Natamīne mu kipwilo kya Katolika mu kibundi kya Rochester, mu New York. Bambutwile bami basansene ponadi na myaka mwānda. Mu bukata bwa yenga nadi nshikata na mama mu mukenza wa balanda, ku mfulo kwa yenga nako na tata wadi mu mukenza wa bampeta. Ponamwene mama wikonda mwa kulelela bana basamba, nkesake kukwasha kyetu kisaka kikale na bupeta.

 Tata byaadi usaka ngikale na būmi buyampe, twakapempula nandi masomo a otela malēmekibwe. Kino kyansangaja kupwa neandikija’ko, na kulanga’mba i Yehova walondolola milombelo yami ya kwikala mpeta kadi na nsangaji. Nafunda mu myaka itano mwa kwendeleja otela, myanda ya busunga ne mwa kukwatakenya masosiete, koku ningila ku otela ya casino mu Las Vegas, mu kibundi kya Nevada.

 Ami pa kubwanya myaka 22, naikala mpingakani wa mwimaniji wa otela ya casino. Badi bamona bu mpeta ne bu muntu munekenye būmi, divule dine nadi ndya byakudya biyampe ne kutoma vinyu ne mālwa a bei. Balunda nami ba ku kaji badi banena’mba, “tá nyeke mutyima ku kintu kyendeja ntanda—lupeto.” Mungya mumweno wabo, lupeto lo luletanga nsangaji ya bine.

 Mwingilo wami wadi wa kulonga byonso binena bampeta badi bāya kukaya mu Las Vegas. Inoko nansha byobadi bampeta, ino badi bamweka bu kebadipo na nsangaji. Nami nashilula kwimona bu nkidipo na nsangaji. Na bubine, padi penda pavudila’ko lupeto, nadi nkezumbija mutyima bininge ne kubulwa tulo bufuku. Nashilula kulanga bya kwiipaya. Būmi bonadi’mo pa kuntyumuna mutyima, naipangula Leza mu milombelo amba, “I kwepi kombwanya kutana nsangaji ya bine?”

 Mu kine kitatyi’kya, banabetu babidi bana-bakaji Batumoni ba Yehova bavilukila mu Las Vegas. Nansha byonadi mpela mabuku abo, nadi ngitabija kutanga nabo mu wami Bible. Mu wami Bible, binenwa bya Yesu byādi bitampwe mu bityila. Byonadi ngitabija kintu kyonso kyānenene Yesu, banabetu badi besambila’nka pa binenwa byandi. Kadi nadi ntanga Bible ne ami mwine.

 Bintu bivule byonatangile byantulumwije. Kimfwa, Yesu wānenene amba: “Mu yenu milombelo, ke munenai bivule bwa bapagani, balanga amba bakatelekwa biyampe na kunena bivule.” (Mateo 6:7, Bisonekwa Bitōkele) Ino, mumpe waumpele kifwatulo kya Yesu, waunena’mba shi ulombele ku kino kifwatulo, ne kupituluka misunsa dikumi amba Tata Wetu ne misunsa dikumi amba Nakwimuna Madia, nabya Leza ukakupa buvule bonso bwa lupeto losakilwa. Ino le na kupituluka bino binenwa bimo byonka, nkyadipo wa kunena bivule? Kadi natanga ne binenwa bya Yesu bya amba: “Kemukitai muntu nansha umo pano pa nshi bu Tata, mwanda mudi ne Shenu umo enka, yewa udi momwa.” (Mateo 23:9, Dibuku Dijila) Ebiya neipangula kadi amba, ‘mwanda waka ami ne bene Katolika bakwetu twitanga bamumpe bu “Tata”?’

