Kishima ‘kubutulwa monka’ kifunkila pa kipwano kipya kidi pa bukata bwa Leza na muntu mwine ubutulwa monka. (Yoano 3:3, 7) Leza ulelanga boba babutulwa monka bu bandi bana. (Bene Loma 8:15, 16; Bene Ngalatea 4:5; 1 Yoano 3:1) Pamo bwa bana balelelwe, bashintanga, babadilwa mu kisaka kya Leza.​—2 Bene Kodinda 6:18.

Mwanda waka muntu ubutulwanga monka?

 Yesu wānenene amba: “Shi muntu kabutwilwepo monka, kakokejapo kumona Bulopwe bwa Leza.” (Yoano 3:3) Nanshi kubutulwa monka kuteakanyanga muntu mwa kubikela na Kidishitu mu Bulopwe bwa Leza. Buno Bulopwe buludikilanga mūlu, o mwanda Bible ulombola’mba boba ‘babutwilwe dipya’ bakatambula bupyani ‘bwibabīkilwe mūlu.’ (1 Petelo 1:3, 4) Boba babutwilwe monka i bapebwe lukulupilo lwa amba ‘bakabikalanga pamo na Kidishitu bu balopwe.”​—2 Temote 2:12; 2 Bene Kodinda 1:21, 22.

Le muntu ubutulwanga monka namani?

 Yesu pawēsambīle pa uno mwanda, wānenene amba boba babutwilwe monka ‘bakabutulwa ku mema ne ku mushipiditu.’ (Yoano 3:5) Bino binenwa bifunkila pa kubatyijibwa mu mema kupwa ke kubatyijibwa na mushipiditu ujila.​—Bilongwa 1:5; 2:1-4.

 Yesu i muntu mubajinji wābutwilwe monka. Wābatyijibwe mu Munonga wa Yodano, kupwa Leza wāmushinga māni (nansha, kumubatyija) na mushipiditu ujila. Mu uno muswelo, Yesu wābutwilwe monka bu mwanā Leza wa ku mushipiditu, na lukulupilo lwa kukajokela mūlu. (Mako 1:9-11) Leza wāfikidije luno lukulupilo paāsangwile Yesu bu kipangwa kya ku mushipiditu.​—Bilongwa 13:33.

 Bantu bakwabo babutulwanga monka, babatyijibwanga mu mema kumeso kwa kupebwa mushipiditu ujila. a Ebiya baikala na lukulupilo lwa kwenda mūlu, lwine lukafikidija Leza kitatyi kyakebasangula.​—1 Bene Kodinda 15:42-49.

Milangwe ya bubela itala pa kubutulwa monka

 Milangwe ya bubela: Muntu aye mwine ubwanya kutonga kubutulwa monka.

 Bubine: Bantu bonso badi na mukenga wa kupwana na Leza ne kumona lupandilo. (1 Temote 2:3, 4; Yakoba 4:8) Inoko, Leza ye utoñanga boba bakabutulwa dipya, nansha bashingwe māni na mushipiditu ujila. Bible unena’mba, pa kubutulwa monka “kebilondangapo musakila muntu nansha pa bukomo bwalonga, ino i musakila Leza.” (Bene Loma 9:16) Kishima ‘kubutulwa monka,’ kibwanya ne kwalamunwa bu ‘kubutulwa kutamba mūlu,’ kintu kilombola’mba boba babutulwa monka batoñwanga “mūlu,” nansha na Leza.​—Yoano 3:3, kunshi kwa dyani.