“Mi nabona lihalimu lelinca ni lifasi lelinca; kakuli lihalimu lapili ni lifasi lapili nelifelile, mi liwate halisa liyo.”—Sinulo 21:1, Bibele ya Toloko ya Lifasi Lelinca.

 “Cwale nabona ‘lihalimu lelinca ni lifasi lelinca’; kakuli lihalimu lapili ni lifasi lapili nelifelile; ni liwate nese lifelile.”—Sinulo 21:1, Bibele ya New International Version.

 Timana ye iitusisa puo ya swanisezo kubonisa kuli Mubuso wa Mulimu wa kwa lihalimu ukayola mibuso ya batu kaufela. Mubuso wo ukayundisa batu babamaswe ni kubusa fahalimwaa batu babatabela kubusiwa ki ona.

 Litaba ze mwa buka ya Sinulo liñozwi ka kuitusisa “lisupo,” kamba liswanisezo. (Sinulo 1:1) Kacwalo, kwautwahala kubulela kuli lihalimu ni lifasi zebulezwi mwa timana ye, haki za luli kono ki za swanisezo. Kutuha fo, “mahalimu amanca” ni “lifasi lelinca” libulezwi hape ni mwa litimana zeñwi za Bibele. (Isaya 65:17; 66:22; 2 Pitrosi 3:13) Kunyakisisa litimana zeo ni litaba zeñwi zebulezwi mwa Bibele kulutusa kuziba taluso ya lika zeo.

 “Lihalimu lelinca.” Bibele fokuñwi iitusisanga linzwi la “lihalimu” kutalusa puso kamba milonga. (Isaya 14:12-14; Daniele 4:25, 26) Kacwalo, hatiso yeñwi ibulela kuli mwa lipono za bupolofita, “linzwi la lihalimu ki linzwi la swanisezo lelitalusa maata a kubusa kamba mulonga.” a Kwa Sinulo 21:1, pulelo ya “lihalimu lelinca” italusa Mubuso wa Mulimu. Mulonga wa kwa lihalimu wo, fokuñwi ubiziwanga kuli “Mubuso wa mahalimu” mi ubulezwi mwa buka ya Sinulo kaufela ni mwa libuka zeñwi za mwa Bibele. (Mateu 4:17; Likezo 19:8; 2 Timotea 4:18; Sinulo 1:9; 5:10; 11:15; 12:10) Hamulaho wa nako, Mubuso wa Mulimu, obusiwa ki Jesu, ukayola “lihalimu lapili,” ili kutalusa milonga kaufela yesika luka yetomilwe ki batu.—Daniele 2:44; Luka 1:31-33; Sinulo 19:11-18.

 “Lifasi lelinca.” Bibele ibulela kuli lifasi tenyene halina kusinyiwa kamba kuyoliswa nikamuta. (Samu 104:5; Muekelesia 1:4) Kono cwale lifasi la swanisezo, litalusañi? Hañata Bibele iitusisanga linzwi la “lifasi” kutalusa batu. (Genese 11:1; 1 Makolonika 16:31; Samu 66:4; 96:1) Kacwalo, “lifasi lelinca,” lilukela kutalusa batu babaipeya kwatasaa mulonga wa Mulimu o kwa lihalimu. “Lifasi lapili,” kamba batu babalwanisa Mubuso wa Mulimu, likafela.

 “Liwate halisa liyo.” Litaba kaufela zebulezwi kwa Sinulo 21:1 libonisa kuli “liwate” ni lona ki pulelo ya swanisezo. Bakeñisa kuli liwate likona kubifa kapili, mi hañata likona kutahisa mandinda, liyemela batu babañata ba mifilifili ili babaikauhanyize ku Mulimu. (Isaya 17:12, 13; 57:20; Sinulo 17:1, 15) Ni bona bakayundiswa. Samu 37:10, ili: “Kusiyezi feela nakonyana, mi babamaswe habasana kubateñi; ukatalima fone bainzi, kono habana kufumaneha fateñi.”

 Buka ya Sinulo neipolofitile zeneka ezahala mwa “lizazi la Mulena.” (Sinulo 1:10) Bupolofita bobu mwa Bibele bubonisa kuli lizazi leo nelikalile ka 1914 Jesu hakalisa kubusa sina Mulena wa Mubuso wa Mulimu. b Kono naasike akala kubusa lifasi honafo feela. Mane bupolofita bobuñwi bwa mwa Bibele nebubonisize kuli miinelo neika totobela kwa makalelo a “lizazi la Mulena.” Nako yeo ibizwa “mazazi a mafelelezo.” (2 Timotea 3:1-5, 13; Mateu 24:3, 7; Sinulo 6:1-8; 12:12) Mazazi ataata ao atezi liziyezi hasaafelile, Mubuso wa Mulimu ukazwisa lihalimu ni lifasi zakale za swanisezo ni kutahisa kozo ni swalisano. Babusiwa ba Mubuso, lona “lifasi lelinca,” bakaikola bupilo ni kuba ni mibili yepetahalile.—Sinulo 21:3, 4.

 Mubuhe vidio yekuswani ye kuli mubone litaba ze mwa buka ya Sinulo.