Libizo la Mulimu ki Lifi? Mulimu ualaba puzo yeo kuli: “Ki na Jehova. Ki lona libizo laka.” (Isaya 42:8) Libizo la Mulimu lifumaneha mwa Bibele ibato ba ha 7,000. Nihakulicwalo, mwa Libibele zeñata, batoloki baezize mafosisa ka kuyolisa libizo la Jehova ka lilumbatina la “Mulena.” Mulimu ubata kuli mube mulikanaa hae, kacwalo, umisusueza ‘kubiza libizo lahae.’—Samu 105:1.

Malumbatina a Jehova. Mwa Bibele kuitusisizwe malumbatina amañwi kuama ku Jehova, acwale ka “Mulimu,” “Yamaata Kaufela,” “Mubupi,” “Ndate,” “Mulena,” ni “Yapahami ka Kufitisisa.” Mwa litapelo zeñata zeñozwi mwa Bibele, Jehova ubiziwa ka lilumbatina ni ka libizo lahae, lona la Jehova.—Daniele 9:4.

 Mulimu Ucwañi? Mulimu ki moya. (Joani 4:24) Bibele ibulela kuli “hakuna mutu yaboni Mulimu.” (Joani 1:18) Bibele ilubulelela kuli Mulimu unani maikuto. Batu bakona kutahisa kuli Mulimu aikutwe bumaswe, kamba bakona ‘kumutabisa.’—Liproverbia 11:20; Samu 78:40, 41.

Tulemeno Twa Mulimu Totunde. Mulimu haaketululi batu ba macaba kaufela ni ba lisimuluho zeshutana-shutana. (Likezo 10:34, 35) Hape ki “Mulimu yanani makeke ni mukekecima, yasaakufi kuhalifa ni yatezi lilato lelisa feli ni niti.” (Exoda 34:6, 7) Nihaike kuli Mulimu unani tulemeno totuñata, unani tulemeno totutuna totune.

Maata. Bakeñisa kuli ki Mulimu “Yamaata Kaufela,” unani maata amatuna a kueza zasepisa.—Genese 17:1.

Butali. Mulimu ki yena ya butali ka kufitisisa. Bakeñisa taba yeo, Bibele ibulela kuli, Mulimu ki “yena ya butali anosi.”—Maroma 16:27.

Katulo Yelukile. Mulimu uezanga zelukile ka nako kaufela. Likezo zahae ‘lipetahalile,’ mi ‘haezi ka kusaluka.’—Deuteronoma 32:4.

Lilato. Bibele ibulela kuli “Mulimu ki lilato.” (1 Joani 4:8) Mulimu halubonisi feela lilato, ki yena lilato. Lilato lahae ki lona lelitahisa kuli aeze lika kaufela zaeza, mi ulubonisa lilato mwa linzila zeñata.

Silikani sa Mulimu ni Batu. Mulimu ki Ndataa luna yalilato ya kwa lihalimu. (Mateu 6:9) Lwakona kuba balikani bahae haiba lubonisa tumelo ku yena. (Samu 25:14) Mane, Mulimu ulumema kuli lusutelele ku yena ka tapelo ni kuli ‘lunepele lipilaelo zaluna kaufela ku yena, kakuli waluisa pilu.’—1 Pitrosi 5:7; Jakobo 4:8.

Jesu Haki Mulimu. Jesu uipitezi kabakala kuli ki yena feela yanaabupilwe ki Mulimu anosi. Ki lona libaka Bibele haibulela kuli Jesu ki Mwanaa Mulimu. (Joani 1:14) Hamulaho wa kubupa Jesu, Jehova naaitusisize mweli wahae yo sina “mubeleki wa sikwala” kubupa lika kaufela ni batu kaufela.—Liproverbia 8:30, 31; Makolose 1:15, 16.

 Jesu Kreste naasika bulela kuli ki Mulimu. Kono mane naatalusize kuli: “Ni muyemeli yazwa ku [Mulimu], mi ki Yena yanilumile.” (Joani 7:29) Hanaabulela ni yomuñwi kwa balutiwa bahae, Jesu naabizize Jehova kuli “Ndate yena Ndataa mina” ni “Mulimu waka yena Mulimu wamina.” (Joani 20:17) Jesu hasaashwile, Jehova naamuzuselize kwa bupilo bwa kwa lihalimu ni kumufa maata amatuna kwa lizoho Lahae la bulyo.—Mateu 28:18; Likezo 2:32, 33.

Jesu Kreste Wakona Kumitusa Kusutelela ku Mulimu

Jesu naatile fa lifasi kuto luluta ka za Ndatahe. Jehova naabulezi ka za Jesu kuli: “Yo ki Mwanaka, yalatwa. Mumuteeleze.” (Mareka 9:7) Jesu uziba hande Mulimu kufita mutu ufi kamba ufi. Naabulezi kuli: “Hakuna yaziba Ndate kuli ki mañi konji Mwana ni mutu ufi kamba ufi yo Mwana alata kupatulula Ndate ku yena.”—Luka 10:22.

Jesu ubonisa tulemeno twa Mulimu ka kupetahala. Jesu naalikanyisize hahulu tulemeno twa Ndatahe kuli mane naabulezi kuli: “Mutu kaufela yaniboni uboni ni Ndate.” (Joani 14:9) Jesu naatahisize kuli batu basutelele ku Mulimu ka kubulela ni kueza lika zebonisa lilato la Ndatahe. Naabulezi kuli: “Ki na nzila ni niti ni bupilo. Hakuna yataha ku Ndate haisi ka na.” (Joani 14:6) Hape naabulezi kuli: “Balapeli ba niti bakalapela Ndate ka moya ni ka niti, kakuli mane Ndate ubata babacwalo kuli bamulapele.” (Joani 4:23) Yeo ki taba yende luli! Jehova ubata batu babaswana sina mina, bababata kuziba niti ka za hae.