Zarina pa kupwa kubatyijibwa ke Kamoni wa Yehova, watambile ku Rusi wakajokela kwabo mu Azia wa pa Bukata, usumininwe kutamija bandi bana babidi bana-bakaji mu lwitabijo. Byakadipo na lupeto luvule, wadi ushikete mu njibo imo na bambutwile bandi, nkasandi pamo ne wandi mukaji. Bambutwile bamukankaja kufundija bandi bana bubine bwa mu Bible. Kadi bapeleja ne bandi bana kwisamba na inabo myanda ya mu Bible.

 Zarina walangulukila bininge pa muswelo wa kukwasha bandi bana bana-bakaji befunde myanda ya Yehova. (Nkindi 1:8) Kupwa walombela bininge kudi Leza, amba amuludike ne kumupa tunangu. Penepo Zarina waanza kulonga bintu mungya milombelo yandi, waanza kwenda pamo na bandi bana koku wisambila nabo pa bupangi bwa kutendelwa. Pa kwenda nabo uno muswelo, wakweshe bandi bana bakulupile Mupangi.

 Kupwa Zarina washinta manwa a kwibafundija, waingidija dibuku Lelo I Bika Bine Bifundija Bible? * Walemba pa mapapye misango ne bipangujo monka mobikadile mu dibuku. Wabweja’mo ne misemwa mityetye mwanda wa kukwasha bandi bana bevwanije myanda senene. Kupwa wafya mapapye ne kidiyo munshi mwa mashini a kukenda nao adi mu kikoloni. Bana pa kutwela’mo, batanga misango ne kulemba malondololo abo.

 Pa kwingidija ano manwa, Zarina wabwenye kwifunda na bandi bana mashapita abidi a mu dibuku Bifundija Bible kumeso kwa abo bonso busatu kuvilukila pabo. Pa kuvilukila pabo, waikala na bwanapabo bwa kulela bandi bana pa kubulwa wa kumukankaja. Inabo pa kwingidija tunangu ne bukosoke mwanda wa kwibadisha ku mushipiditu, bandi bana bonso babidi babatyijibwe mu Kweji 10, 2016.