Sitabelo Sanaafile Jesu ki ‘Tiululo ku Babañata’ ka Mukwa Ufi?”

MUBAPALE

Kalabo ya Bibele

Mulimu ulukulula batu kwa sibi ni lifu ka kuitusisa sitabelo sa Jesu. Bibele italusa kuli mali a Jesu anaasuluhile ki teko ya tiululo. (Maefese 1:7; 1 Pitrosi 1:18, 19) Ki lona libaka Jesu hanaabulezi kuli naatile ‘kuto fa bupilo bwahae sina tiululo kuli aliulule babañata.’—Mateu 20:28.

Ki kabakalañi ‘batu babañata hane batokwa kuliululwa?’

Adama yena mutu wapili naapetahalile, kutalusa kuli naasina sibi. Naanani tohonolo ya kupila kuya kuile, kono naalatehezwi ki yona bakeñisa kuli naasika utwa Mulimu. (Genese 3:17-19) Mi hasaabile ni bana, ni bona bahoza sibi sahae. (Maroma 5:12) Ki lona libaka Bibele haibulela kuli Adama ‘naaitekisize’ ni kulekisa bana bahae mwa butanga bwa sibi. (Maroma 7:14) Bakeñisa kuli nebasika petahala, akuna kubona yanaakona kuleka sinca bupilo bwanaalatehezwi ki bona Adama.—Samu 49:7, 8.

Mulimu naashwezi makeke Adama ni batu bane basimuluha ku yena bakeñisa kuli nebasina sepo ya kwapili. (Joani 3:16) Kono bakeñisa kuli Mulimu unani katulo yelukile, naatokwa kueza sesiñwi ka za sibi sene baezize kabomu. (Samu 89:14; Maroma 3:23-26) Bakeñisa kuli Mulimu walata batu, alukisa nzila yanaaka swalela ka yona sibi sabona kamba mane kusifeliseleza. (Maroma 5:6-8) Mi nzila yeo ki tiululo.

Tiululo isebeza cwañi?

Mwa Bibele, linzwi la “tiululo” liama lika zetaalu zelatelela:

Ki tifo.—Numere 3:46, 47.
Ilukulula kwa nto yeñwi.—Exoda 21:30.
Ki tifo yelikana ni teko ya nto yeñwi, kamba yekwahela tifo ya nto yeñwi. a

Munyakisise mo lika zeo liamela kwa mpo ya tiululo yanaafile Jesu Kreste.

Tifo. Bibele ibulela kuli Bakreste ‘nebalekilwe ka teko yetuna.’ (1 Makorinte 6:20; 7:23) Tifo yeo ki mali a Jesu ‘anaalekezi Mulimu batu babazwa mwa mishobo kaufela ni malimi ni batu ni sicaba.’—Sinulo 5:8, 9.
Ilukulula kwa nto yeñwi. Ka sitabelo sa Jesu, “lulukuluzwi ka tiululo” kwa libi zaluna.—1 Makorinte 1:30; Makolose 1:14; Maheberu 9:15.
Tifo yelikana ni teko ya nto yeñwi. Sitabelo sa Jesu silikana ni teko ya bupilo bwanaalatehezwi ki bona Adama, ili bupilo bobupetahalile. (1 Makorinte 15:21, 22, 45, 46) Bibele ibulela kuli: “Sina babañata hababile baezalibi kabakala kusautwa kwa mutu alimuñwi [Adama], ka mukwa oswana babañata bakaba babalukile kabakala kuutwa kwa mutu alimuñwi hape [Jesu Kreste].” (Maroma 5:19) Liñolo le litalusa ka mo lifu la mutu alimuñwi likona kuliululela batu babañata kwa sibi. Mane sitabelo sa Jesu ki “tiululo yelikanelela ya batu kaufela” babaeze mobakonela kaufela kuli batusiwe ki sitabelo seo.—1 Timotea 2:5, 6.

a Mwa Bibele, linzwi lelitolokilwe kuli “tiululo” liama kwa tifo kamba nto yeñwi ya teko yetuna yelifiwa. Ka mutala, linzwi la Siheberu la ka·pharʹ, litalusa “kukwahela.” (Genese 6:14) Hañata liamanga kwa kukwahela sibi. (Samu 65:3) Linzwi leliswana ni lona la koʹpher, liama kwa tifo yelifiwanga ili kukwahela kamba kulukulula batu kwa sibi. (Exoda 21:30) Ka mukwa oswana, linzwi la Sigerike la lyʹtron, ili lelitolokilwe kuli “tiululo,” hape likona kutalusa “tifo ye lukulula.” (Mateu 20:28; Bibele ya The New Testament in Modern Speech, yetolokilwe ki R. F. Weymouth) Bañoli ba litaba za Sigerike nebaitusisize linzwi leliswana leo kuama kwa tukiso ya kulifela lisole yatamezwi ndwa kamba kulukulula mutu ya mwa butanga.