KA KU YA KA BIBELE

Babotana Babotana

Kana Mulimu wa Iyakatwa Babotana?

“Mupilelo wa mina u tokwe lilato la masheleñi . . . Kakuli [Mulimu] u ize: ‘Ha ni na ku mi siya ni kamuta mi ha ni na ku mi fulalela ni kamuta.’”—Maheberu 13:5.

MULIMU MWA BONISEZA KULI WA IYAKATWA BABOTANA Mulapeli wa Jehova Mulimu ha ba mwa muinelo o taata, Mulimu u kona ku bonisa pabalelo ya hae ka linzila ze shutana-shutana. Nzila ye ñwi ki tuso ye lilato ye fiwa ki Bakreste ba bañwi. * Jakobo 1:27 i bulela kuli: “Bulapeli bo bu kenile ni bo bu sa nyazahali fapilaa Mulimu Ndataa luna ki bo: ki ku babalela lindiala ni limbelwa mwa liñalelwa za bona.”

Bakreste ba kwa makalelo ne ba tusananga. Ka mutala, ha ne ku polofitilwe kuli ku ka ba ni lukupwe lo lu tuna mwa naha ya Judea, Bakreste ba mwa muleneñi wa Antioke wa naha ya Siria ba ikatulela “ku lumela mizwale ba ba pila mwa Judea lituso.” (Likezo 11:28-30) Kabakaleo, Bakreste sina bona ba ne ba li mwa butokwi ne ba amuhezi lituso ze ne ba tokwa. Bufani bwa ku itatela bo, ne bu bonisize lilato la Sikreste.—1 Joani 3:18.

 Babotana ba kona ku itusa cwañi?

“Na Muñaa Bupilo Mulimu wa hao, ni ku luta se si ku swanela.”—Isaya 48:17, 18.

MULIMU U LU TUSA KULI LU ITUSE Sina mo se ba lemuhezi batu ba bañata, butali bo bu mwa Bibele bwa tusa mi bu fa ketelelo ye nde ka ku fitisisa. Liproverbia 2:6, 7 i bulela kuli: “Muñaa Bupilo ki Yena ya fana butali, zibo ni kutwisiso li zwa mwa mulomo wa hae; U bulukela ba ba lukile butali bo bu tiile.” Batu ha ba bata butali bo ni ku itusisa bona, ba itusa ili bona.

Ka mutala, ba ambuka mikwa ye lubeta ni ye tahisa lisinyehelo ye cwale ka ku itusisa milyani ye kola kamba bucakolwa. (2 Makorinte 7:1) Hape ba ba batu ba ba sepahala, ba ba beleka ka taata ni ba ba tokomela hande buikalabelo bwa bona, ili ku tahisa kuli ba kone ku fumana misebezi kamba ku ba babeleki ba ba itingwa hahulu. Maefese 4:28 i bulela kuli: “Ya uzwa a si ke a uzwa hape, kono a sebeze ka taata, a eze musebezi o munde ka mazoho a hae, kuli a fumane sa ku ikabela ni ya tokwile.”

Kana ku na ni bupaki bo bu bonisa kuli butali bwa mwa Bibele bwa tusa babotana?

“Butali bwa Mulimu bu pakiwa ki likezo za bona.”—Mateu 11:19, Bibele ye Kenile, Hatiso ya 1984.

MITALA YE BONISA KULI BUTALI BWA MWA BIBELE BWA TUSANGA Bo Wilson, ba ne ba li babeleki ba swalele mwa Ghana, ne ba tuha ba fita kwa mafelelezo a tumelelano ya musebezi wa bona. Fa lizazi le ne ba swanela ku tuhela musebezi, ha ne ba nze ba tapisa mota ya yo muhulu fa musebezi, bo Wilson ba fumana masheleñi kwamulaho a mota. Mubelekisi wa bona a ba bulelela kuli ba ipulukele masheleñi ao. Kono bo Wilson, ba ba li ba bañwi ba Lipaki za Jehova, ba hana ku uzwa. Ba kutisa masheleñi ao ku muñaa ona. Mwa sibaka sa ku zwiswa musebezi, bo Wilson ba kenyelezwa musebezi mi hamulaho wa nako ba huliswa fa musebezi ku ba yo muñwi wa bazamaisi.

Mwa Yurope, basali ba ba bizwa bo Géraldine ne ba zwisizwe musebezi kabakala kuli mubelekisi wa bona naa sa lati Lipaki za Jehova. Bo mahe mubelekisi wa bona ba bulelela mwanaa bona kuli naa ezize mafosisa a matuna. Ba bulela kuli: “Haiba u bata mubeleki ya sepahala, ya ka isa pilu kwa musebezi wa hae, ha u na ku fumana mubeleki yo munde ya fita yo muñwi wa Lipaki za Jehova.” Mwanaa bona a batisisa ka za Lipaki, mi bo Géraldine ba kutisezwa fa musebezi.

Bo Sarah, ba ba li mushemi wa likwasha mwa South Africa, ha ne ba talimani ni miinelo ye taata, ne ba iponezi ka mo Bibele i kona ku susueza batu ku bonisa lilato ku ba bañwi, muta ba mwa puteho ya bona ne ba tusize lubasi lwa bona ka ku ba fa lico ni ku ba fanga nzila. Hamulaho wa nako, bana ba bona ne ba bulezi kuli: “Lu na ni bashemi ba bañata mwa puteho.”

Yeo ki mitala feela i sikai ya batu ba ba kile ba tusiwa ki butali bwa mwa Bibele. Mitala ye, i lu hupulisa manzwi a kwa Liproverbia 1:33 a bulela kuli: “Kono ya ni utwa u ka pila mwa kozo.” Ku si na ku kakanya manzwi ao ki a niti luli!

[Litaluso za kwatasi]