Muuna yomuñwi wa kwa Eritrea naaile kwa Norway kuyo pila sina muzwahule ka silimo sa 2011. Lipaki za Jehova hane baizo mupotela, abataluseza kuli naakopani ni Lipaki za Jehova kwa naha yahabo yena. Abataluseza kuli naaboni Lipaki za Jehova bane bakenyizwe mwa tolongo kabakala kuli nebahanile kukena busole, niha nebanyandisizwe maswe.

 Ka bumai, muuna yo aeza nto yeñwi yenetahisize kuli alengiwe mwa tolongo. Mwa tolongo, afumana Lipaki za Jehova babalaalu, bo Paulos Eyasu, Negede Teklemariam, ni bo Isaac Mogos, ili bao nebatamilwe kabakala tumelo yabona kuzwa feela ka 1994.

 Muuna yo hanaali mwa tolongo, naaiponezi kuli Lipaki za Jehova basebelisanga zebaluta batu. Naalemuhile kuli basepahala, mi mane nebaikabelanga lico zabona ni mapantiti babañwi. Mi hape naabonanga Lipaki za Jehova bane bali mapantiti hane baitutanga Bibele hamoho zazi ni zazi, mi nebamemanga babañwi kuli bakopane hamoho ni bona. Mi hane bataluselizwe kuli nebaka lukululwa hane bakanyatela pampili yenebonisa kuli nebasike bazwelapili kuba Lipaki, nebahanile.

 Taba yeo neisusuelize hahulu muuna yo, mi hasaatutezi kwa Norway, naabata kuziba libaka Lipaki za Jehova hane banani tumelo yetiile cwalo. Kacwalo, Lipaki za Jehova hane bamupotezi, honafo feela akala kuituta Bibele ni bona ni kufumaneha kwa mikopano yabona.

 Mwa September 2018, akolobezwa mi aba yomuñwi wa Lipaki za Jehova. Mi cwale saitusisanga kolo kaufela yaba ni yona kuambola ni batu ba kwa Eritrea ni Sudan, kubasusueza kuli baitute Bibele ilikuli babe ni tumelo yetiile.