LE ANO MAVESE A MU BIBLE ASHINTULULA BIKA?

Bene Loma 10:13—“Muntu Yense Ukabija Vidye Mukulu Ukapanda”

VUMIJA MU

“Ense wa kwita dijina dya Yehova ukapandanga.”—Bene Loma 10:13, Bwalamuni bwa Ntanda Mipya.

“Muntu yense ukabija Vidye Mukulu ukapanda.”—Bene Loma 10:13, Dibuku Dijila.

Nshintulwilo ya Bene Loma 10:13

Leza kadipo na mboloji, i mupe bantu bonso mukenga wa kukapanda ne kukamona būmi bwa nyeke, ekale i ba mu ntanda’ka, ba lukoba’ka, nansha shi i bapebwe bulēme’ka mu kibundi. Inoko, pa kumwena mu uno mukenga, tufwaninwe kwita dijina dya Yehova, ko kunena’mba dijina dya bunka dya Leza Mwinē Bukomo Bonso. a—Ñimbo ya Mitōto 83:18.

Mu Bible, binenwa “kwita dijina dya Yehova” kebishintululapo’tu enka kuyuka dijina dya Leza ne kwidingidija potumutōta. (Ñimbo ya Mitōto 116:12-14) Ino bishintulula ne kukulupila mudi Leza ne kukimba bukwashi kwadi.—Ñimbo ya Mitōto 20:7; 99:6.

Dijina dya Leza dyādi na mvubu kudi Yesu Kidishitu. Binenwa bibajinji bya milombelo yandi ya kulondela’po i bino: “Tata wetu udi mūlu, dijina dyobe dipandulwe,” nansha’mba dikale dijila. (Mateo 6:9) Kadi Yesu wālombwele amba pa kukamona būmi bwa nyeke, tufwaninwe kuyuka, kukōkela, ne kusanswa Mwinē dino dijina.—Yoano 17:3, 6, 26.

Mwanda waka tubwanya kunena’mba Yehova ye utelelwe mu Bene Loma 10:13 mu Dibuku Dijila bu “Vidye Mukulu”? I mwanda uno vese i mupituluke mu binenwa bitanwa mu Yoela 2:32, mwine mutanwa dijina dya Leza mu bilembwa bibajinjibajinji bya Kihebelu, pa kyaba kya kitenta “Vidye Mukulu.” b

Ngikadilo yālembelwe’mo Bene Loma 10:13

Mu Bene Loma shapita 10, Bible ulombola’mo amba kwitabijibwa nansha kupelwa na Leza kwimanine pa lwitabijo ludi na muntu mudi Yesu Kidishitu. (Bene Loma 10:9) Uno mulangwe i mukwatañane na binenwa bivule bya mu bisonekwa biyukene bu Kipwanino kya Kala. Muntu ulombolanga lwitabijo na ‘kunena patōkelela,’ mwine mubadilwa ne kusapula myanda miyampe itala lupandilo lwa bakubulwa kwitabija. Ino myanda miyampe ipanga bantu bakwabo mukenga wa kwikala na lwitabijo lusakibwa pa kukamona būmi.—Bene Loma 10:10, 14, 15, 17.

Tanga Bene Loma shapita 10 ne nshintulwilo ya kunshi kwa dyani ne bilembwa bituma ku mavese angi.

a Dijina dya Leza ditanwa mu bilembwa bya kala bya Bible kintu kya misunsa 7 000. Mu Kihebelu, dijina dya Leza i dilembwe’mo mu masomo aná, ayukene bu Tetragrame. Dino dijina dyalamunwanga divule dine bu “Yehova” mu Kiluba; ino befundi bamo bedyalamunanga bu “Yahweh.”

b Bimweka bu balembi ba Bible bene Kidishitu bāingidije dijina dya Leza pobādi bapituluka mu bilembwa bya “Kipwanino kya Kala,” mwine mwādi mutanwa dino dijina. The Anchor Bible Dictionary unena’mba: “Kudi bukamoni bulombola’mba Tetragrame, Dijina dya Leza, Yahweh, dyādi mu binenwa bimo nansha byonso bya Kipwanino kya Kala bipitulukilwe mu Kipwanino Kipya pāsonekelwe dibajinji bilembwa bya Kipwanino Kipya.” (Volime 6, paje 392) Pa kuyukila’ko bivule, tala “Dijina dya Leza mu Bisonekwa bya Kingidiki bya Bwine Kidishitu” mu mbwejo A5 ya Bible wa kwifunda wa Falanse wa Bisonekwa Bijila Bwalamuni bwa Ntanda Mipya. Mbwejo C2 idi na mulongo wa malamuni a Bible engidije dijina dya Leza mu Bene Loma 10:13.