Wādi ushikete panshi, bipusu nansha bilonda bisansa biyule ngitu bā tamba ku maulu kutūla ne ku mutwe. Mutale mu ñeni, ukunkamene mutwe panshi, mapuji amuyela, pa bunka, mupungile utunya’nka ne kupanga nji imujingaila. Ushikete mu buto pa mwanda wa madilo, mulume nobe wikanya lukoba lwandi loneke na kiboyo kya kininga. Wajimija bivule kadi kafutululwa! Balunda nandi, balondakani, ne bantu ba mu kisaka abamwela. Bantu, enka ne banuke bene, bamupunika. Walanga’mba ne Yehova, Leza wandi nandi wamwalamukila, ino wetupe pa kulanga namino.—Yoba 2:8; 19:18, 22.

Uno muntu i Yoba. Leza wānenene pa mwanda wandi amba: “I kutupu muntu udi bwa aye pa ntanda.” (Yoba 1:8) Myaka mivule pa kupita’po, Yehova wādi ukimwene Yoba bu muntu ubadilwa mu bantu ba boloke butendelwa.—Ezekyele 14:14, 20.

Le nobe wikondanga na makambakano ne bufudile? Mānga ya Yoba ikokeja kukusenga mpata. Kadi ikakulengeja ujingulule ngikadila imo ifwaninwe kwikala nayo mwingidi ense wa kikōkeji wa Leza—ke bululame kadi. Shi bantu i bepāne kudi Leza na mutyima umo, bamwekejanga bululame ne kwendelela kulonga kiswa-mutyima kyandi nansha ke mu makambakano mwine. Leka Yoba etufundije’ko myanda mikwabo.

Mobimwekela, Mosesa, mwana-mulume wa kikōkeji, wālembele mānga ya būmi bwa Yoba kitatyi kityetye kupwa kwa Yoba kufwa. Mosesa, pa kuludikwa na mushipiditu wa Leza, wābwenye kusokola myanda yādi ipita pano panshi yātene Yoba, ino kadi ne myanda imo yālongekele mūlu.

Ku ngalwilo ya luno lusango, tumona mwādi mwikadile Yoba na būmi buyampe mpata kadi bwa nsangaji. Wādi mpeta, mutumbe kadi mulēmekwe mu ntanda ya Uza—bibwanika padi i kungala kwa Alabia. Wādi wabila bafundilwe bintu byandi kadi wādi witabila boba bampikwa wa kwibakwasha. Yoba ne wandi mukaji bāikele na dyese dya kubutula bana dikumi. Kutentekela pa bino, Yoba wādi muntu mukomo ku mushipiditu. Wādi ulonga buninge bwa kusangaja Yehova, pamo’nka bwa bankambulula bandi ba Abalahama, Izake, Yakoba, ne Yosefa. Pamo bwa bano bakulutuba, Yoba wāingile bu kitobo wa kyandi kisaka, wādi ulambula bitapwa kyaba ne kyaba pa mwanda wa bandi bana.—Yoba 1:1-5; 31:16-22.

Ino na mu kukopa kwa diso, lusango lwa Yoba lwāshinta. Pa kubela meso mūlu, tubayuka bintu kebyādipo padi biyukile Yoba. Bamwikeulu ba kikōkeji bādi bebungile ku meso a Leza, ino mwikeulu ntomboki Satana wātwela. Yehova wādi uyukile amba Satana wādi ufutulula Yoba muntu moloke, o mwanda Leza wēsambile na Satana na kwimanina pa bululame bwa kutendelwa bwa Yoba. Satana wālondolola na kimpwa-moyo amba: “Le Yoba utyinanga Leza bitupu? Le kumusailepo lusao lwa kumukinga aye ne njibo yandi ne bintu byonso byadi nabyo?” Satana ushikilwe bantu ba bululame. Mwanda ponso pobepāna na mutyima onso kudi Yehova Leza, balombolanga patōka’mba Satana i ndalandala wa nshikani. O mwanda Satana wānenene ukoma’mba Yoba wingidilanga Leza na madīla’mo. Kadi Satana wālangile amba shi Yoba ajimije byonso, usa kufinga Yehova ku mpala yandi!—Yoba 1:6-11.