 Kitatyi kyonashilwile kulangulukila bininge pa būmi buyampe pano pa ntanda i kitatyi kyonatangile mukanda wa mu Bible wa Yakoba. Yakoba wālembele mu shipita wa 4 amba: “Lelo kemuyukilepo amba bulunda na ino ntanda i lwana na Leza? Nanshi, yewa ense usaka kwikala mulunda na ino ntanda wetūla ke walwana na Leza.” (Yakoba 4) Ino vese wantengele bininge i vese wa 17 unena’mba: “Shi muntu uyukile mwa kulongela kyoloke ino aye kulonga’kyo mpika, i bubi kwadi.” Ebiya naita banabetu bana-bakaji, nebalombola’mba, naleka kwingila ku otela ya casino mwanda kuntwejanga mu bintu byonkitabijepo, kimfwa makayo a kwidya lupeto ne makomwa-meso.

 Nadi nsaka kulumbulula kipwano kyami na Leza, na bambutwile bami ne na banabetu. Ebiya nesuminwa bintu bimo mu būmi mwanda wa kumona kitatyi kya kulonga namino. Inoko kushinta kekwadipo kupēla. Kimfwa, baunenene kumpa kitenta ku kaji ka ku otela ya Casino, kobadi bakunfuta mfutwa yami pabidi nansha pasatu. Ino pa kupwa kulombela pa uno mwanda, nakwata butyibi amba nkikisakilepo monka būmi bwa uno muswelo. Naleka kaji, naenda kwadi kwingila mama, nashilula kamwingilo katyetye ka kulamika masashe ku mikanda ya byakudya bya ku leshitola.

 Nansha byankweshe Bible ndyuke bintu bine bya kutangidija kumeso, nkyakidipo kadi nekyenda ku kupwila kwa Batumoni ba Yehova. Banabetu bana-bakaji bangipangula kine kyonkisanshilwepo Batumoni. Nebalondolola’mba: “I mwanda Yehova Leza wenu ukalañanyanga bisaka. Kitatyi kimo kyombwanya kushikatyila pamo na kisaka i kitatyi kya Noele ne kya kuvuluka mafuku a kubutulwa, ino banwe kemufetengapo ano mafetyi.” Ebiya umo pobadi washilula kudila, kupwa wangipangula’mba: “Le wikalanga kwepi mu mafuku makwabo a pa mwaka? Tusaka kwikala nobe pa kitatyi kyo-kyonso. Ino abe usakanga kwiya enka mu oa mafuku a mafetyi, kadi enka shi ubasake.” Binenwa byandi byantenga ku mutyima bininge, nashilula kudila nandi.

 Ami pa kuyuka’mba Batumoni ba Yehova basenswe bisaka byabo bininge, ne amba ngidi mu kilubo, nakwata butyibi bwa kukapwila nabo difuku dimo ku Njibo ya Bulopwe ya mu kyetu kibundi. Twetana’ko na Kevin, mufundiji wa Bible wa bwino mwine washilwile kumfundija Bible.

 Ba Kevin ne wandi mukaji badi na būmi bwa kwisuminwa mwanda badi basaka kwikala na kitatyi kivule kya kukwasha bantu bevwanije Bible. Misokwe yobadi nayo yebakweshe ne pa kwenda mu Afrike ne mu Amerika wa pa Bukata, mobakakweshe ku mwingilo wa kūbaka misambo ya Batumoni. Badi na nsangaji, kadi besenswe. Bine, ‘buno bo būmi bonadi nsaka kwikala nabo.’

 Kevin wantadija video īsambila pa nsangaji idi mu mwingilo wa bumishonele, ebiya nakwata butyibi amba difuku dimo nkengilanga uno mwingilo. Mu 1995, pa kupwa kwifunda Bible bininge mu bula bwa myeji isamba, nabatyijibwa kendi Kamoni wa Yehova. Pa kyaba kya kulomba Leza bupeta, nashilula kulombela’mba: “Kokampa bulanda nansha bupeta.”—Nkindi 30:8.

 Pano ne mpeta wa bine—ke wa lupetopo, ino mpeta ku mushipiditu. Nemwene na Nuria, wami mukaji onsenswe mu Honduras, kadi batwe bonso twaingile bu bamishonele mu Panama ne mu Meksike. Bine, bino binenwa bya Bible bya amba: “I dyese dya Yehova dipetejanga muntu, kadi Aye kabwejanga’kopo misanshi nansha dimo” i bya bine.—Nkindi 10:22.