“Wena mutu, ukubulelezi sesinde. Mi ki sika mañi satokwa Jehova ku wena? Satokwa feela kikuli ueze sesilukile, ulate busepahali, ni kuli uzamaye ka buikokobezo ni Mulimu wahao!”—Mika 6:8, Bibele ya Toloko ya Lifasi Lelinca.

 “Wena mutu, ukubonisize sesinde. Mi ki sika mañi satokwa MULENA ku wena? Kikuli ueze zelukile, ulate sishemo, mi uzamaye ka buikokobezo ni Mulimu wa hao.”—Mika 6:8, Bibele ya The Holy Bible—New International Version.

 Mupolofita Mika utalusa kuli haki nto yetaata hahulu kuli batu baeze lika zetabisa Jehova a Mulimu. (1 Joani 5:3) Zatokwa Mulimu kuli lueze litalusizwe ka bukuswani mwa timana ye ka kuitusisa lipulelo zetaalu za butokwa. Pulelo ya pili ni ya bubeli ibonisa mo mutu aswanela kupilisanela ni batu babañwi, haili pulelo ya bulaalu yona iama silikani sahae ni Mulimu.

 “Ueze sesilukile.” Mulimu ubata kuli batanga bahae baeze zelukile. Taba yeo ikopanyeleza kunahana ni kueza lika ka kulumelelana ni likuka za Mulimu zepahami ka za lika zelukile ni zesika luka. (Deuteronoma 32:4) Ka mutala, batu babalatelela likuka za Mulimu baezanga mobakonela kaufela kueza hande batu kaufela ni kusaba ketulula kusina taba ni simuluho yabona, naha yabona, kamba mayemo abona.—Livitike 19:15; Isaya 1:17; Maheberu 13:18.

 “Ulate busepahali.” Pulelo yeo hape ikona kutolokiwa kuli “ulate lilato lelisa feli.” (Hosea 6:6) Mwa Siheberu sa kwa makalelo, linzwi la “busepahali” hali talusi feela kusepahala ku mutu kono hape litalusa kubonisa mutu yomuñwi sishemo ni makeke ili kueza lika zelusika tameha kueza. Mulimu ubata kuli batu babata kumutabisa basike babonisa feela sishemo ni makeke kono hape balate hahulu tulemeno to. Taba ye italusa kuli batanga bahae baswanela kutabela kutusa batu babañwi, sihulu babatokwile. Haiba luba ni bufani, lukaba ni tabo.—Likezo 20:35.

 “Uzamaye ka buikokobezo ni Mulimu wahao.” Mwa Bibele, linzwi la “kuzamaya” likona kutalusa kueza nto yeñwi. Mutu ukona kuzamaya ni Mulimu ka kupila ka nzila yemutabisa. Nuwe naatomile mutala omunde. “Naazamaile ni Mulimu wa niti” kakuli neli mutu yanaaezize zelukile mwa meeto a Mulimu mi “naapilile asina mulatu mwahalaa batu bane bapila ka nako yeo.” (Genese 6:9) Kacenu, lukona ‘kuzamaya ni Mulimu’ ka kupila ka kulumelelana ni lituto zefumaneha mwa Linzwi la hae, yona Bibele. Kuli lukone kueza cwalo, luswanela kuba ni buikokobezo ni kulemuha kuli luitingile ku Mulimu mwa lika kaufela.—Joani 17:3; Likezo 17:28; Sinulo 4:11.

 Mika neli mupolofita mwa Isilaele yanaapilile mwa lilimo za ma 700 B.C.E. Ka nako yeo, batu babañata mwa naha nebalapela milimu ya maswaniso, neba putelela babañwi ni kunyandisa babañwi. (Mika 1:7; 3:1-3, 9-11; 6:10-12) Buñata bwa Maisilaele nebasa ezi zanaatokwa Mulimu, ili litaelo zenebonisizwe mwa Mulao one ufilwe ku Mushe obizwa kuli, Mulao wa Mushe. Ka nako yeswana, batu babañata nebanani mubonelo ofosahezi wa kuli bakona kutabisa Mulimu ka kueza lizo za bulapeli ni kufa matabelo.—Liproverbia 21:3; Hosea 6:6; Mika 6:6, 7.

 Lilimo zeñata-ñata kuzwa nako yanaapilile Mika, Jesu ni yena naakutezi kubulela kuli Ndatahe utabela batu bababonisa lilato, katulo yelukile, ni makeke kono utoile batu babaeza feela lika zende kuli babonwe ki batu babañwi kuli balapela Mulimu. (Mateu 9:13; 22:37-39; 23:23) Manzwi a Jesu alutusa kuutwisisa zabata Mulimu kuli batanga bahae baeze.

 Mubuhe vidio yekuswani ye kuli muzibe litaba zeñwi ka za buka ya Mika.