Yoba ye uno kādipo uyukile kino, ino Yehova wāmupele dyese dikatampe: Dya kubepulula Satana. Ebiya bapa Satana lupusa lwa kusela Yoba byonso byaādi nabyo. Inoko kādipo ufwaninwe kutenga Yoba mwine. Ne kwija mpika Satana wēkwata’ko na wandi mwingilo wa nshikani. Mu difuku dimo’tu, myanda mibi mīlonde yāponena Yoba’nka bwa mvula. Bāmulombola’mba bimunanwa byandi—dibajinji bañombe ne bampunda, ke mikōko, ku mfulo ke bangamedia—byonso bibatukila mu kitulumukila. Kibi mpata, ne bengidi bandi bādi bebakumba bene bāfwa. Mu musapu umo obāsapwidile Yoba mwānenenwe amba kisumpi kimo kyāipailwe na “mudilo wa kwa Leza”—bibwanika padi i nzaji. Yoba kapwile ne kulangulukila pa myanda ya bantu baafwilwa ne ya bulanda bwamuponena, bāmusapwila mwanda usansa bibibibi. Bandi bana dikumi bādi pamo mu njibo ya mwana umbedi, penepo kwatetuka mu kitulumukila kivula kikatampe kyātema ku njibo ne kwiipomona, kyāpitula ne bandi bana bonso!—Yoba 1:12-19.

I bikomo, pakwabo kebibwanikapo kufwatakanya mwātapīlwe Yoba ku mutyima. Wāsana bivwalwa byandi, wātenda nywene, wāpona panshi. Yoba wāfula ku kunena’mba i Leza wāmupele kadi i Leza enka wasela. Na bubine, Satana wāmwekeje na bunwanwa’mba bino byamalwa byādi bitamba kudi Leza. Nansha nankyo, Yoba kāfingilepo Leza na mwānenene’kyo Satana. Ino, Yoba aye wānenene amba: “Dijina dya Yehova ditendelwe nyeke.”—Yoba 1:20-22.

Satana wākalabele mpata, ino kuleka’byo mpika. Wāenda monka kudi Yehova mu kubungakana kwa bamwikeulu. Yehova wātendela monka bululame bwa Yoba bwawālamine nansha byāmutambile Satana bulwi bonso’bwa. Satana wātentulula’mba: “Kikoba pa kikoba. Muntu ukapāna bintu byonso byadi nabyo mwanda wa būmi bwandi. Nanshi olola kuboko kobe ukupile mukupa ne ngitu yandi, na bubine ukakufinga ku mpala yobe.” Satana wādi ulanga na kusumininwa’mba shi Yoba abele bininge, usa kufinga Leza. Yehova byaadi ukulupile Yoba na mutyima umo, wāleka Satana abeleke Yoba ino kumwipaya mpika.—Yoba 2:1-6.

Na pano kala, Yoba wākupilwa bikomo, monka motwikilombwedile mu ntwelelo. Langa’po bidi wandi mukaji. Mukaji nobe i mutondwe kala na njia ya kufwilwa bandi bana dikumi, ino pano kadi kakunkumene utala wandi mulume umona dyemo! Pa kufudilwa, wānena na diwi dikatampe amba: “Le ukikwatyije pototo bululame bobe? Finga Leza ufwe!” Bine, kākidipo kadi mukaji wa kala’wa obayukile kudi Yoba ne wāasenswe. Yoba wāfula’tu ku kunena’mba mukaji wādi kaesambe bwa aye wajimija ñeni. Nansha nankyo, Yoba wāpelele kufinga Leza wandi. Kālupwilepo kishima nansha kimo kya bubi.—Yoba 2:7-10.

