LITIMANA ZA MWA BIBELE ZETALUSIZWE
Makolose 3:23—“Semueza Kaufela, Musieze ka Pilu Yamina Kaufela”
“Semueza kaufela, musieze ka moyo kaufela inge babaezeza Jehova, isiñi batu.”—Makolose 3:23, Bibele ya Toloko ya Lifasi Lelinca.
“Semueza kaufela, musieze ka pilu yamina kaufela inge babaezeza Mulena, isiñi batu.”—Makolose 3:23, Bibele ya New International Version.
Taluso ya liñolo la Makolose 3:23
Mukreste uswanela kubeleka ka taata bakeñisa kuli mwaangela musebezi kuama silikani sahae ni Jehova Mulimu.
“Semueza kaufela.” Batu babalapela Jehova baezanga mobakonela kaufela kulatelela zeibulela Bibele mwa lika kaufela zebaeza. Baezanga mobakonela kaufela kuli babeleke ka taata ni kusepahala mwa lika kaufela zebaeza habali kwa ndu, kwa musebezi, ni habali kwa sikolo.—Liproverbia 11:13; Maroma 12:11; Maheberu 13:18.
“Musieze ka pilu yamina kaufela.” Pulelo yeli, “ka pilu yamina kaufela” itolokilwe fa pulelo ya Sigerike “yetalusa buitamo bwa mutu bwa kueza tato ya Mulimu ka maata ahae kaufela.” a
Ka mukwa ocwalo, mutu yo uitusisanga buikoneli bwahae ni maata ahae a kunahana kuli apete hande musebezi omuñwi. Litoloko zeñwi za Bibele liitusisize pulelo yeli, “ka pilu kaufela” (Bibele ya New Catholic) kamba yeli “kuzwelela kwa pilu” (Bibele ya King James Version).—Mubone Liñolo la “ Makolose 3:23 Mwa Libibele Zeñwi.”
“Inge babaezeza Jehova, isiñi batu.” Bakreste baanga musebezi obaeza kaufela kuba wa butokwa bakeñisa kuli baziba kuli mobaangela musebezi kukaama silikani sabona ni Jehova Mulimu. Nto yebaanga kuba ya butokwa hahulu ki kutabisa Jehova, isiñi kutabisa mubelekisi kamba mutu yomuñwi. Mukreste habeleka ka taata ni kuba ni mubonelo oswanela ka za musebezi, batu baka mulumba mane ni kulumba Mulimu yalapela. Ka nzila yeo, Mukreste ukaeza mwakonela kaufela ‘kuli libizo la Mulimu . . . lisike labulelwa maswe.’—1 Timotea 6:1; Makolose 3:22.
Litaba zeñwi zeswalisana ni litaba ze kwa Makolose 3:23
Buka ya mwa Bibele ya Makolose neiñozwi ki muapositola Paulusi, mi naaiñolezi Bakreste ba mwa muleneñi wa kwaikale wa Kolose. b Kubonahala kuli naaiñozi kwa mafelelezo a lilimo za kupika kwahae sina lipantiti mwa Roma, ibatoba ka 60-61 C.E.
Buka ya Makolose inani litaba zetusa Bakreste ba lisimuluho zeshutana-shutana ni miinelo yeshutana-shutana kuli baswalisane habanze balapela Mulimu. (Makolose 3:11) Ibasusueza kulikanyisa tulemeno twa Mulimu totucwale ka lilato, sishemo, ni makeke. (Makolose 3:12-14) Hape italusa mwaswanela kuezeza mutu mwa miinelo kaufela ya bupilo hanze alapela Mulimu.—Makolose 3:18–4:1.
Moitolokezwi Makolose 3:23 Mwa Libibele Zeñwi
“Semueza kaufela, musieze ka pilu kaufela inge babaezeza Mulena, isiñi batu.”—New Catholic Bible.
“Semueza kaufela, musieze kuzwelela kwa pilu inge babaezeza Mulena, isiñi batu.”—King James Version.
“Semueza kaufela [musebezi kaufela omueza], musieze ka moyo kaufela [ili kutalusa kueza momukonela kaufela], inge [babaezeza nto yeñwi] Mulena isi batu.”—The Amplified Study Bible.
“Musebezi ufi kamba ufi omueza, muise kwateñi pilu yamina kaufela ni moyo wamina, sina babaezeza Mulena musebezi wo isiñi batu feela.”—The New Testament in Modern English, yetolokilwe ki J. B. Phillips.
Mubuhe vidio yekuswani ye kuli mubone molitaluselizwe ka bukuswani liñolo la Makolose.
Hape Mwendi Mwakona Kutabela Litaba Ze
TAWALA YA MULIBELELI
Mo lu Kona ku Ikolela ku Beleka ka Taata
Mu nyakisise linzila ze ñwi zeo ka zona Bibele i lu fa kelezo ye sebeza ya mwa ku fumanela tabo mwa musebezi wa luna.
LITIMANA ZA MWA BIBELE ZETALUSIZWE
Mafilipi 4:6, 7 Italusizwe—“Musike Mwabilaezwa ki Sesiñwi”
Ki litapelo zecwañi zekona kutusa batanga ba Mulimu kufelisa lipilaelo ni kubatusa kuba ni kozo ya mwa munahano?
LITUTO ZA MWA BIBELE
Liitusiso Zetusa Kwa Kuituta Bibele
Mukete liitusiso zemubata kuitusisa kuli muitute Bibele ka nzila yekatahisa kuli muikole litaba zemuituta ni kuitebuha zona.
