Kaini, mwana mukulu wa ba mulume ne mukaji babajinji, wāsongele mwanabo umo mwana-mukaji nansha mwana-mukaji obabutulwa nandi bininge. Tubwanya kufula ku kunena namino na kulangulukila pa byobya binena Bible padi Kaini ne kyandi kisaka.

Bubine butala padi Kaini ne kyandi kisaka

•   Bantu bonso bātambile kudi ba Adama ne Eva. Leza “wālupwile ku muntu umo mizo yonso ya bantu ba kushikata pa ntanda yonso.” (Bilongwa 17:26) Eva, mukaja Adama, wāikele “inandya bōmi bonso.” (Ngalwilo 3:20) Nanshi, Kaini kābudilwepo kusonga mwana-mukaji obātambile nandi kudi Adama ne Eva.

•   Ba Kaini ne Abele bādi bana babajinji mu bana bavule bābutwile Eva. (Ngalwilo 4:1, 2) Pobāpangile Kaini pa mwanda wa kwipaya kwawāipaile mwanabo, wātompwele amba “muntu ense untana, bine ukangipaya.” (Ngalwilo 4:14) Le Kaini wādi ani? Bible unena’mba Adama “wābutula bana bana-balume ne bana-bakaji.” (Ngalwilo 5:4) Na bubine, bano bana bakwabo ba Adama ne Eva bādi babwanya kwikala bu kyaka kudi Kaini.

•   Ku ngalwilo kwa mānga ya muntu, bantu badi bavudile kwisonga na babutule. Kimfwa, Abalahama muntu wa kikōkeji wāsongele mwanabo wa munda mwa inandi. (Ngalwilo 20:12) Musunsa mubajinji obāpeleje kwisonga kwa uno muswelo, udi mu Bijila bya Mosesa, byātūdilwe’ko myaka tutwa na tutwa pa kupwa kwa bitatyi byāikele’ko Kaini. (Bene Levi 18:9, 12, 13) Bimweka’mba mu kine kityi’kya bana bādi babutulwa na bantu babutulwa kebādipo batanwa na malwa na mobikadile dyalelo.

•   Bible ulombola’mba nsekununi ya ba Adama, Eva, ne kyabo kisaka i mānga ya bine. Myanda itala mwilondela musuku tamba pa Adama itanwa mu mukanda wa Ngalwilo wālembelwe na Moses, ne mu bilembwa bya Ezela ne Luka, balembi ba mānga. (Ngalwilo 5:3-5; 1 Bilongwa bya Mafuku 1:1-4; Luka 3:38) Balembi ba Bible banena myanda ya Kaini pamo bwa mānga.​—Bahebelu 11:4; 1 Yoano 3:12; Yude 11.