Le uyukile amba luno lusango lwa bulanda, alo’ko lwa bine, lukutala ne abe? Tala matope a Satana asansa mutyima, kātopekele’opo Yoba kete, ino i ne muzo onso wa muntu. Satana wānenene amba: “Muntu ukapāna bintu byonso byadi nabyo mwanda wa būmi bwandi.” Ko kunena’mba, Satana ukulupile amba i kutupu motudi’mu muntu nansha umo ubwanya kulama bululame! I munene usuminwe amba nobe kusenswepo Leza buswe bwa bine, ne amba ukanyema Leza bukidi bonka mwanda wa kwipandija. Kunena na bubine, Satana unenanga’mba nobe udi na kwisakila pamo bwa aye! Le abe usaka kumubepulula? Batwe bonso tudi na dyadyo dyese. (Nkindi 27:11) Shi ke pano tutalei kikoleja kikwabo kyāfikīle Yoba.

Bana-balume basatu bādi bayukile Yoba—batelwa mu lusango bu balunda nansha bayukane—bāivwana malwa andi, bākuta lwendo bāenda kukamupempula ne kumusenga. Abo pa kumumona dya kulampe, bātunya kumujiula. Wādi wikonda na misanshi, kikoba kyāfituluka pa mwanda wa luba, bine kākidipo Yoba wa kala’wa. Bano bana-balume basatu—ba Edifaza, Biledade, ne Zofala—bātwa’mo kiyoa, bādila beyaya ne kwitūta luvumbi ku mitwe. Kupwa bāshikata talala nyā pa nshi kubwipi na Yoba. Bāshikata’nka nabya yenga mutuntulu dyuba ne bufuku, kunena kishima nansha kimo mpika. Ketwakamona kuno kwabo kuba talala bu busengi, mwanda kebāipangwilepo Yoba kipangujo nansha kimo, byobāyukile’tu i enka byobya byobādi bemwena, ko kunena’mba misanshi mikomo yādi ikonda nayo Yoba.—Yoba 2:11-13; 30:30.

Mfulo mfulō, Yoba mwine wāshilula kunena. Mu binenwa byandi bya misanshi, wāfinga difuku dyaābutwilwe. Wāsokola buluji bwine bukatampe bwasusukila. Wālanga’mba Leza ye mwine wamuletela ano makambakano! (Yoba 3:1, 2, 23) Nansha Yoba byaādi muntu wa lwitabijo, ino wādi bine usakilwa busengi. Ino boba bayukane bandi pa kwanza kwisamba, Yoba wāmona’mba nanshi ne kuba talala kwabo kwadi kuyampe.—Yoba 13:5.

Edifaza wāshilula, padi ye wādi mukulu kwibapita kadi mukudile ne Yoba mwine. Kupwa, babidi bakwabo nabo bāmulondeja. Tukokeja kunena’mba pavule bālondele na bumvubumvu kalombwe wabo Edifaza. Bintu bimo byānenene bano bantu byādi bimweka’mba ke bibipo, mwanda byādi bipituluka mu myanda ya ku mushipiditu yānenenwe kala, amba Leza udi peulu bininge, upanga babi mfuto, ne amba upalanga bayampe mpalo. Inoko, tamba’tu ku ngalwilo, mu binenwa byabo kemwādipo kanye nansha kamo. Edifaza wāingidije mulangilo upēla unekenya, amba shi Leza i muyampe ino upanga babi mfuto, pano Yoba byapebwa mfuto, nanshi kya bine i kyepi? Le bine Yoba kalubilepo mu muswelo kampanda?—Yoba 4:1, 7, 8; 5:3-6.

