LIFASI LITALIMANA NI MIINELO YETAATA
2 Musileleze Mupilelo Wamina
LIBAKA KUEZA CWALO HAKULI KWA BUTOKWA
Batu babañata kubabelanga hahulu taata zazi ni zazi kuli bafumane lika zebatokwa. Ka bumai, miinelo yetaata ya mwa lifasi ikona kutahisa kuli butata bo buekezehe hahulu. Libaka?
-
Hakunani miinelo yetaata mwa silalanda, lika zecwale ka lico ni mandu litulanga hahulu.
-
Miinelo yetaata ikona kutahisa kuli batu bazwe misebezi kamba kubatahiseza kuli babeleke misebezi yebafumanisa masheleñi amanyinyani hahulu.
-
Likozi zakona kusinya lipisinisi za batu, mandu, kamba lika zeñwi zebaluwile, ni kutahisa kuli batu babañata babe babotana.
Zemuswanela Kuziba
-
Haiba muitusisa hande masheleñi amina, kuka mibela bunolo kutiyela miinelo yetaata yemuka kopana ni yona.
-
Muhupule kuli masheleñi emufumananga, emubulukile, ni lika zeñwi zemuluwile, nako yeñwi halina kuba ni buima bolinani ka nako ya cwale.
-
Kunani lika zeñwi zasakoni kuleka masheleñi, zecwale ka tabo ni swalisano ya mwa lubasi.
Zemukona Kueza
Bibele ibulela kuli: “Halunani lico ni liapalo, lukakolwa ka lika zeo.”—1 Timotea 6:8.
Kukolwa ka zelunani zona, kuama kukusufaza kwa lika zelubata ni kuikutwa kuli kulikani halufumana zelutokwa ka zazi ni zazi. Kueza cwalo ki kwa butokwa sihulu haiba hamuna hande masheleñi.
Kuli mukolwe ka zemunani, mwendi mukatokwa kunolofaza bupilo bwamina. Haiba mubata kulekanga lika zetula kamita, mukafumana butata bwa masheleñi.