Ka nako ya butuku bobuyambukela bwa COVID-19, mizwale ni likaizeli baluna baezize licinceho kwa neku la mikutalezo yabona kuli bashaele lushango lwa mwa Bibele loluomba-omba ku babañwi. Mwa sibaka sa kukutaleza fa nyangela kamba kupotela batu fa mandu abona, bakutalize ka kuitusisa mafoni ni ka kuñola mañolo. a Batu babañata baitebuhile buikatazo bo, mi Jehova ubafuyauzi. (Liproverbia 16:3, 4) Munyakisise zene baipumani ku zona mizwale ni likaizeli mwa naha yeñwi.

 Pili butuku bwa COVID-19 busika kala kale, kaizeli yabizwa Helen, hañata naapotelanga musali yomuñwi mi naamutalusezanga kuli naabata kuituta Bibele ni yena. Musali yo kamita nahananga kuituta Bibele. Nihakulicwalo, lizazi pili batu basika haniswa kale kuzamaya kabakala butuku bwa COVID-19, bo Helen bafa musali yo Bibele ni buka ya Bibele Ilulutañi? Ka nako yeo yene bahanisizwe batu kuzamaya, bo Helen hape bataluseza musali yo kuli nebabata kuituta Bibele ni yena, ni kumutaluseza kuli nebaka itutelanga fa foni. Ka nako ye, musali yo alumela kuituta Bibele. Naatabela hahulu litaba zanaaituta mi nakonyana kuzwa fo, ataluseza bo Helen kuli baitutange ni yena zazi ni zazi! Musali yo hape akala kufumanehanga kwa mikopano ya Sikreste kamita ka kuitusisa foni. Kwandaa kusebelisa feela litaba zasweli kuituta mwa Bibele, musali yo hape utalusezanga babañwi zasweli kuituta.

 Mizwale ni likaizeli mwa puteho yeñwi nebakutalize ka kuñolela mapokola mañolo a kuitumela kwa musebezi wa butokwa obasweli kupeta. Mapokola nebakomokisizwe hahulu ki mañolo ao. Mupokola yomuñwi ataluseza muuna-muhulu yomuñwi wa libizo la Jefferson kuli: “Neninahana kuli Lipaki za Jehova batoile mapokola.” Muzwale Jefferson ataluseza mupokola yo kuli taba yeo nesi ya niti. Mapokola nebatabisizwe hahulu ki manzwi anaañozwi mwa mañolo ao kuli mane baamameka kwa munyako wa ma ofisi abona. Mupokola yomuñwi abulela kuli, “kueza cwana kukatusa kuli batu babe ni mubonelo omunde ka za luna.”

 Kaizeli Edna ni kaizeli Ednalyn, sibeli sabona basebeza sina mapaina ba kamita. b Bakeñisa kuli Intaneti neisa swali hande fa ndu yabona, nebasa koni kufumanehanga kwa mikopano ya puteho ka kuitusisa progilamu yekonahalisa kuli baputehi babonane. Kacwalo, balizeza musali yene bapila mabapa ni yena ni kumukupa kuli baitusisange Wi-Fi yahae ni kuli nebaka mulifanga masheleñi. Musali yo abalumeleza kuitusisanga Wi-Fi yahae kusina kulifa sesiñwi. Musali yo naafumanehile kwa mikopano ya puteho bo Edna ni bo Ednalyn hane bamumemile. Ka nako ya cwale, yomuñwi wa batu babayahile mabapa ni musali yo, alimuñwi kwa bana bahae, ni baikulu bahae babasizana babeli, baituta Bibele ni Lipaki za Jehova mi bafumanehanga kwa mikopano ya Sikreste kamita.

 Mizwale ni likaizeli ba mwa silalanda sesiñwi nebamemile batu babapila mabapa ni bona, bobabeleka ni bona, ni batu babañwi, kwa ngambolo ya nyangela yeneka fiwa ka kuitusisa progilamu yekonahalisa kuli baputehi babonane. Kaizeli yomuñwi yabizwa Ellaine, yabeleka fa sipatela sa mwa silalanda seo, kwa makalelo naazina-zina kumema batu banaabeleka ni bona. Naanahana kuli mwendi madokota babañwi banani mubonelo ofosahezi ka za Lipaki za Jehova. Nihakulicwalo, amema madokota bafa sipatela seo ka kubalumela tushango. Kaizeli Ellaine sihulu naazina-zina kumema madokota bababeli, ili bo mutu ni musalaa hae. Nihakulicwalo, hamulaho wa kunahanisisa ka za taba yeo ni kulapela ka za teñi, abamema ka kubalumela tushango. Babasali baalaba kaizeli Ellaine kuli: “Kona kuli mubata kuli niswalisane ni bulapeli bwamina?” Bo Ellaine batalusa kuli batu kaufela nebalukuluhile kufumaneha kwa mukopano wo, isiñi feela Lipaki za Jehova. Habusa, bo Ellaine bakomoka kubona bo mutu ni musalaa hae bao hane bafumanehile kwa mukopano wa kuezeza fa progilamu yekonahalisa kuli baputehi babonane, mi nebaitahanezi! Batalusa kuli: “Pili mukopano usika fela kale, neniamuhezi kashango kane kazwa ku babasali kane kabulela kuli: ‘Ki lwapili kufumaneha kwa mukopano wa Lipaki za Jehova. Niikozi. Nitabile hahulu. Niitumezi kwa kunimema.’”

 Bo Ellaine nebamemile madokota ba 20 kwa mukopano mi nebatabile kuziba kuli ba 16 nebafumanehile. Ka kuama kwa manzwi a muapositola Paulusi, batalusa kuli: “Nitabile kuli nenibile ni ‘bundume’ bwa kushaela ‘taba yende ya Mulimu’ kwa batu bonibeleka ni bona.”—1 Matesalonika 2:2.

 Butuku bwa COVID-19 buziyelize batu kaufela. Kono mizwale ni likaizeli baluna ba mwa naha ye ni ba mwa linaha zeñwi, bazwezipili kuba ni tabo ni mubonelo omunde ka kueza ka mobakonela kaufela kuomba-omba ni kutusa babañwi.—Likezo 20:35.