Ke kya kutulumukapo shi Yoba kāmwenepo uno mulangilo biyampe. Wēupelele na bukomo bonso. (Yoba 6:25) Inoko, bano basengi basatu bādi basumininwe amba Yoba ufīle bubi kampanda bwalongele; amba i mufwaninwe kufikilwa na bibi byonso bimutene. Edifaza wātopekele Yoba amba udi na ditatu nansha kimutakwe, i mubi, kadi katyinangapo Leza. (Yoba 15:4, 7-9, 20-24; 22:6-11) Zofala wāsapwidile Yoba amba afundwile kulampe bibi ne kusangela kwasangela bubi. (Yoba 11:2, 3, 14; 20:5, 12, 13) Ino Biledade ye mwine wātapile Yoba ku mutyima. Wālangile amba bana ba Yoba bālongele bubi kampanda, o mwanda bādi bafwaninwe kufwa mobāfwidile’mwa!—Yoba 8:4, 13.

Bano bana-balume balube bālongele’nka ne kintu kibi kutabuka. Kebātatenepo enka bululame bwa Yoba, ino i ne kamweno kene ka bululame! Edifaza, mu binenwa byandi bya ñanjilo, wālombwele amba wētene mu muswelo utulumukwa na mushipiditu kampanda keumweka. Milangwe yāshele nayo Edifaza pa kupwa kwitana na ndemona’wa i ya bulembe, amba: Leza “kakulupilepo bengidi bandi nansha dimo, kadi uboyanga bamwikeulu bandi tuto.” Mungya uno mulangilo, bantu ba mashi ne mema kebabwanyapo kusangaja Leza nansha dimo! Mfulo mfulō Biledade wālanga’mba bululame bwa Yoba kebudipo na mvubu kudi Leza—pamo’nka bwa bululame bwa kivinyu!—Yoba 4:12-18; 15:15; 22:2, 3; 25:4-6.

Le kashā kodi mutompe kusenga muntu wikonda na misanshi mipitepite? Kebipēlangapo. Ino tukokeja kuboila ñeni mikatampe ku bakwabo na Yoba balube—nakampata kuyuka byobya byoketufwaninwepo kunena. Bano bana-balume basatu, mu milwi ne milwi ya binenwa byabo bikomokomo, bya mulangilo mufwe, kebātelele’mopo nansha dimo dijina dya Yoba! Kebādipo balangila nansha Yoba amba i mutapwe ku mutyima kadi kebāmwenepo ne mvubu ya kwikadila nandi biyampe mine. * Nanshi shi muntu otele mutyima watyumukwa mutyima, abe mukankamike, mute mutyima, kadi ikala nandi biyampe. Tompa kuningija lwitabijo lwandi ne kininga kyandi, umukwasha akulupile mudi Leza ne kukulupila mu kanye kandi kakatampe, mu lusa lwandi, ne mu boloke bwandi. Ye byādi bya kulongela Yoba bakwabo’ba shi abo bo bādi basusuka. (Yoba 16:4, 5) Ino aye wālongele namani pobādi bamutamba bulwi pangala pa bululame bwandi?

Yoba mulume nobe wādi kala mutyumukwe mutyima pāshilwile luno lupata lulampe. Tamba ku ngalwilo, Yoba wāitabije amba kyaba kimo binenwa byandi byādi “byampikwa kulanga” ne “binenwa bya muntu wampikwa kikulupiji.” (Yoba 6:3, 26) Ne i bine udi na bubinga. Mwanda binenwa byandi byādi bimwekeja patōka tusuwa twa ku mutyima wandi. Kadi byādi bilombola’mba kudi bivule byakayukilepo. Byamalwa byāmutene aye ne kisaka kyandi byobyāile mu kitulumukila ne byobyādi bimweka bu bipite pa ñeni ya bantu, Yoba wālangile amba Yehova ye wamuponejeja’byo. Kudi myanda mivule mine keyādipo iyukile Yoba, o mwanda milangwe yandi imoimo yādi mitupe.

