Nabutwidilwe mu La Ceiba, kibundi kya mu Hondirase, mukala mu bana batano kadi mwana-mulume umo kete. Nadi mwana umo kete wa kitwi mu kisaka. Kyetu kisaka kyadi kishikata mu mukenza wa kyaka, kadi twadi balanda bininge. Bintu byetubipīle bininge kitatyi kyafwile tata mu akishida ku kaji, ami papo nekidi na kintu kya myaka iná.

 Mama wadi ulonga bukomo bwa kwitulela ami ne banabetu bana-bakaji, inoko divule dine kadipo usokola lupeto lwa kumpotela bisandi. Shi mvula wanoke, nadi mvudile kututwa mashika mwanda nkyadipo na bisandi bya kumpa kyanga.

 Ami pa kutama, nefunda ludimi lwa batumama lwa mu Hondirase (LESHO), lwine lwankweshe nesambe na bakwetu batumama. Inoko ba mama ne banabetu kebadipo bayukile LESHO, kebadipo bayukile bivule bya kulonga kadi bakondakanya’byo’tu pa kwisamba nami. Inoko mama wadi unsenswe kadi unkinga ku byaka. Mu tutyetye twaadi uyukile mwa kwisambila nami, wandyumuna ndeke bintu pamo bwa kutoma mfwanka ne mālwa. Bine, mufwijanga’ko pa kunkwasha ntame pampikwa kutoma bino bintu.

 Ponadi mwanuke, mama wadi uvudile kwenda netu ku Kipwilo kya Katolika, ino nkyadipo ngivwana’ko kintu mwanda kekwadipo wa kunshitulwila’byo mu ludimi lwa batumama. Byadi binkambakanya, ebiya ami pa kubwanya myaka dikumi naleka’byo kwenda ku kipwilo. Inoko nadi nsaka’nka kuyukila’ko myanda mivule ya Leza.

 Mu 1999, ponabwenye myaka 23, twetana na mwana-mukaji umo wa mu États-Unis wa mu kipwilo kya Evanjelike. Waumfundija Bible ne Ludimi lwa Batumama lwa mu Amerika (ASL). Nasangela bininge byaamfudije mu Bible, ebiya nakwata butyibi bwa kwikala pashitele. O mwanda navilukīle ku Porto Riko mwanda wa kukafunda ku masomo a bwine Kidishitu a batumama. Ami pa kujokela ku La Ceiba mu 2002, nashimika kipwilo kya batumama na bukwashi bwa balunda nami. Patricia, umo wa mu bano balunda, waikala ke wami mukaji mwenda mafuku.

 Byonadi pashitele mu kyetu kipwilo, nadi nena masapudi mu ludimi lwa batumama lwa mu Hondirase, nombola bifwatulo bya mānga ya mu Bible, ne kwengelekeja mānga’bya mwanda wa batumama beivwane. Kadi nadi nkapempula batumama ba mu bibundi bya kubwipi mwanda wa kwibakankamika ne kwibakwasha mu makambakano abo. Naendele’nka ne mu États-Unis ne mu Zambia mu mwingilo wa bu mishonele. Inoko na bubine, nkyadipo ndyukile bivule mu Bible. Nadi’tu nebapitulukila mu bintu byobansapwidile ne kwibashintulwila bintu byonadi ngivwana kupityila ku bifwatulo. Na bubine, nādi na bipangujo bivule kupita’ko malondololo.

 Difuku dimo, bantu bamo mu kyetu kipwilo bashilula kumvubakenya myanda ya bubela. Badi banena’mba ne nkolwankolwa ne amba nkilametepo wami mukaji. Natyumukwa mutyima kadi nakalabala. Kitatyi kityetye pa kupita’po, twatamba mu kipwilo ami ne Patricia.

 Batumoni ba Yehova badi betupempula na Patricia kitatyi kyonso, ino twadi twibapanga. Batwe pa kutamba mu kyetu kipwilo, Patricia waitabija kwifunda Bible na ba mulume ne mukaji Batumoni, ba Thomas ne Liccy. Natengelwe bininge, mwanda nansha byokebadipo batumama, badi bayukile ludimi lwa batumama. Ne kwija mpika twashilula kwifunda pamo na Patricia.

