Kana Mubuso wa Mulimu ki Nto Feela ye Mwa Pilu Yamina?
Kalabo ya Bibele
Batili, Mubuso wa Mulimu haki nto feela ye mwa lipilu za Bakreste. a Bibele ilutusa kuziba kouinzi Mubuso wo ka kubulela kuli ki “Mubuso wa kwahalimu.” (Mateu 4:17, Bibele ya King James Version) Halunyakisiseñi mo Bibele iboniseza kuli Mubuso wo uteñi luli mi ubusa kuzwelela kwa lihalimu.
Mubuso wa Mulimu unani babusi, babusiwa, milao, ni maata a kutaleleza tato ya Mulimu kwa lihalimu ni fa lifasi.—Mateu 6:10; Sinulo 5:10.
Mulonga kamba Mubuso wa Mulimu ukabusa fahalimwaa “batu kaufela, macaba kaufela, ni ba lipuo kaufela” fa lifasi. (Daniele 7:13, 14) Mubuso wo hausika fiwa maata ki babusiwa baona, kono Mulimu ki yena yaufile maata a kubusa.—Samu 2:4-6; Isaya 9:7.
Jesu naasepisize baapositola bahae kuli nebakaba ni yena mwa Mubuso wa lihalimu kuli “[baine] fa mabona.”—Luka 22:28, 30.
Mubuso wo unani lila zeuka tokwa kuyundisa.—Samu 2:1, 2, 8, 9; 110:1, 2; 1 Makorinte 15:25, 26.
Bibele hailuti kuli Mubuso wa lihalimu ki nto feela ye mwa pilu yamina, ili kutalusa kuli ki puso ye mwa pilu ya mañi ni mañi. Kono ibonisa kuli lipilu zaluna liswanela kuutwa “linzwi la Mubuso” kamba “taba yende ye ya Mubuso.”—Mateu 13:19; 24:14.
Taba ya kuli “Mubuso wa Mulimu u mwahali ku mina” italusañi?
Batu babañwi habazibi hande koufumaneha Mubuso wo kabakala molitolokezwi liñolo la Luka 17:21 mwa Libibele zeñwi. Ka mutala, Bibele ya King James Version ibulela kuli: “Mubuso wa Mulimu u mwahali ku mina.” Kuli luutwisise timana ye, luswanela kunyakisisa litaba zeñwi zeswalisana ni timana ye.
Mubuso wa Mulimu neusiyo mwa lipilu zetatafezi za balwanisi ba Jesu bane babata kumubulaya
Jesu naaambola ni Bafalisi, sona sikwata sa babahulu ba bulapeli sene simulwanisa mi hasamulaho nesitusize kuli abulaiwe. (Mateu 12:14; Luka 17:20) Kana luli kwautwahala kubulela kuli Mubuso wo ki nto yeneli mwa lipilu zabona zetatafezi? Jesu naababulelezi kuli: “Mwahali mutezi buipi ni kutokwa mulao.”—Mateu 23:27, 28.
Libibele zeñwi litolokile manzwi anaabulezi Jesu ao a kwa Luka 17:21 ka kunepahala, ka kubulela kuli: “Mubuso wa Mulimu uteñi mo ku mina.” (Litaku lisiyamisizwe ki luna; Bibele ya Contemporary English Version) Mwa Bibele ya Toloko ya Lifasi Lelinca, taba yeo itolokilwe kuli: “Mubuso wa Mulimu u mwahalaa mina.” Mubuso wa lihalimu neuli teñi ‘ku bona’ kamba neuli “mwahalaa” Bafalisi ka mukwa wa kuli Jesu, yena yanaaketilwe ki Mulimu kuli abe Mulena, naayemi fapilaa bona.—Luka 1:32, 33.
a Bulapeli bobuñata bobuipapata kuli ki bwa Sikreste buluta kuli Mubuso wa Mulimu ki nto ye mwa pilu ya mutu. Ka mutala, kwa America, bulapeli bwa Southern Baptist Convention nebubulezi kuli Mubuso wa Mulimu ki “puso ya Mulimu mwa pilu ni mwa bupilo bwa mutu.” Ka kuswana, Papa Benedict wabu 16 naañozi cwana mwa buka yahae ya Jesus of Nazareth: “Mubuso wa Mulimu ubusa lipilu zeipeya kuutwa.”
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
LITIMANA ZA MWA BIBELE ZETALUSIZWE
Mareka 1:15 Italusizwe—“Mubuso wa Mulimu U Fakaufi”
Kana Jesu naatalusa kuli Mubuso neukalile kale kubusa?
TAWALA YA MULIBELELI
Ki Mañi Mulena wa Mubuso wa Mulimu?
Bañoli babañata ba Bibele nebañozi litaba zeneka tusa batu kuziba yanaakaba Mulena wa Mubuso wa Mulimu. Jesu ki yena feela yanaapilile ka kulumelelana ni litaba zene bañozi zeo ka za yanaakaba Mulena.
