Kana mwaikalelwanga hamunahana za kuneela bupilo bwa mina ku Jehova ni kukolobezwa? Haiba ki cwalo, taba ye ika mitusa kufelisa sabo yeo.

Ze mwa taba ye

•  Kucwañi haiba nieza mafosisa amatuna hamulaho wa kukolobezwa?

•  Kucwañi haiba nisaba kufiwa buikalabelo hanika kolobezwa?

•  Kucwañi haiba niikutwa kuli haniswaneli kusebeleza Jehova?

•  Zebabulela litaka zamina

 Libaka taba yeo haikona kumibilaeza: Mwendi mwaziba mutu yomuñwi yakile aeza sibi sesituna mi naazwisizwe mwa puteho. (1 Makorinte 5:11-13) Mwakona kuikalelwa kuli taba yeo yakona kuezahala ni ku mina.

 “Lwapili hanikalisa kunahana za kukolobezwa, neniikalezwi kuli nikaswana naeza mafosisa. Nanahana ka za maswabi ane baka ikutwa bashemi baka.”—Rebekah.

 Liñolo lelikona kutusa: “Mutu yamaswe atuhele nzila yahae . . . Akutele ku Jehova, yena yaka mushemuba, akutele ku Mulimu waluna, kakuli uka muswalela ka kutala.”—Isaya 55:7.

 Munahane taba ye: Nihaike kuli batu babasika bakela libi zabona bazwisiwanga mwa puteho, Jehova ubonisanga makeke kwa batu bababaka ni kuamuhela kalimelo.—Samu 103:13, 14; 2 Makorinte 7:11.

 Kwandaa zeo, niti kikuli: Nihaike kuli hamusika petahala mwakona kutiyela muliko ka tuso ya Mulimu. (1 Makorinte 10:13) Ki mañi yakona kumiketela za kueza? Kana ki mina bañi? Kamba ki mutu yomuñwi?

 “Nenisaba kuli nenika eza sibi sesituna hamulaho wa kukolobezwa, kono cwale nalemuha kuli nenika eza mafosisa kambe nenisika kolobezwa. Nalemuha kuli nenisa swaneli kulumeleza sabo ya lika zekaezahala kwapili kunipaleliswa kueza lika zeniswanela kueza ka nako ya cwale.”—Karen.

 Sisupo sa butokwa: Haiba mwalata, mwakona kuambuka kueza libi zetuna sina feela mobasweli kuezeza batanga ba Jehova babañata.—Mafilipi 2:12.

 Kana musatokwa tuso yeñwi? Mubone taba ya sikuwa yeli “How Can I Resist Temptation?”

 Libaka taba yeo haikona kumibilaeza: Ka mutala, mwendi kunani babanca bomuziba babasiile balikani ni mabasi abona kuli baeze zeñata mwa sebelezo yabona ku Jehova. Mwakona kubilaela kuli batu bakalibelela kuli ni mina mueze nto yeswana.

 “Mukreste yakolobelizwe wakona kueza zeñata mwa sebelezo yahae ku Jehova, kono batu babañwi habaifanangi kamba mwendi miinelo hai balumelezi kueza cwalo.”—Marie.

 Liñolo lelikona kutusa: “Kono mutu ni mutu atatube likezo zahae, mi cwale ukaba ni libaka la kunyakalala ka lona anosi, mi isiñi ka kuibapanya ku yomuñwi.”—Magalata 6:4.

 Munahane taba ye: Mwa sibaka sa kuibapanya ku babañwi, muise pilu kwa manzwi a kwa Mareka 12:30 ali: “Ulukela kulata Jehova Mulimu wahao ka pilu yahao kaufela.”

 Mulemuhe kuli muswanela kusebeleza Jehova ka pilu yamina kaufela isiñi ka pilu ya yomuñwi. Haiba mwalata Jehova luli, mukafumana linzila za kumusebeleza ka zona ka momukonela kaufela.

 “Nihaike kuli kukolobezwa ki muhato wa butokwa hahulu, haki mushimbo obukiti. Haiba mueza bulikani ni batu ba mikwa yeminde, baka mitusa. Kuamuhela buikalabelo hanyinyani-hanyinyani kuka mitahiseza tabo. Haiba musaba kukolobezwa, muka itahiseza butata.”—Julia.

 Sisupo sa butokwa: Mubonise buitumelo kabakala lilato lamibonisize Jehova. Kueza cwalo kuka misusueza kuli ni mina mumusebeleze ka momukonela kaufela.—1 Joani 4:19.

 Kana musatokwa tuso yeñwi? Mubone taba ya Sikuwa yeli “How Responsible Am I?”

 Libaka taba yeo haikona kumibilaeza: Jehova ki yena Yapahami ka Kufitisisa mwa pupo kaufela; haakoni kubapanywa kwa batu! Mwendi mwakona kuipuza ka za haiba Jehova waziba kuli muteñi.

 “Bakeñisa kuli bashemi baka ki Lipaki za Jehova, neniikutwanga kuli Jehova haasika nihohela ku yena kono silikani seninani sona ni yena sizwa kwa bashemi baka.”—Natalie.

 Liñolo lelikona kutusa: “Hakuna mutu yakona kutaha ku na, konji haiba Ndate, yanilumile, amuhoha.”—Joani 6:44.

 Munahane taba ye: Kunahana za kuli mubata kukolobezwa kubonisa kuli Jehova umihohela ku yena ni kuli mube ni silikani sesitiile ni yena. Kana mwatabela kuamuhela memo yeo?

 Hape muhupule kuli haki mina kamba mutu ufi kamba ufi yatoma likuka za batu babaswanela kuhohiwa, kono ki Jehova. Hape Linzwi lahae limisepisa kuli haiba “musutelele ku Mulimu, . . . ukasutelela ku mina.”—Jakobo 4:8.

 “Taba ya kuli mwaziba ka za Jehova ni kuli umihohezi ku yena ki bupaki bobubonisa kuli wamilata. Kacwalo haiba muikutwa kuli hamuswaneli kumusebeleza, muikupulisange kuli haalumelelani ni taba yeo. Mi Jehova kamita ubulelanga niti.”—Selina.

 Sisupo sa butokwa: Haiba mukwanisize zetokwahala za mwa Mañolo kuli mukolobezwe, muzibe mwakona kusebeleza Jehova. Mi muhupule kuli, ki yena yaswanela kulapelwa.—Sinulo 4:11.

 Kana musatokwa tuso yeñwi? Mubone taba yeli “Ki Kabakalañi Haniswanela Kulapelanga?”