Kaizeli Hulda Naapetile Sikonkwani Sahae
HAIBA nemupotezi sioli sesinyinyani sesibizwa Sangir Besar kwa Indonesia lilimo lisikai kwamulaho, mwendi nemuboni likaizeli baluna babalaalu fa likamba. Bazibahala hahulu fa sioli seo sina bakutazi, mi batusa batu babañata kuutwisisa Bibele. Kono ka nako yeo nebaeza musebezi usili.
Sioli sa Sangir Besar kwa mutulo wa Indonesia
Nebakenanga mwa liwate kuyo shimba macwe abukiti ni kuatisa fa likamba. Macwe amañwi naalikana ni mbola ya mahutu kwa butuna. Kuzwa fo, basali bao nebainanga fa tupula twa kubeta ni kupwaca macwe ao ka kuitusisa lisando kuli abe amanyinyani hahulu kufita lii la kuhu. Hasamulaho, nebabeyanga macwe ao mwa tungongolo ni kukambama ni ona kuaisa kone baina. Kihona balonga macwe ao mwa masaka amatuna kuli alongiwe ka bunolo mwa limota ni kuyo itusiswa kwa kueza mikwakwa.
Kaizeli Hulda, unopa macwe fa likamba
Yomuñwi wa likaizeli bao ki kaizeli yabizwa Hulda. Miinelo ya kaizeli yo nei mulumeleza kutanda nako yeñata kueza musebezi wo kufita babañwi. Hañata naaitusisanga masheleñi anaafumananga kwa kufumanela lubasi lwahae lika zene batokwa ka zazi. Kono ka nako ye, naasebeza ka mulelo wa kuli apete sikonkwani sesiñwi. Naabata kuleka kapangaliko kuli aitusisange Progilamu ya JW Library®. Kaizeli Hulda naaziba kuli mavidio ni litaba zeñwi zefumaneha fa progilamu yeo nelika mutusa kuekeza kwa buikoneli bwahae mwa bukombwa ni kuutwisisa hande Bibele.
Kaizeli Hulda naasebezanga lihora zepeli zazi ni zazi kakusasana ka kweli iliñwi ni licika, mi naapwacize macwe amañata anaakona kutaza tilela ya mota yenyinyani. Mi naafumani masheleñi amañata anaa mukonisize kuleka kapangaliko.
Kaizeli Hulda usweli kapangaliko kahae
Kaizeli Hulda utalusa kuli: “Nihaike kuli nenikatalanga hahulu ni kuba ni litombo kabakala kupwaca macwe, nenilibezi kapili butuku bo hane nikalile kuitusisa kapangaliko kaka ka kanca kane kanitusize kuekeza kwa buikoneli bwaka mwa bukombwa ni kuitukiseza ka bunolo mikopano ya Sikreste.” Hape utalusa kuli kapangaliko kahae neka mutusize hahulu, sihulu kwa makalelo a butuku bobuyambukela, bakeñisa kuli mikopano ya puteho ni musebezi wa kukutaza neliezwa ka kuitusisa lipangaliko. Lutabile ni Kaizeli Hulda kakuli naapetile sikonkwa sahae.