 Twefunda mu myeji mityetye, tutala mavideo mu ludimi lwa batumama lwa mu Amerika. Ino balunda netu pobabepēle Batumoni ba Yehova amba i balondi ba bantu, twaleka’byo kwifunda Bible. Nansha byaumpele Thomas bukamoni bulombola’mba Batumoni ba Yehova kebalondangapo bantu bendeji, nkyamukulupilepo.

 Myeji mityetye pa kupita’po, paikele Patricia na njia mikatampe, walomba kudi Leza atume monka Batumoni ba Yehova ku yabo njibo. Ne kwija mpika, mulondakani umo wadi Kamoni wa Yehova wakapempula Patricia, wamunena akamulombwele Liccy aye amupempule. Liccy welombola bu mulunda wa bine. Wadi upempula Patricia yenga ne yenga umukankamika ne kwifunda nandi Bible. Inoko, nadi’nka nekitatana Batumoni.

 Mu 2012, Batumoni ba Yehova bakasapula mu muswelo wa pa bula, batadija video inena’mba Lelo Usaka Kuyuka Bubine? mu ludimi lwa batumama lwa mu Hondirase. Ami pa kwiitala, nafītwa pa kuyuka’mba mfundijo mivule yonadi mfundija, kimfwa lwa kalunganyembo ka mudilo ne lwa kubulwa kufwa kwa muya, keidipo mu Bible.

 Yenga walondele’po, naenda ku Njibo ya Bulopwe ya Batumoni ba Yehova kukesamba na Thomas. Namulombola’mba, nsakanga kufundija bantu ba bitwi bubine bwa mu Bible, ino ke bu Kamonipo wa Yehova. Nadi na mulangwe wa kushimika kipwilo kyami kipya kya ba bitwi. Thomas waumfwija’ko pa bukankamane bwami, ino waunombola kisonekwa kya Bene Efisesa 4:5, kine kinena’mba kipwilo kya bine kya bine Kidishitu kifwaninwe kwikala mu bumo.

 Kadi Thomas waumpa video inena’mba Batumoni ba Yehova—Lwitabijo Lwingila, Kipindi 1: Kutamba mu Fukutu mu ludimi lwa batumama lwa mu Amerika. Mu ino video balombwele’mo kibumbo kya bantu kibandaula Bible senene mwanda wa kwivwanija bubine bwa bufundiji bwa kyalwilo. Ami pa kutala ino video, nemona pamo bwa bano bantu. Pamo bwa abo, nami nadi nkimba bubine. Ino video yankulupija’mba Batumoni bafundijanga bubine, mwanda nkulupilo yabo imanine’nka pa Bible kete. Ebiya nashilula kwifunda Bible monka, kadi mu 2014, ami ne Patricia twabatyijibwa bu Batumoni ba Yehova.

 Nsenswe kipwilo kya Batumoni ba Yehova mwanda kitōkanga tō monka mwikadile Leza utōka tō. Batōtyi badi’mo i batōka mu binenwa ne mu muswelo obekele na bakwabo. Badi mu ndoe kadi bekankamikanga abo bene na bene. Batumoni badi mu bumo, kadi bonso bafundijanga bubine bumo bonka bwa mu Bible nansha shi badi mu ntanda’ka nansha kwisamba ludimi’ka.

 Ne musangale pa kwifunda byobya bine bifundija Bible. Kimfwa, ne mwifunde amba Yehova i Leza Mwinē Bukomo Bonso, Mwinē Lupusa Lonso pa ntanda yonso. Usenswe ba bitwi ne boba bevwana bene. Nsenswe buswe bwansenswe. Kadi ne mwifunde amba ntanda ikekalanga ke paladisa ne amba tudi na mukenga wa kukekala’ko nyeke na bukomo bwa ngitu bubwaninine. Bine, ntengēle kwimwena difuku dikafikidila bino bintu!

 Ami ne Patricia, tusenswe kusapwila bakwetu ba bitwi myanda ya mu Bible. Pano twifundanga Bible na bantu bamo ba mu kyetu kipwilo kya kala. Inoko nkikiipangulangapo bipangujo pa bintu bya kufundija, na monadi neipangwila’byo ponadi pashitele. Pa mwanda wa kwifunda Bible na Batumoni ba Yehova, pano ne mutane malondololo ku bipangujo byami.