Mwendele Mako 12:1-44
12 Penepo washilula kwisamba nabo na byelekejo amba: “Muntu umo wadimine budimi bwa mañanza+ ne kwibujokoloja mu lupango kadi wakola’mo kīna kya kyengelo kya vinyu ne kushimika’mo kiteba;+ penepo washila’bo babidimye kupwa waenda ku ntanda ingi.+
2 Ebiya, kitatyi pa kubwana watuma umpika umo kudi babidimye kukakongakanya bipa bimo bya mu budimi bwa mañanza kobadi.
3 Ino abo bamukwata, bamukupila ne kumujokeja makasa bitupu.
4 Kadi webatumina umpika mukwabo, uno nandi bamulala mitotole ku mutwe ne kumufutulula.+
5 Penepo watuma’ko mukwabo, ne aye mwine bamwipaya, kadi watuma’ko ne bavule bakwabo, bamo bebakupila, bangi nabo bebepaya.
6 Wadi ukidi na mukwabo umo, mwana muswedibwe.+ Webatumina’ye wa mfulo, kanena’mba, ‘Basa kulēmeka wami mwana.’
7 Ino boba babidimye kebanena abo bene na bene amba, ‘Uno’u ye mpyana.+ Iyai, tumwipayei, ne bupyani bukekala ke bwetu.’
8 Penepo bamukwata, bamwipaya, ne kumwela bamwela panja pa budimi bwa mañanza.+
9 Le mwinē budimi bwa mañanza ukalonga bika? Ukāya kwipaya babidimye, ne kupāna budimi bwa mañanza’bwa ku bantu bangi.+
10 Lelo kashā kemwatangile kino kisonekwa’mba: ‘Dibwe dyapelelwe na bōbaki, e dyo dyaalamuka ke dibwe dinedine dya difinko.*+
11 Kino kitamba kudi Yehova,* kadi i kya kutendelwa mu meso etu’?”+
12 Penepo badi bakimba kumukwata,* ino badi batyina kibumbo, mwanda bayukile’mba i abo bawanena mu kyelekejo. Penepa bamuleka kebenda.+
13 Kupwa bamutumina Bafadiseo bamo ne bamobamo ba mu kitango kya balondi ba Heloda mwanda wa kumukwata mu binenwa byandi.+
14 Abo pa kufika bamunena’mba: “A Mufundiji, tuyukile amba wi muntu wa binebine kadi kwifukwijangapo ku muntu nansha umo, mwanda abe kutalangapo mumwekela bantu panja, ino ufundijanga dishinda dya Leza kukwatañana na bubine. Lelo kufuta Kesala musonko wa muntu ne muntu i kijila’ni, ke kijilapo?*
15 Le tufuta’ni, ketufutapo?” Pa kujingulula buzazangi bwabo, webanena’mba: “Kyomuntompela i kika le? Ndetelei bidi ndenadi* imo ntale.”
16 Baleta’ko imo, nandi webanena’mba: “Le kino kifwatulo ne kilembwa i bya ani?” Nabo amba: “I bya Kesala.”
17 Penepo Yesu wanena’mba: “Futai bintu bya Kesala+ kudi Kesala, ino bintu bya Leza nabyo kudi Leza.”+ Nabo ne kwana kebamwana.
18 Ebiya Basadusea, bene banenanga’mba kekudipo lusangukilo,+ baiya kebamwipangula’mba:+
19 “A Mufundiji, Mosesa wētulembēle amba shi mwanabo na muntu wafu washiye mukaji ino kashilepo mwana, mwanabo ufwaninwe kusela mukaji’wa ne kulangwila mwanabo lutundu.+
