Mulimu ubupile mibili yaluna ka nzila yeipitezi kuli ikone kuifolisa. Lipatisiso za sikolo sa milyani sa Johns Hopkins Medicine libonisa kuli, “mubili oiketile hande hauholofala, kuñwalulwa, kamba kuba ni sitombo, ukalanga kuitusisa buikoneli bwaona bwa kufolisa litombo zetuna ni zenyinyani.” Kapili-pili mubili utusanga kuli sitombo sisike sa zwa hahulu mali, utahisanga kuli misinga ibe yemituna, kufolisa sitombo, ni kutiisa liselusi za mubili.

MUNAHANE TABA YE: Haiba Mubupi ubupile mibili yaluna ka nzila yeikonisa kuli iifolise haiholofala, kana taba yeo hai lutusi kukolwa lisepiso zahae za kuli uka folisa butuku boluutwanga kwa pilu? Muñoli yomuñwi wa Samu naañozi kuli: “Ufolisa babalobehile lipilu. Utama litombo zabona.” (Samu 147:3) Kono haiba mubilaezwa ki lika ze maswe zene mukopani ni zona kwamulaho ni zemukopana ni zona cwale, mukona kukolwa cwañi kuli Jehova wakona kutama litombo zamina—ka nako yacwale ni kwapili?

Mulimu usepisa kuli: “Usike wasaba, kakuli niinzi ni wena. Usike wabilaela, kakuli ki na Mulimu wahao. Nika kutiisa, ee, nika kutusa.” (Isaya 41:10) Mutu yaziba kuli Jehova wa mubabalela unani kozo ya mwa munahano ni maata a kutiyela miliko yeshutana-shutana. Muapositola Paulusi naabulezi kuli kozo ya mwa munahano yeo ki “kozo ya Mulimu yefita kutwisiso kaufela.” Mi naaekelize kubulela kuli: “Nifumana maata mwa lika kaufela ka yena yanifa maata.”—Mafilipi 4:4-7, 9, 13.

Mañolo alutusa kuba ni tumelo mwa lisepiso za Jehova ka za lika zalela kuezeza batu kwapili. Ka mutala, liñolo la Sinulo 21:4, 5 lilu taluseza lika za kaeza Mulimu ni libaka halusepa kuli ukaeza cwalo:

• “Ukatakula miyoko kaufela” kwa meeto a batu. Jehova ukafelisa manyando ni lipilaelo za luna kaufela, nihaiba zebakona kuunga babañwi kuli ki zenyinyani.

• “Yainzi mwa lubona” mwa kanya ya mahalimu, yena Mulena Yamaata wa pupo kaufela ukabonisa maata ahae a kutibela manyando ni kulufa tuso yelutokwa.

• Jehova ulukolwisa kuli lisepiso zahae ‘zasepahala mi ki za niti.’ Manzwi ao abonisa kuli, kabakala kuli uzibahala kuli ki Mulimu wa niti ukataleleza lisepiso zahae.

“‘Mi ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku. Zapili lifelile.’ Mi Yainzi mwa lubona ali: ‘Bona! Lika kaufela nilieza zenca.’ Hape ali: ‘Ñola, kakuli manzwi a asepahala mi ki a niti.’”—Sinulo 21:4, 5.

Lika ze mwa pupo ni litaba ze mwa Bibele, kaufela zona lipatulula mikwa yeminde ya Ndataa luna ya kwa lihalimu. Nihaike kuli pupo ilususueza kuziba Mulimu ni kumuunga kuli ki Mulikanaa luna yomutuna, Bibele yona ilumema ka kunonga kuli: “Musutelele ku Mulimu, mi ukasutelela ku mina.” (Jakobo 4:8) Mi liñolo la Likezo 17:27 libulela kuli: “Haayo kwahule ni mañi ni mañi waluna.”

Hamunze muikataza kuziba Mulimu, mukaba ni buikolwiso bobutuna bwa kuli “wamiisa pilu.” (1 Pitrosi 5:7) Mukatusiwa cwañi haiba musepa Jehova ka nzila yeo?

Munyakisise likande la bo Toru, ba kwa Japan. Neba utilwe ki bo maa bona babali Lipaki, kono bakala kuswalisana ni sikwata sa yakuza sa likebenga mwa Japan. Babulela kuli, “Neninahananga kuli Mulimu unitoile, mi batu bo nipila ni bona hane bashwa, sihulu batu benilata, neniikutwa kuli ki koto yezwa ku Mulimu.” Bo Toru batalusa kuli ka nako yene baswalisana ni sikwata sesimaswe seo, nebakalile kuba ni “pilu-taata ni kutokwa makeke.” Habahupula za milelo yabona, bali, “nenibata kushwa inze nisali mwanana hamulaho wa kubulaya mutu yomuñwi yatumile hahulu kunifita, ilikuli niikezeze libizo.”

Nihakulicwalo, bo Toru ni bakubona bo Hannah hane baitutile Bibele, bo Toru nebaezize licinceho  zetuna mwa bupilo bwa bona mi nebacincize mubonelo wabona. Bo Hannah babulela kuli: “Neniiponezi bo muunaa ka inze baeza licinceho zeo.” Ka nako ya cwale, bo Toru babulela ka buikolwiso kuli: “Kunani Mulimu yaisa pilu ku mañi ni mañi waluna. Hatabeli kuli mutu ufi kamba ufi atimezwe mi utabela kuswalela batu bababakezi libi zabona habuniti. Wateelezanga halu mubulelela lika zelusa koni kutaluseza mutu ufi kamba ufi ni zebasa koni kuutwisisa batu babañwi. Hona cwale-cwale fa, Jehova ukafelisa miinelo kaufela yetaata, manyando, ni lika zeluutwisa butuku. Nihaiba ka nako ye, walutusanga ka linzila zelusa libeleli. Walutokomela ni kulutusa haluzwafile.”—Samu 136:23.

Zeezahezi mwa bupilo bwa bo Toru libonisa kuli kuziba kuli Mulimu wakona kulutusa—ni kuli hona cwale-cwale fa—ukafelisa miinelo kaufela yetaata ni kutakula mioko kaufela kwa meeto a batu, kulufa buikolwiso bwa kuli kwapili lika likaba hande, mi hape kulutusa kuli lupile bupilo bobunde ka nako ya cwale. Kaniti, nihaiba mwa lifasi le, lelitezi manyando, Mulimu wakona ku mibabalela.