Le “Alefa ne Omeka” I Ani?

VUMIJA MU

Bilondolola Bible

“Alefa ne Omeka” i Yehova Leza Mwinē Bukomo Bonso. Bino bishima bitanwa misunsa isatu mu Bible.—Kusokwelwa 1:8; 21:6; 22:13. a

Mwanda waka Leza witela bu “Alefa ne Omeka”?

Alefa ne Omeka i masomo a mu alufabe ya Kingidiki, dibajinji ne dya mfulo, ludimi lwine lwālembelwe’mo kipindi kya Bible kivudile kwitwa bu Kipwanino Kipya, mwine mutanwa ne mukanda wa Kusokwelwa. Bifuko bidi’po ano masomo mu alufabe ya Kingidiki, i bingidijibwe mwanda wa kulombola’mba Yehova bunka bwandi i ngalwilo ne mfulo. (Kusokwelwa 21:6) I Leza Mwinē Bukomo Bonso tamba kala, kadi ukekala Leza Mwinē Bukomo Bonso nyeke ne nyeke. I aye kete udi’ko “nyeke ne nyekeke.”—Ñimbo ya Mitōto 90:2.

Le “mubajinji ne wa mfulo” i ani?

Bible i mwingidije bino bishima padi Yehova Leza ne padi Yesu wandi Mwana, inoko na buluji bwishile. Tala’tu bidi bimfwa bibidi.

Yehova unena mu Isaya 44:6 amba: “Ami ne mubajinji kadi ne wa mfulo. I kutupu Leza mukwabo poso’nka ami.” Pano Yehova ulombola’mba i Leza wa bine nyeke ne nyeke; i kutupu mukwabo poso’nka aye. (Kupituluka mu Bijila 4:35, 39) Mu uno mwanda, bishima “mubajinji ne wa mfulo” bidi na buluji bumo bonka na bishima “Alefa ne Omeka.”
Ne kadi, bishima “mubajinji [protos, ke alefapo] kadi wa mfulo [eskhatos, ke omekapo]” bitanwa mu Kusokwelwa 1:17, 18 ne 2:8. Mu ano mavese, myanda isambilwe’po ilombola’mba bino bishima bifunkila pa muntu wāfwile kupwa wāsanguka. Nanshi, ano mavese keesambilangapo padi Leza mwanda aye kabwanyapo kufwa nansha dimo. (Habakuka 1:12) Inoko, Yesu wāfwile kadi wāsanguka. (Bilongwa 3:13-15) Aye i muntu mubajinji kusangulwa mwanda wa kukekala na būmi bwa ku mushipiditu bwampikwa kufwa momwa mūlu, mwine mwadi pano “nyeke ne nyekeke.” (Kusokwelwa 1:18; Bene Kolose 1:18) Nsangukilo mikwabo yonso yaikele’ko kupityila mudi Yesu. (Yoano 6:40, 44) Kadi aye ye wa mfulo kusangulwa na Yehova aye mwine. (Bilongwa 10:40) Mu uno muswelo, i byendele’mo kwita Yesu bu “Umbajinji kadi wa Mfulo.”

Lelo Kusokwelwa 22:13 ulombola’mba Yesu i “Alefa ne Omeka”?

Aa. Mwanda yewa unena mu Kusokwelwa 22:13 kayukenepo senene, kadi mu uno shapita i munene bantu beshileshile. Polofesele William Barclay walembele pa mwanda utala kino kipindi kya Kusokwelwa amba: “Myanda keilembelwepo mu ndudi senene; . . . kadi i bikomo kuyuka mwine unena.” (The Revelation of John, Volime 2, Dijadikwe, paje 223) Nanshi “Alefa ne Omeka” utelelwe mu Kusokwelwa 22:13 ubwanya kufunkila pa Muntu umo enka utelēlwe pa kino kitenta mu mavese makwabo a Kusokwelwa—ke Yehova Leza kadi.

a Musunsa wa buná utanwa mu Kusokwelwa 1:11 mu Bible wa King James Version. Inoko, mu malamuni mavule a panopano i batalule’mo uno musunsa wa buná mwanda keudipo mu bilembwa bya kala bya Kingidiki, ino beubwejeje mu Bisonekwa mwenda mafuku.