Binena Bible

 Mu Busapudi bwandi bwa Kulūlu Yesu wānenene’mo amba: “Sanswai . . . balwana nenu.” (Mateo 5:44; Luka 6:27, 35) Binenwa byandi bishintulula amba, tunenwe kulongela bintu na kanye boba betushikilwe, nansha betulongela bintu na bukondame.

 Yesu wālombwele buswe ku balwana nandi na kulekela boba bādi bamususula. (Luka 23:33, 34) Bufundiji bwandi bwisambila pa kusanswa balwana netu, bukwatañene na byobya binena Bisonekwa bya Kihebelu biyukene bu, Kipwanino Kikulu.—Divilu 23:4, 5; Nkindi 24:17; 25:21.

 “Sanswai nyeke balwana nenu ne kulombelela boba bemupangapanga.”— Mateo 5:43, 44.

Bidi mu kino kishinte

•  Mwanda waka tusanswe balwana netu?

•  Le i mu miswelo’ka imo motukalombola’mba tusenswe balwana netu?

•  Le tunenwe kukalwa divita na balwana netu?

•  Mulangwe wa bubela utala kusanswa balwana netu

•  Bisonekwa bīsambila pa kusanswa balwana netu

 Mwanda waka tusanswe balwana netu?

•   Leza i mushiye kimfwa. Leza “udi na kanye ku bampikwa kufwija’ko ne ku babi.” (Luka 6:35) “Utambijanga dyuba dyandi ku babi.”—Mateo 5:45.

•   Buswe bubwanya kulengeja walwana ashinte. Bible witusoñanya kulongela walwana bintu biyampe. Unena’mba shi ulonge namino, “ukamulundikila makala a mudilo pa mutwe wandi.” (Nkindi 25:22) Kuno kudingakanya kufunkila pa mwingilo wa kusungulula mwabwe a bulēme, ke kyuma kya bulēme. Netu, shi twikale na kanye na muntu witushikilwe, tukasungulula bulobo bwandi mu muswelo wa kyelekejo ne kumulengeja ekale muntu muyampe.

 Le i mu miswelo’ka imo motukalombola’mba tusenswe balwana netu?

•   “Longelai biyampe boba bemushikilwe.” (Luka 6:27) Bible unena’mba, “Shi walwana nobe udi na nzala, mupe byakudya; shi udi na kyumwa, mupe bya kutoma.” (Bene Loma 12:20) Ubwanya kusokola miswelo mikwabo ya kulombola buswe ku balwana, na kwingidija kyokya kiyukene biyampe bu Kijila Kitabukile Bulēme, kinena’mba: “Monka momusakila bantu bemulongele, mwibalongelei muswelo umo onka.”—Luka 6:31.

•   “Eselai boba bemufinga mafingo.” (Luka 6:28) Tubwanya kwesela bwalwana netu na kwisamba nabo biyampe ne na bulēme, nansha shi abetunena bintu bibi. Bible unena’mba: “Kemwakilubulai . . . mutonko ku mutonko. Ino eselai dyese.” (1 Petelo 3:9) Ano madingi abwanya kwitukwasha tunekenye mushikwa.

•   “Lombelelai boba bemutuka.” (Luka 6:28) Shi muntu wa kutuke, kokamwalwija “kibi ku kibi.” (Bene Loma 12:17) Inoko, lomba Leza amufwile lusa. (Luka 23:34; Bilongwa 7:59, 60) Pa kyaba kya kwaluja kinongo, shila’kyo Leza na kumuleka amulongele bintu mungya misoñanya yandi myoloke.—Bene Levi 19:18; Bene Loma 12:19.

 “Sanswai nyeke balwana nenu, longelai biyampe boba bemushikilwe, eselai boba bemufinga mafingo, lombelelai boba bemutuka.”—Luka 6:27, 28.

•   Ikala “na kitūkijetyima ne kanye.” (1 Bene Kodinda 13:4) Mu binenwa byandi bīsambila pa buswe biyukene biyampe, Polo mutumibwa mwine Kidishitu i mwingidije kishima kimo kyonka kya mu Kingidiki (a·gaʹpe) kitanwa mu binenwa bidi mu Mateo 5:44 ne mu Luka 6:27, 35. Tulombolanga buno buswe bwa bwine Kidishitu enka ne ku balwana netu na kwikala na kitūkijetyima, kanye, kwampikwa mboloji, mitatulo, nansha kibengo.

 “Buswe budi na kitūkijetyima ne kanye. Buswe kebudipo na mukao. Kebwianyangapo, kebwitatulangapo, kebuloñangapo byampikwa kwendela’mo, kebukimbangapo tumweno twa abo bwine, kebukelwangapo bulobo. Kebubalangapo bibi bilongelwe. Kebusangelangapo bukondame, ino busangalanga pamo na bubine. Butyumwinanga byonso mu manwi, bwitabijanga byonso, bukulupilanga byonso, būmininanga byonso. Buswe kebukankalwangapo nansha dimo.”—1 Bene Kodinda 13:4-8.

 Le tunenwe kukalwa divita na balwana netu?

 Aa, Yesu wāfundije balondi bandi amba, kebafwaninwepo kulwa na balwana nabo. Kimfwa, kitatyi kyāwebadyumwine amba Yelusalema usa kutambwa, kaēbalombwelepo bashale mwanda wa kulwa, ino wēbalombwele banyeme. (Luka 21:20, 21) Kadi Yesu wānenene mutumibwa Petelo amba: “Aluja kipete pokyadi, mwanda boba bonso batekuna kipete bakafwa ku kipete.” (Mateo 26:52) Bible ne myanda ya mu mānga ilombola amba, balondi ba Yesu ba mu myaka katwa kabajinji, kebādipo benda kukalwa na balwana nabo. a—2 Temote 2:24.

 Mulangwe wa bubela utala kusanswa balwana netu

 Mulangwe wa bubela: Bijila bya Leza byānenene bene Isalela bashikwe balwana nabo.

 Mulangwe wa bubela: Kusanswa balwana netu, kushintulula kwitabija bilongwa byabo bibi.

 Bubine: Bible unena’mba, tubwanya kusanswa muntu pampikwa kwitabija bilongwa byandi bibi. Kimfwa, Yesu wāpeleje bya lūma, inoko wālombēle pangala pa boba badi bamwipaya. (Luka 23:34) Kadi wādi ushikilwe kujilula bijila nansha bubi, inoko wāpēne būmi bwandi pa mwanda wa babi.—Yoano 3:16; Bene Loma 6:23.