Inoko Yoba wādi muntu wa lwitabijo lushimate kadi lukomo. Lwitabijo lwandi i lumweke mu myanda yaānenene mu mīsambo yandi milampe—binenwa bya bine, bilumbuluke, bitukankamika netu dyalelo. Paesambīle pa bupangi butendelwa, wātumbije Leza mu muswelo keubwanyapo muntu nansha umo pampikwa bukwashi bwa Leza. Kimfwa, wānenene amba Yehova ‘uyejanga ntanda patuputupu,’ binenwa byānenenwe mu tutwa na tutwa twa myaka kumeso kwa sianse kusola’byo. * (Yoba 26:7) Kadi pēsambīle Yoba pa lukulupilo lwandi lwa mafuku a kumeso, wāmwekeje patōka kikulupiji kyādi nakyo bantu bakwabo ba lwitabijo lukatampe. Yoba wādi ukulupile amba nansha shi lufu lubamupitula, Leza ukamuvuluka, ukekala nandi buya, kadi dyakadilwe kantu ukamusangula.—Yoba 14:13-15; Bahebelu 11:17-19, 35.

Le penepo mwanda wa bululame nao? Edifaza ne balunda nandi babidi bānenene na kusumininwa’mba bululame bwa muntu kebudipo kyobulonga ku meso a Leza. Le Yoba wāitabije uno mulangilo mubi? Nansha dimo! Yoba wānenene amba bululame budi na mvubu ku meso a Leza. Wēsambīle padi Yehova na kikulupiji kyonso amba: “Ukayuka bululame bwami.” (Yoba 31:6) Ne kadi, Yoba wāmwene patōka amba mulangilo mufwe wa basengi bandi ba bubela wādi ulwa na bululame bwandi. Kino kyālengeje Yoba anene mwisambo wandi mulampe mpata, mwine wāfudile ku kumumija byakanwa bya boba bana-balume basatu.

Yoba wājingulwile amba bululame bwandi i bwa kulonda mu būmi bwandi bwa difuku ne difuku. O mwanda wābingije mwikadilo wandi ne mulongelo wandi wa bintu. Kimfwa, wāpelele miswelo yonso ya butōtyi bwa bilezaleza; wādi ulongela bakwabo bintu na kanye ne bulēmantu; wādi na mwiendelejo wampikwa disubi, ukwatakanya busongi bwandi; ne kupityidila, wādi nyeke mwipāne na lulamato kudi Leza umo kete bine, ke Yehova kadi. O mwanda Yoba wānenene na mutyima wandi onso amba: “Enka ne byomfwa, nkikalekapo bululame bwami!”—Yoba 27:5; 31:1, 2, 9-11, 16-18, 26-28.

Lelo nobe umonanga bululame mwādi mwibumwena Yoba? I kishima’tu kipēla kutela, ino Yoba wājingulwile amba bululame ke kishimapo’tu bitupu. Tumwekejanga kwipāna kwetu kukunkane, kwa na mutyima umo kotwipēne kudi Leza na kumukōkela ne kulonga byoloke ku meso andi mu būmi bwetu bwa difuku ne difuku—nansha shi tudi mu byamalwa. Shi twikale uno muswelo, ketukabulwepo kusangaja Yehova ne kufwija walwana nandi Satana bumvu mwālongēle Yoba pa kala. Uno o muswelo mulumbuluke mpata wa kwiula lwitabijo lwa Yoba!

Inoko, lusango lwa Yoba kelwafudile. Wābudilwe bujalale, wāanza kubingija boloke bwandi wailwa’nka ne kulwila Leza wandi. Wādi usakilwa kololwa ne kukwashibwa ku mushipiditu. Ino wādi ukikonda na misanshi mikatampe ne njia, usakilwa kusengibwa bya binebine. Le Yehova wādi wa kulongela uno muntu wa lwitabijo ne bululame bika? Kishinte kikwabo kya mu uno mulongo wa bishinte kisa kulondolola bino bipangujo.