“Kakuli Mulimu naasika lufa moya wa boi, kono naalufile moya wa maata ni wa lilato ni wa kuba ni kutwisiso.”—2 Timotea 1:7, Bibele ya Toloko ya Lifasi Lelinca.

 “Kakuli Mulimu haasika lufa moya wa boi; kono ki wa maata, ni wa lilato, ni wa kutwisiso.”—2 Timotea 1:7, Bibele ya New King James Version.

 Mulimu wakona kutusa mutu kuba ni bundume bwakueza lika zelukile. Mulimu hatabeli kuli mutu ufi kamba ufi abe ni “boi,” ili sabo yekona kupaleliswa mutu kueza lika zetabisa Mulimu.

 Halunyakisiseñi tulemeno totulaalu totuzwa ku Mulimu totubulezwi mwa timana ye ili tulemeno totukona kulutusa kusaba ni boi.

 “Maata.” Bakreste bakonile kusebeleza Mulimu ka bundume kusina taba ni kulwaniswa ki lila zesabisa ni kukopana ni miinelo yetaata. Habasika kutela mwamulaho kabakala sabo. (2 Makorinte 11:23-27) Taba yeo ikonahala cwañi? Muapositola Paulusi naabulezi kuli: “Nifumana maata mwa lika kaufela ka yena yanifa maata.” (Mafilipi 4:13) Mulimu wakona kufa batanga bahae “maata afita a butu” kuli batiyele muliko ufi kamba ufi.—2 Makorinte 4:7.

 “Lilato.” Kulata hahulu Mulimu kukona kutusa Mukreste kuba ni bundume bwakueza zelukile. Ka mukwa oswana, haiba Mukreste walata Bakreste babañwi, ukaisa hahulu pilu kwa lika zebatusa kufita zetusa feela yena, mi ukona kueza cwalo kusina taba kuli walwaniswa kamba bupilo bwahae bu mwa lubeta.—Joani 13:34; 15:13.

 “Kutwisiso.” Mwa Bibele, linzwi la kutwisiso hañata litalusa buikoneli bwanani bona Mukreste bwakueza likatulo zende zetomile fa likuka za mwa Bibele. Mutu yanani kutwisiso wakona kuzwelapili kunahana hande niha kopana ni miinelo yetaata. Wakona kueza likatulo zebonisa kuli unani mubonelo wa Mulimu wa lika mi waziba kuli silikani sahae ni Mulimu ki sa butokwa hahulu kufita moba muungela batu babañwi.

 Buka ya mwa Bibele ya 2 Timotea, neiñozwi ki muapositola Paulusi mi ki liñolo lanaañolezi Timotea mulikanaa hae yanaalata ni yanaasebelisana ni yena. Mwa liñolo le, Paulusi naasusuelize Timotea yanaali mutangana kuli azwelepili kusebeza ka taata mwa bukombwa. (2 Timotea 1:1, 2) Kubonahala kuli Timotea naanani boi, ili nto yenekona kumupaleliswa kupeta zeñata mwa puteho. (1 Timotea 4:12) Kono Paulusi naahupulisize Timotea kuli naafilwe mpo, ili buikalabelo bwa butokwa hahulu bwa kusebeleza mizwale ni likaizeli mwa puteho. Naasusuelize Timotea kuli asike azina-zina kupeta buikalabelo bwahae bwa kuokamela puteho, kukutaza taba yende, ni kutiyela miinelo yetaata kabakala tumelo yahae.—2 Timotea 1:6-8.

 Nihaike kuli manzwi ao naañolezwi Timotea, akona kutusa batu kaufela bababata kusebeleza Mulimu kacenu kuba ni buikolwiso bwa kuli uka bafa maata ebatokwa kuli bakondise kusina taba ni butata bobakona kukopana ni bona.