20 Kwadi bana-balume basamba-babidi ba munda mumo. Mubajinji wasonga mukaji, ino paafwile kashilepo lutundu.
21 Penepo wa bubidi wamusonga ino wafwa kwampikwa kushiya lutundu, ne wa busatu nandi monka na monka.
22 Kadi bonso basamba-babidi kebashilepo lutundu nansha lumo. Mfulo mfulō, ne mwana-mukaji mwine wafwa.
23 Le ku lusangukilo, ukekalanga mukaja ani? Mwanda abo bonso basamba-babidi baikele nandi bu mukaji.”
24 Yesu webanena’mba: “Mwene ye papo pomwitupile’byo, mwanda kemuyukilepo ne Bisonekwa ne bukomo bwa Leza bwine?+
25 Mwanda shi abasanguka mu bafwe, bana-balume kebasoñangapo nansha bana-bakaji kusongwa, ino badi pamo bwa bamwikeulu momwa mūlu.+
26 Inoko pa mwanda utala kusanguka kwa bafwe, le kemwatangile mu mukanda wa Mosesa, mu nsekununi ya kimuna kya miba, amba Leza wāmunenene amba: ‘Ami ne Leza wa Abalahama, Leza wa Izake, ne Leza wa Yakoba’?+
27 Aye i Leza wa bōmi, ke wa bafwepo, aa. Mwi betupe’byo mpata.”+
28 Musonekeji umo waile webevwana bepatanya, pa kuyuka’mba webalondololanga bilumbuluke shē, wamwipangula’mba: “Lelo mbila mibajinji* mu yonso i mbila’ka?”+
29 Yesu walondolola’mba: “Mibajinji i ino, ‘Teja’po, a Isalela, Yehova* Leza wetu i Yehova* umo kete,
30 kadi sanswa Yehova* Leza obe na mutyima obe onso, na muya* obe onso, na ñeni yobe yonso, ne na bukomo bobe bonso.’+
31 Ya bubidi i ino, ‘Sanswa mukwenu mowisanshilwe abe mwine.’+ Kekudipo mbila mikwabo mikatampe kutabuka ino’i.”
32 Musonekeji’wa wamunena’mba: “Mufundiji ubanena biyampe, kukwatañana na bubine, ‘Aye i Umo kete, kadi kekudipo mukwabo poso’nka aye’;+
33 kadi kumusanswa na mutyima onso, na ñeni yonso, ne na bukomo bonso kadi muntu kusanswa mukwabo mwaesanshilwe aye mwine i kupite buya kutabuka byamulambu bisōkwe bituntulu ne bitapwa byonso.”+
34 Ponkapo, Yesu pa kujingulula’mba walondolola bya ñeni, wamunena’mba: “Kudipo kulampe na Bulopwe bwa Leza.” Ino kekwadipo kadi wadi monka na bukankamane bwa kumwipangula.+
35 Inoko, Yesu paadi ukifundija mu tempelo, wanenene amba: “Le i namani basonekeji banenanga’mba Kidishitu i mwanā Davida?+
36 Davida mwine wānenene mu mushipiditu ujila’mba:+ ‘Yehova* wanenene Mfumwami amba: “Shikata ku kuboko kwami kwa lundyo enka ne byontūla balwana nobe munshi mwa maulu obe.”’+
37 Davida mwine umwita bu Mfumwami, le penepo bibwanika namani ekale wandi mwana?”+
Kadi kibumbo kikatampe kyadi kimuteja na nsangaji.
38 Penepo mu bufundiji bwandi wanena kadi amba: “Dyumukai basonekeji basakanga kunangakana mu minkukumba, basakanga kwimunwa mu mansoko+
39 ne bityi bya kumeso* mu mashinankonka ne byaba bya bulēme mpata ku bidibwa bya kyolwa.+
40 Basasamunanga mobo a* bakaji ba kishala, kadi balombelanga milombelo milampe mwanda wa kwimwekeja.* Bano’ba bakatyibilwanga butyibi busansa* bininge.”
41 Penepo washikata utadidile ku bilambwilo,*+ washilula kubandila mwadi mwelela kibumbo lupeto mu bilambwilo, kadi bampeta bavule badi bela’mo bityele bingi.+
42 Ebiya, mukaji umo wa kishala mulanda waiya waela’mo tubityele tubidi twa bulēme butyetye bininge.*+
43 Penepa waita bandi bana ba bwanga kaebanena’mba: “I bine nemulombola’mba uno mukaji wa kishala mulanda waela’mo kutabuka bonso baela lupeto mu bilambwilo.+
44 Mwanda bonso abaela’mo bya musubu byabo, ino aye, mu bufudile* bwandi, waela’mo tonso twaadi nato, tonso twa kumukwasha mu būmi.”+
Kunshi kwa Dyani
^ Kishima pa kishima i, “mutwe wa difinko.”
^ Nansha’mba “kumukuta.”
^ Nansha’mba “i kyendele’mo’ni ke kyendele’mopo?”
^ Tala Mbwejo B14.
^ Nansha’mba “itabukile bulēme.”
^ Tala Nshintulwilo ya Bishima.
^ Nansha’mba “bilumbuluke.”
^ Nansha’mba “bintu bya.”
^ Nansha’mba “mwanda wa kabepelo.”
^ Nansha’mba “bulēma.”
^ Nansha’mba “bintu.”
^ Kishima pa kishima i, “lepitoni ibidi, kwadran imo.” Tala Mbwejo B14.
^ Nansha’mba “bulanda.”
