevwanije Bible. Inoko mu kine kitatyi’kya, badi bengila’mo mwingilo mukwabo.

Dibajinji, badi baboya mabwe makatampe mu dijiba ne kwiya nao mu kyabu. Mabwe amo adi makatampe kutabuka futu. Kupwa, bano bana-bakaji bashikata pa tubibasa, kebalala mabwe makata’a na sando, aikala matyematye kutabuka bukata bwa mai a nzolo. Ebiya, baomeka mabwe matyematye’a mu mambeketyi a plastike, bakanda nao nkala, bakeatūla kobadi bashikata. Kupwa, baomeka’o mu bimifuko bikatampe bibwanya kukandijibwa ku motoka ne kwingidijibwa bu bya kulongolola nabyo mashinda.

Umo pa bano bakaka dyandi i Hulda. Ngikadilo yandi yamulengeje apityije kitatyi kivule mu uno mwingilo kutabuka bakwabo. Mafuku onso wadi wingidija lupeto lwaadi usokola mu kano kaji mwanda wa kuvuija bisakibwa bya difuku ne difuku bya kyandi kisaka. Inoko pano, waingile na kitungo kikwabo mu ñeni. Wadi usaka kupota tabulete mwa kutwelela pa JW Library^®. Hulda wayukile amba mavideo ne myanda mikwabo idi’mo, bikamukwasha alumbulule mwingilo wandi wa busapudi ne kwifunda Bible ne kumwivwanija.

Hulda waingidile’ko mansá abidi difuku ne difuku mu bula bwa kweji umo ne kipindi. Walala mabwe ayula motoka mutyetye. Ku mfulo, wasokola lupeto lwa kupota tabulete.

Hulda unena’mba: “Nansha byonakōkele bininge mu ngitu ne kwivwana misanshi, bukidi bonka naidilwe ino misanshi yonso ponashilwile kwingidija tabulete mipya mwanda wa kunkwasha nsapule senene ne kupēlelwa kuteakanya kupwila.” Kadi wanenene amba, tabulete yamukweshe elunge na banababo mu kipwilo mwanda wa kusapula ne kupwila mu kitatyi kya kipupo kya Corona. Bine tusangele pamo na kaka Hulda byaafikīle pa kitungo kyandi.